7 މިސްކިތެއް ވާނެ ފިނޭންސް މިނިސްޓްރީގައި ޓެންޑަރ މަރުހަލާގައި
އައްޑޫ ސިޓީ އިސްލާމީ މަރުކަޒު އެޅުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
މި ސަރުކާރުން 17 މިސްކިތެއްގެ މަސައްކަތް ނިންމާ ބޭނުންކުރަން ފަށާފައިވާ ކަމަށާއި، އިތުރު 16 މިސްކިތެއްގެ މަސައްކަތް ވަރަށް އަވަހަށް ނިމޭނެ ކަމަށް އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މިނިސްޓަރ ވިދާޅުވީ ކުރީގައި އަޅަމުން އައި މިސްކިތްތަކުގެ ޑިޒައިންތައް ހުންނަނީ ވަކިގޮތަކަށް ކަމަށެވެ. ނަމަވެސް ސަރުކާރުން ހާއްސަ ޑިޒައިންތަކެއް ކުރަހާފައި މިސްކިތްތައް އަޅަމުން ގެންދާ ކަމަށެވެ. އަދި ރައީސް އިބްރާހިމް މުހައްމަދު ޞާލިހުގެ ސަރުކާރުން، މިސްކިތްތަކުގެ ޑިޒައިނަށް ބަދަލުތަކެއް ގެނެސް ކޮންމެ ރަށެއްގައިވެސް، މިސްކިތަކީ އެރަށެއްގައި ހުންނަ އެންމެ ރީތި އެންމެ ފުރިހަމަ އިމާރާތެއްގެ ގޮތަށް ހެދުން އެއީ އަމާޒުކަމުގައި މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސަރުކާރުން ބޭނުންވި އެއްކަމަކީ ރާއްޖެއަށް އަންނަ ތަރައްގީއާ އެއްވަރަށް މިސްކިތްތަކުން އެ ރީތިކަން ފެނިގެން ދިއުން ކަމަށެވެ. އެހެންވެ ވަރަށް ތަފާތު ޑިޒައިންތަކަށް މިސްކިތްތައް އަޅަމުން ގެންދަވާ ކަމަށާއި، ހަމަ އެގޮތަށް އިސްލާމިކް ސެންޓަރުތައް ވެސް މިހާރު ޑިޒައިންކޮށްފައި ހުންނާނީ ކުރިޔާ ވަރަށް ތަފާތުކޮށް ކަމަށެވެ. އިސްލާމިކް ސެންޓަރުތައް ނިމިގެންދާއިރު، ރައްޔިތުންނަށް ފަސޭހަ ކަމާއެކު ބޭނުންކުރެވޭނެ، ތަފާތު ކަންކަމަށް ބޭނުންކުރެވޭނެ ޖާގަ ވެސް ހިމެނިފައި ހުންނާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިސްކިތްތައް ބިނާކުުރުމުގެ ބޮޑު މަސައްކަތްތަކެއް ކުރެވެމުންދާ ކަމަށެވެ. ކުރިއަށް އޮތްތާގައި މިސްކިތްތައް ނިމި ރަށްރަށުގައި ނަމާދުކުރަން ހުރި ދަތިތައް އަދި މީހުންނަށް ދިމާވެފައި ހުރި އުނދަގޫތަކަށް ހައްލެއް ލިބިގެންދާނެކަމަށް ގަބޫލުކުރައްވާ ކަމަށެވެ.
