ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމާގުޅޭގޮތުން ދޮގު ޚަބަރު ފަތުރަނީ އެ ދާއިރާގެ ރައްޔިތުންގެ މެދުގައި އޭނާއާމެދު ނަފްރަތު އުފެއްދުމުގެ ބޭނުމުގައިކަމަށް ބުނެ، އެ މައުލޫމާތު އާއްމުކުރާ ފަރާތްތައް އިންސާފުގެ ކުރިމައްޗަށް ގެނައުމަށް ހޯރަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީން އެދިއްޖެއެވެ.

އެ ކޮމިޓީގެ 4 މެމްބަރުން ސޮއިކޮށް އަންގާރަ ދުވަހު ނެރުނު ބަޔާނެއްގައި ވަނީ، މެމްބަރު ސަލީމަށް ރައްދުވާގޮތަށް، އިސްލާމްދީނުގައި ހައްދު ކަނޑައަޅާފައިވާ އަމަލެއް ކޮށްފައިވާ ކަމަށް ތުހުމަތުކޮށް، ބައެއް ނޫސްތަކުގައި ގެނެސްފައިވާ ޚަބަރަކީ އެއްވެސް އަސްލެއް އަދި އަސާސެއް ނެތް ވާހަކަތަކެއްކަމަށް އެ ކޮމިޓީން ގަބޫލުކުރާކަމަށެވެ. އަދި އެފަދަ ހަގީގަތެއް ނެތް ތުހުމަތުތަކެއް ސަލީމާމެދު ކުރުމަކީ ހޯރަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީން ނުހަނު ކަންބޮޑުވާކަމެއް ކަމަށްވެސް ފާހަގަކޮށްފައިވެއެވެ.

މި ޚަބަރުތައް ހަރުކަށި އިބާރާތުން ކުށްވެރިކޮށް، އެފަދަ ޚަބަރުތައް ފަތުރާ ފަރާތްތައް ގާނޫނުގެ ކުރިމައްޗަށް ގެނައުމަށް އެ ކޮމިޓީން ވަނީ އެދިފައެވެ. އަދި އެއީ ޒިންމާދާރުކަން ކުޑަ އަމަލުތަކެއް ކަމަށާއި، މި މައްސަލަ ކަނޑައެޅިފައިވާ އުސޫލުތަކާ އެއްގޮތަށް ތަހުގީގުކޮށް، ވީ އެންމެ އަވަހަކަށް ރައްޔިތުންނަށް ހަގީގަތް ހާމަކޮށްދިނުމަށް ކަމާބެހޭ އިދާރާތަކަށް އެ ކޮމިޓީން ވަނީ ގޮވާލާފައެވެ.

ހޯރަފުށީ ދާއިރާގެ މެމްބަރު ސަލީމާ ގުޅޭގޮތުން ހަގީގަތާ ޚިލާފު ވާހަކަތައް ފެތުރުމުން، އެ ދާއިރާއާއި ހއ. އަތޮޅުގެ ރައްޔިތުން ވަނީ އެކަން ކުށްވެރިކޮށްފައެވެ. އަދި ސަލީމަކީ އިތުބާރުހިފޭ ބޭފުޅެއްކަމަށާއި، އޭނާއާމެދު ރައްޔިތުންގެ މެދުގައި ނަފްރަތު އުފެއްދުމަށް މަސައްކަތް ނުކުރުމަށް ކައުންސިލްތަކުންވެސް ވަނީ ގޮވާލާފައެވެ.