ރައީސްގެ ގަރާރާއި ދެކޮޅަށް ޕީޕީއެމުން ހުށަހެޅި މައްސަލަ ވަކީލު ހާޒިރުނުވުމުން ކޯޓުން ބޭރު ކޮށްލައިފި
29 ޖޫން 2022 | ބުދަ 02:15އެ މައްސަލަ ބޭރުކޮށްލާފައިވަނީ ޕީޕީއެމްގެ ވަކީލު ކޯޓަށް ހާޒިރު ނުވުމުން
އިންޑިއާ އައުޓް ކެމްޕެއިންގެ ތެރެއިން
އިދިކޮޅު ކޯލިޝަނުން "އިންޑިއާ އައުޓް" ގެ ނަމުގައި ކުރިއަށްގެންދާ ހަރަކާތްތައް ހުއްޓުވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ނެރުއްވި ގަރާރާ ދެކޮޅަށް ޕީޕީއެމުން ކޯޓަށް ހުށަހެޅި މައްސަލަ ސިވިލް ކޯޓުން ބޭރުކޮށްލައިފިއެވެ.
އެ ކޯޓުން އަންގާރަ ދުވަހު ބުނީ މި މައްސަލައިގެ ފުރަތަމަ އަޑު އެހުން ބާއްވާފައިވަނީ 27 ޖޫން ވަނަ ދުވަހުގެ ހެނދުނު 10:00 ގައި ކަމަށެވެ. ނަމަވެސް ދައުވާ ކުރާ ޕީޕީއެމް ތަމްސީލުކުރަން އައްޔަންކޮށްފައިވާ ދަ ލީގަލް ޗެމްބަރގެ ފަރާތުން ވަކީލު ކޯޓަށް ހާޒިރު ނުވާތީ މައްސަލަ ބޭރު ކުރީ ކަމަށެވެ.
ސިވިލް ކޯޓުން ބުނީ ދަ ލީގަލް ޗެމްބަރގެ ފަރާތުން މުއާމަލާތް ކުރަން ހަމަޖައްސާފައިވާ ވަކީލު ދީފައިވާ އީމެއިލް އެޑްރެހަށް ކޯޓުގެ އަމުރު ފޮނުވި ކަމަށާއި އަމުރާ އެއްގޮތަށް ހާޒިރުނުވުމުން ވަކީލަށް ގުޅުމުން ފޯނަށް ޖަވާބު ނުދޭ ކަމަށެވެ. އެހެންވެ، ހާޒިރު ނުވީ މަޤުބޫލު އުޒުރެއް އޮވެގެންކަން ދައުވާ ކުރާ ފަރާތުން އަންގާފައި ނުވާނަމަ މައްސަލަ ބާތިލު ކޮށްދިނުމަށް އެދި އެޓަރނީ ޖެނެރަލްގެ އޮފީހުން އެދިފައިވާ ކަމަށް ވެސް އެ ކޯޓުން ވަނީ ބުނެފައެވެ.
މަޤުބޫލު އުޒުރެއް ނެތި ކޯޓަށް ހާޒިރުނުވާނަމަ ދައުވާ ބޭރުކޮށްލެވޭނެއެވެ.
އިންޑިޔާއާ މެދު ނަފުރަތު އުފެއްދުމަށް ހިންގާ ހަރަކާތަކީ ޤައުމީ ސަލާމަތަށް ހުރި ނުރައްކަލެއް ކަމުގައި، ޤައުމީ ސަލާމަތާބެހޭ މަޖިލީހުގެ މިއަހަރުގެ 3 ވަނަ ބައްދަލުވުމުގައި ކަނޑައަޅާފައިވާކަން ބަޔާން ކުރައްވައި، ރައީސް އިބްރާހިމް މުޙައްމަދު ސާލިހު ޤަރާރެއް ނެރުއްވީ 21 އޭޕްރީލް 2022 ގައެވެ.
ޕީޕީއެމުން އެ ޤަރާރާ ދެކޮޅަށް ހުށަހެޅި މައްސަލައިގައި ބުނެފައިވަނީ އެއީ ޣައިރު ޤާނޫނީ އަމުރެއް ކަމަށާއި ރައީސް އެ ޤަރާރު ނެރުއްވީ ބާރުތަކާއި މަސްއޫލިއްޔަތުގެ އިމުގެ ބޭރުން ކަމަށެވެ. އަދި މިއީ އަސާސީ ހައްޤު ހަނި ކުރުން ކަމަށް ވެސް ވަނީ ބުނެފައެވެ.
