މިސްކިތުގައި އަޑުގަދަ ކުރި މީހާ ނަފްސާނީ ފަރުވާ ހޯދާތީ ދޫކޮށްލައިފި
އެ މީހާ ދޫކޮށްލީ ނަފްސާނީ ބައްޔަށް ފަރުވާ ހޯދާ ކަމުގެ ރިޕޯޓުތައް ބެލުމަށްފަހު ކަމަށް ފުލުހުން ބުނޭ
އައިއެސް ލޯގޯ ޖަހައިގެން މެމްބަރަށް އެރި މީހާ ހައްޔަރު ކުރުން
ޓެރަރިސްޓް ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް)ގެ ލޯގޯ ޖަހައިގެން ސަލްމާން މިސްކިތުގެ މެމްބަރަށް އަރައި އަޑު ގަދަ ކުރުމުގެ ސަބަބުން ހައްޔަރު ކުރި މީހާ ދޫކޮށްލައިފިއެވެ.
ފުލުހުންގެ މީޑިއާ އޮފިޝަލް "ރާއްޖެ އެމްވީ"އަށް ވިދާޅުވީ އެ މީހާ ދޫކޮށްލީ އެއީ ނަފްސާނީ ބައްޔަށް ފަރުވާ ހޯދާ މީހަކަށްވާތީ ކަމަށެވެ. އަދި އޭނާ އާއިލާއާ ހަވާލު ކުރީ ރިޕޯޓުތައް ބަލައި ކަށަވަރު ކުރުމަށްފަހު ކަމަށްވެސް ފުލުހުންގެ މީޑިއާ އޮފިޝަލް ވިދާޅުވިއެވެ.
މި މީހާ ހައްޔަރު ކޮށްފައިވަނީ ހުކުރު ވަގުތު ސަލްމާން މިސްކިތުގައި އަޑުގަދަ ކުރުމުގެ ސަބަބުންނެވެ. މި މައްސަލައާ ގުޅިގެން ފުލުހުން ހައްޔަރު ކުރީ 43 އަހަރުގެ ދިވެހި ފިރިހެނެކެވެ.
ސޯޝަލް މީޑިއާގައި ދައުރުވަމުންދާ ވީޑީއޯތަކުން ފެންނަ ގޮތުގައި އެ މީހާ މަސައްކަތް ކުރީ ސަލްމާން މިސްކިތުގެ މިންބަރަށް އަރައި އަމިއްލައަށް ޚުތުބާ ކިޔުމަށެވެ. އެވަގުތު އޭނާ ލައިގެން ހުރި ކުރުތާގެ ފަހަތުގަޔާއި ކުރިމަތީގައި އައިއެސްގެ ލޯގޯ ޖަހާފައިވާތަން ފެނެއެވެ.
މަންޒަރު ދުށް ފަރާތްތަކުން ބުނާ ގޮތުގައި އެ މީހާ ހުއްޓުވަން ފުލުހުން މަސައްކަތް ކުރުމުން އޭނާ ވަނީ ނުކިޔަމަންތެރިކަން ދައްކާފައެވެ. އަދި މިސްކިތުގެ ބައެއް ތަކެއްޗަށް ވެސް ގެއްލުން ދީފައިވާ ކަމަށް މަންޒަރު ދުށް ފަރާތްތަކުން މައުލޫމާތު ދީފައި ވެއެވެ.
އައިއެސް ޖަމާއަތަކީ ކޮބައިކަން އެންމެނަށް ވެސް އެނގޭއިރު އައިއެސްގެ ލޯގޯ ޖަހާފައިވާ ކުރުތާއެއް ނަފްސާނީ ބަލި މީހެއްގެ އަތުގައި އޮތީ ކީއްވެގެންތޯ އާއި، ހުކުރަށް ދިއުމަށް އެކުރުތާ ލީ ކީއްވެގެންތޯ ސާތުކުރުން ވަރަށް މުހިންމު ކަމަށް ބައެއް ފަރާތްތަކުން ބުނެފައިވެއެވެ.
