ކުދި އަދި މެދުފަންތީގެ ވިޔަފާރިތަކަށް ދޫކޮށްފައިވާ ލޯނުތައް އަނބުރާ ދެއްކުމުގައި ލުއިފަސޭހަ ގޮތްތަކެއް ފަހިކޮށްދޭން ފާސްކޮށްފި
ވިޔަފާރިތައް ސްޓްމިއުލޭޓް ކުރުމަށް ބޭންކުތަކާއި މާލީ އިދާރާތަކުން ލޯނު ފޯރުކޮށްދީ، އެ ވިޔަފާރިތަކަށް މާލީ އެހެނިހެން ވަސީލަތްތަކަށް މަގުފަހިކޮށްދިނުން
ބާޒާރުމަތި ފިހާރައެއް - ވިޔަފާރިތަކަށް މި ދަނޑިވަޅުގައި ލުއިގޮތްތަކެއް ފަހިކޮށްދޭން ވަނީ ފާސްކޮށްފައި
ކޮވިޑް-19 އާއި ޔޫކްރެއިން ރަޝިޔާ ހަނގުރާމައިގެ ސަބަބުން އިގްތިސާދަށް އައިސްފައިވާ ދަތި ދަނޑިވަޅުން ވިޔަފާރިތައް އަރައިގަތުމަށް އެހީތެރިވެދިނުމުގެ ގޮތުން، ކުދި އަދި މެދު ފަންތީގެ ވިޔަފާރިތަކަށް ދޫކޮށްފައިވާ ލޯނުތައް އަނބުރާ ދެއްކުމުގައި ލުއިފަސޭހަ ގޮތްތަކެއް ފަހިކޮށްދިނުމަށް ރައްޔިތުންގެ މަޖިލީހުން ފާސްކޮށްފިއެވެ.
ރައްޔިތުންގެ މަޖިލީހުގެ 2022 ވަނަ އަހަރުގެ ދެވަނަ ދައުރުގެ ފަހު ޖަލްސާގައި މިގޮތަށް ފާސްކޮށްފައިވަނީ ފުވައްމުލަކު ދެކުނު ދާއިރާގެ މެންބަރު މުޙައްމަދު މުމްތާޒް ހުށަހަޅުއްވާފައިވާ، ކޮވިޑް-19 ގެ ބަލިމަޑުކަމުން އިޤްތިޞާދަށް ކުރާ ނޭދެވޭ އަސަރުގެ ސަބަބުން، ވިޔަފާރިތަކަށް އެހީތެރިވުމުގެ ގޮތުން ލޯނު ނަގާފައިވާ ފަރާތްތަކަށް މޮރަޓޯރިއަމް ދިނުން އެދި ގޮވާލައި ހުށަހެޅި ޤަރާރު، މާލިއްޔަތު ކޮމިޓީން ދިރާސާކޮށް، ކޮމިޓީ ރިޕޯޓް ތަޅުމަށް ހުށަހެޅުމުންނެވެ.
މި ރިޕޯޓް ފާސްކުރުމަށް މަޖިލީހަށް ހާޒިރުވެ ތިބި 68 މެންބަރުންގެ ތެރެއިން ވޯޓުގައި ބައިވެރިވި 53 މެންބަރުން ވަނީ ރިޕޯޓް ފާސްކުރުމަށް ވޯޓު ދެއްވާފައެވެ. ގަރާރާއި ގުޅިގެ ކޮމިޓީގެ ރިޕޯޓްގައި މައިގަނޑު 5 ރެކޮމެންޑޭޝަނެއް ހިމަނާފައިވެއެވެ.
ފުރަތަމަ ރެކޮމެންޑޭޝަނުގައި ބުނެފައިވަނީ މި ގަރާރުގައި ފާހަގަކޮށްފައިވާ ފަދައިން 2020 އަދި 2021 ވަނަ އަހަރުގެ ތެރޭގައި ކުދި އަދި މެދުފަންތީގެ ވިޔަފާރިތަކަށް ސަރުކާރުން މޮރަޓޯރިއަމް ހަމަޖައްސާދިފައިވާތީއާއި، މި ގަރާރުގައި ފާހަގަކޮށްފައިވާ ކަންތައްތަކަކީ ވަކި ހާލަތަކާ ގުޅިގެން ހުށަހަޅާފައިވާ ކަންތައްތަކެއްކަމާއި، އެ ހާލަތާ ގުޅިގެން ފިޔަވަޅުތަކެއް އަޅައި، އެކަންކަން ތަންފީޒުކުރެވިފައިވާ ކަމަށެވެ.
ދެވަނަ ރެކޮމަންޑޭޝަނެއްގެ ގޮތުގައި ބުނެފައިވަނީ ކޮވިޑް-19 އާއި ޔޫކްރެއިން ރަޝިޔާ ހަނގުރާމައިގެ ސަބަބުން އިގްތިސާދަށް އައިސްފައިވާ މި ދަތި ދަނޑިވަޅުން ވިޔަފާރިތައް އަރައިގަތުމަށް އެހީތެރިވެދިނުމުގެ ގޮތުން ކުދި އަދި މެދުފަންތީގެ ވިޔަފާރިތަކަށް ދޫކޮށްފައިވާ ލޯނުތައް އަނބުރާ ދެއްކުމުގައި ލުއިފަސޭހަ ގޮތްތަކެއް މަގުފަހިކޮށްދިމެވެ.
ތިންވަނަ ރެކޮމެންޑޭޝަނަކީ ވިޔަފާރިތައް ސްޓްމިއުލޭޓް ކުރުމަށް ބޭންކުތަކާއި މާލީ އިދާރާތަކުން ލޯނު ފޯރުކޮށްދީ، އެ ވިޔަފާރިތަކަށް މާލީ އެހެނިހެން ވަސީލަތްތަކަށް މަގުފަހިކޮށްދިނުން ހިމެނެއެވެ. ހަތަރުވަނަ ރެކޮމެންޑޭޝަނަކީ ކޮވިޑް-19 އާއި ގުޅިގެން ކުދި އަދި މެދުފަންތީގެ ވިޔަފާރިތަކުގެ ތެރެއިން ލޯނު އަނބުރާ ދެއްކުމަށް ދަތިވެފައިވާ ފަރާތްތަކުގެ ލޯނުތަކަށް ފައިސާ ދެއްކުމަށް އިތުރު ލުއިތަކެއް ދެދެން އޮތްނަމަ، އެ ލުއިތަކެއް ދިނުމެވެ.
ފަހު ރެކޮމެންޑޭޝަނެއްގެ ގޮތުގައި ބުނެފައިވަނި ކުދި އަދި މެދުފަންތީގެ ވިޔަފާރިތައް ފަންނީގޮތުން ތަރައްގީކުރުމަށް ސިޔާސަތުތައް ބައްޓަންކުރުމަށް ކަމާއިގުޅުންހުރި އިދާރާތަކުގައި ދެންނެވުމަށް ފެންނަ ކަމަށް ބުނެފައިވެއެވެ.
ކޮވިޑް-19 އާއި ގުޅިގެން 2020 ވަނަ އަހަރު މާޗް މަހު 6 މަހުގެ މޮރަޓޯރިއަމްއެއް އެމްއެމްއޭގެ އިސްނެގުމުގެ މަތިން ބޭންކުތަކާއި މާލީ އިދާރާތަކަށް ފޯރުކޮށްދީފައިވެއެވެ. އަދި 2020 ވަނަ އަހަރުގެ މާޗް މަހާއި ސެޕްޓެމްބަރު މަހާއި ދެމެދު މޮރޮޓޯރިއަމް ހަމަޖައްސައިދޭ ލޯނުތަކަށް، ބޭންކުތަކުގެ ގަވާއިދުގެ ދަށުން ހަދަންޖެހޭ 20 އިންސައްތަ ލޯނު ލޮސް ޕްރޮވިޝަން 3 އިންސައްތައަށް ދަށްކޮށްފައިވެއެވެ.
މި މުއްދަތުގެ ތެރޭގައި ހުރިހާ ބޭންކުތަކުން ވެސް ގިނަ ފަރާތްތަކަކަށް މޮރަޓޯރިއަމް ހަމަޖައްސައިދީ ގިނަ ލޯނުތަކެއް ރީޝެޑިއުލްކޮށްދީފައިވެއެވެ.
ފުވައްމުލަކު ދެކުނު ދާއިރާގެ މެންބަރު މުޙައްމަދު މުމްތާޒް ހުށަހަޅުއްވާފައިވާ ގަރާރުގައި ގޮވާލާފައިވާ މައިގަނޑު ކަންތައްތަކުގެ ތެރޭގައި ވިޔަފާރީގެ އެކިއެކި ބޭނުމަށް ލޯނު ނަގާފައިވާ ފަރާތްތަކަށް އެ ލޯނުތައް ދެއްކޭނެ ގޮތެއް ނެތި، ވިޔަފާރިތައް ބަގުރޫޓުވެގެން ދިއުމުގެ އިހްތިމާލު ފާޅުކަންބޮޑު ގޮތެއްގައި ފެންނަން އޮތް ކަމަށާއި، އެފަދަ ވިޔަފާރިތަކަށް އެހީތެރިވެދިނުމުގެ ގޮތުން ލޯނުތައް ދެއްކުމުގައި މޮރަޓޯރިއަމް ހަމަޖައްސައިދިނުމަށް ސަރުކާރަށާއި، އެމްއެމްއޭއަށް ގޮވާލުން ހިމެނެއެވެ.
އަދި އެއްވެސް އިސްތިސްނާއެއް ނެތި ހުރިހާ ވިޔަފާރިތަކަކުން ނަގާފައިވާ ލޯނުތަކާއި ކްރެޑިޓް ފެސިލިޓީތަކަށް މޮރަޓޯރިއަމް ހަމަޖައްސައިދިނުމާއި، މޮރަޓޯރިއަމް ދިނުމުގައި ލޯނު ނުވަތަ ކްރެޑީޓް ފެސިލިޓީއަށް ބަރާބަރަށް ފައިސާ ދައްކާފައިވުން އެއީ ޝަރުތެއްގެ ގޮތުގައި ކަނޑަނޭޅުމުގެ އިތުރުން މޮރަޓޯރިއަމްގެ މުއްދަތުގެ ތެރޭގައި އެއްވެސް އިންޓްރަސްޓެއް، ލޯނު ނުވަތަ ކްރެޑިޓް ފެސިލިޓީއަށް ދައްކަންޖެހޭ ފައިސާގެ ތެރެއަށް އިތުރުނުވެ އެއްކޮށް މާފުވާނެގޮތެއް ހަމަޖައްސައިދިނުމަށް ގަރާރުގައި ގޮވާލާފައިވެއެވެ.
