މިއަހަރުގެ ނޮވެމްބަރު މަހު ގަތަރުގައި ފަށާ ފީފާ ވޯލްޑް ކަޕްގައި ސެމީ އޮޓޮމެޓިކް އޮފްސައިޑް ޓެކްނޮލޮޖީ ބޭނުންކުރަން ނިންމާފައިވާކަމަށް ފުޓްބޯޅައިގެ މައި އިދާރާ ފީފާއިން ބުނެފިއެވެ.
މި ސިސްޓަމް އާއިއެކު ވީޑިއޯ ރެފްރީންނާއި ދަނޑުމަތީގައި ހަރަކާތްތެރިވާ ރެފްރީންނަށް އަވަހަށް ނިންމުންތައް ނިންމަން ފަސޭހަވެގެންދާނެއެވެ. އަދި މި ސިސްޓަމް ބޭނުންކޮށްގެން ރަނގަޅު ނިންމުންތައް ނިންމާ، މުބާރާތް އިންސާފުވެރިކަމާއެކު ކުރިއަށްގެންދަން ވަރަށް ބޮޑަށް ފަސޭހަވެގެންދާނެކަމަށް ފީފާއިން ބުނެއެވެ.
ސެމީ އޮޓޮމެޓިކް އޮފްސައިޑް ޓެކްނޮލޮޖީ ބޭނުންކުރާނީ ބޯޅައިގެ ތެރޭގައި ޗިޕެއް ހަރުކޮށްގެންނެވެ. މި ޗިޕް މެދުވެރިކޮށް ބޯޅައިގައި ކުޅުންތެރިޔާ ޖަހާ ސީދާ ވަގުތު ދެނެގަންނާނެއެވެ. އަދި އެ ޑާޓާ ވަގުތުން ވީއޭއާރު ސިސްޓަމާއި ހިއްސާކުރުމުން އެމައުލޫމާތު ދަނޑުގައިތިބޭ ރެފްރީންނާއި ހިއްސާކުރެވިގެންދާނެއެވެ.
ރެފްރީންނާއި މި މައުލޫމާތު ހިއްސާކުރާއިރު، ދަނޑުގައި ކުޅިބަލަންތިބޭ ސަޕޯޓަރުންނަށް ސްޓޭޑިއަމްގައި ހުންނަ ސްކްރީންތަކުން މި މަންޒަރުތައް ތްރީޑީ ކޮށް ދައްކާނެއެވެ. އަދި ޓީވީންވެސް މި މަންޒަރުތައް އެވަގުތު ހިއްސާ ކުރުމަށް ވަނީ ނިންމާފައެވެ.
މި ސިސްޓަމް ރަސްމީކޮށް ބޭނުންކުރަން ފަށާނީ މިއަހަރު އޮންނަ ވޯލްޑް ކަޕްގައެވެ. އެއަށްފަހު އެހެން މުބާރާތްތަކުގައިވެސް މި ސިސްޓަމް ބޭނުން ކުރުމަށް ފީފާއިން ވަނީ ނިންމާފައެވެ. ވޯލްޑް ކަޕްގައި ސެމީ އޮޓޮމެޓިކް އޮފްސައިޑް ޓެކްނޮލޮޖީ ބޭނުންކުރަން ނިންމީ ގަތަރރުގައި ކުރިއަށްދިޔަ ދެ މުބާރާތެއްގައި މި ސިސްޓަމް ކާމިޔާބުކަމާއެކު ޓެސްޓު ކުރުމަށް ބޭނުން ކުރުމަށްފަހުއެވެ.
