އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)ގެ ކުރީގެ ވެރިޔާ އިބްރާހިމް އާތިފް ޝަކޫރުއާއި ދެކޮޅަށް އުފުލާފައިވާ މަނީ ލޯންޑަރިންގ އަދި ޓެރަރިޒަމްއަށް ފައިނޭންސް ކުރުން ހުއްޓުވުމުގެ ޤާނޫނާ ހިލާފުވި ކަމުގެ ކުށުގެ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.

މި މައްސަލަ ތާވަލު ކޮށްފައިވަނީ އާދިއްތަ ދުވަހުގެ މެންދުރުފަހު 15:00 އަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލްއެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 14 ފެބްރުއަރީ 2022 ގައެވެ. އެ ދުވަހު މި މައްސަލައިގައި ކުރިއަށް ގޮސްފައިވަނީ ދިފާއީ ހެކި ހުށައެޅުމުގެ ބައެވެ. އެގޮތުން ދިފާއުން ވަނީ 4 ޝަފަހީ ހެކިން ހުށައަޅާފައެވެ. އޭގެ ތެރޭގައި ކުރީގެ އޮޑިޓަރ ޖެނެރަލް ނިޔާޒް އިބްރާހިމްގެ އިތުރުން، ޔާމީން އާދަމްއާއި، އަހުމަދު އަސްއަދުއާއި، އަބްދުﷲ އަޝްރަފް ހިމެނެއެވެ.

އެ ދުވަހު މައްސަލަ ބައްލަވާ ގާޒީ ވަނީ މި މައްސަލައިގެ ދެން އޮންނަ އަޑުއެހުމެއްގައި އޮންނާނީ މަދަނީ މިންގަނޑުން ކުރިއަށް ގެންދިއުމާއިމެދު ގޮތެއް ނިންމެވުން ކަމަށް ވިދާޅުވެފައެވެ. އޭގެ ކުރިން ދެފަރާތަށްވެސް ޚުލާސާ ގޮތެއްގައި ފާހަގަ ކުރަން ބޭނުންވާ ކަންކަން ފާހަގަ ކުރެއްވުމަށް ގާޒީ ފުރުސަތު ދެއްވާނެއެވެ.

އެ ދުވަހުގެ އަޑުއެހުމުގައި އާތިފް ޝަކޫރަށް ވާހަކަދެއްކެވުމުގެ ފުރުސަތު ދެއްވުމުން އޭނާ ވަނީ އެމްއެމްޕީއާރްސީ ޙިޔާނާތާއި ގުޅޭ ގިނަ ވާހަކަތަކެއް ދައްކަވާފައެވެ. އެގޮތުން ކޮންމެ ކަމެއް ހިނގަނީ ވަކި ވެއްޓެއްގައި ވަކި ޙާލަތެއްގައިކަން ބަޔާން ކުރައްވައި ވާހަކަ ފައްޓަވަމުން އާތިފް ވިދާޅުވީ، އެ ވެށިން ބޭރުން ކަމެއް ހިނގާނަމަ ދެނެގަންނަން އުނދަގޫވާނެ ކަމަށެވެ.

ދައުލަތުން މި މައްސަލައިގައި ކޮށްފައިވާ ދައުވާއަކީ އޭނާ އެފްއައިޔޫގެ ވެރިޔާގެ ގޮތުގައި ހުންނެވި 7 މަހާއި 22 ދުވަހުގެ ތެރޭގައި ކުރެއްވި ނުވަތަ ނުކުރައްވައި ދޫކޮށްލެއްވި ކަމެއްގެ މައްޗަށްކަން އާތިފް ފާހަގަކުރެއްވިއެވެ.

އާތިފް ވިދާޅުވީ، އޭރު މަޤާމުން އިސްތިއުފާ ދެއްވީ ޤާނޫނީ ޒިންމާ އަދާނުކުރެވޭނެކަން އަމިއްލައަށް ޤަބޫލު ކުރެވުމުން ކަމަށެވެ.