އުލަމާ ކޮންފަރެންސްގައި ބައިވެރިވުމަށް އިސްލާމިކް މިނިސްޓަރ މެލޭޝިއާ އަށް
27 ޖޫން 2022 | ހޯމަ 10:35މި ކޮންފަރެންސް ކުރިއަށްދާނީ، މެލޭޝިއާގެ ކުއަލަލަމްޕޫރުގައި، މި ހިނގާ ޖޫން މަހުގެ 30 ވަނަ ދުވަހު
އިސްލާމިކް މިނިސްޓަރ ޑރ. އަހުމަދު ޒާހިރު އަލީ
"އުލަމާ ކޮންފަރެންސް”ގައި ބައިވެރިވެވަޑައިގެންނެވުމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ މެލޭޝިއާ އަށް ފުރާވަޑައިގެންފިއެވެ.
ދެކުނު އިރުމަތީ އޭޝިއާގެ ޤައުމުތަކަށް ޚާއްސަކޮށް ބާއްވާ މި ކޮންފަރެންސް ކުރިއަށްދާނީ، މެލޭޝިއާގެ ކުއަލަލަމްޕޫރުގައި، މި ހިނގާ ޖޫން މަހުގެ 30 ވަނަ ދުވަހުއެވެ.
މިއީ ޑިޕާޓްމަންޓް އޮފް އިސްލާމިކް ޑިވެލޮޕްމަންޓް މެލޭޝިޔާ (ޖަކީމް) އާއި މުސްލިމް ވޯލްޑް ލީގުން އިންތިޒާމްކޮށްގެން ބާއްވާ ކޮންފަރެންސްއެކެވެ. މި ކޮންފަރެންސްގައި ބައެއް ގައުމުތަކުގެ މަންދޫބުން ބައިވެރިވެވަޑައިގަތުމަށް ހަމަޖެހިފައިވާ ކަމަށް އިސްލާމިކް މިނިސްްޓްރީން މައުލޫމާތު ދީފައި ވެއެވެ.
މި ކޮންފަރެންސްގެ މަޤްޞަދުގެ ތެރޭގައި އިސްލާމީ އުއްމަތުގެ މެދުގައި އެކުވެރިކަމާއި އެއްބާރުލުން ހަރުދަނާކުރުމުގެ އިތުރުން މުސްލިމް ލީޑަރުންނާއި މުޅި މުޖުތަމަޢުގެ މެދުގައި އެއްބައިވަންތަކަމާއި އިންސާފާއި ހަމަޖެހުމުގެ ތަޞައްވުރަށް ހޭލުންތެރިކަން ފެތުރުން ހިމެނެއެވެ.
މި ކޮންފަރެންސްގައި 17 ޤައުމެއްގެ މުސްލިމް ލީޑަރުންނާއި ފާހަގަކޮށްލެވޭ ބޭފުޅުން ވާހަކަފުޅު ދައްކަވާނެއެވެ.
