ޤައުމީ ވޮލީބޯޅަ ލީގުގައި ސްޕޯޓްސް ކުލަބް ސިޓީ އަތުން ބަލިވި ނަމަވެސް މެޗުގައި ކުޅުންތެރިން ދެއްކި ކުޅުމާމެދު ހިތްހަމަ ޖެހޭ ކަމަށް ޕޮލިސް ކުލަބުގެ ކޯޗު ފަތުހުﷲ ވަހީދު (ފައްލޯ) ބުނެފިއެވެ.

ލީގުގައި އާދިއްތަ ދުވަހުގެ ރޭ ޕޮލިސް ވަނީ ސިޓީ އަތުން ސީދާ ތިން ސެޓުން ބަލިވެފައެވެ. މެޗުގައި ޕޮލިސް ޓީމަށް ސެޓުތައް ގެއްލިފައިވަނީ އެ ޓީމަށް ހެދުނު ގޯސްތަކެއްގެ ސަބަބުންނެވެ.

މެޗަށްފަހު ފައްލޯ ބުނީ ޖުމުލަކޮށް މެޗު ދިޔަ ގޮތް ވަރަށް ރަނގަޅުކަމަށެވެ. އޭގެ މާނައަކީ މީގެ ކުރިން އެ ޓީމުން ރަނގަޅުކޮށްފައި ހުރި ކަންކަން، އެ މެޗުގައި ރަނގަޅަށް ޕާފޯމްކުރެވުން ކަމަށް ފައްލޯ ބުންޏެވެ. ފައްލޯ ބުނީ މެޗުގައި ސިޓީ ޓީމުގެ މޯޓިވޭޝަން ތަންކޮޅެއް ހައިކަމަށެވެ. ސަބަބަކީ އެ ޓީމަކީ ދާދި ފަހުން ނިމުނު އެސޯސިއޭޝަން ކަޕްގެ ޗެމްޕިއަނުންނަށްވުން ކަމަށް ވެސް ފައްލޯ ބުންޏެވެ.

މީގެ އިތުރުން ފައްލޯ ބުނީ މީގެ ކުރިން ހެދުނު ގޯސްތައް ރަނގަޅު ކުރެވެމުން އަންނަކަމަށާއި، ސިޓީގެ މެޗުގައި ހެދުނު ގޯސްތައް ވެސް ރަނގަޅު ކުރާނެ ކަމަށެވެ.

މީގެ އިތުރުން ފައްލޯ ބުނީ ޕޮލިސް ޓީމުގައި އޮތީ ޒުވާން ކުޅުންތެރިން ހިމެނޭ ޓީމެއް ކަމަށެވެ. ޓީމުގައި ހިމެނޭ ޒުވާން ކުޅުންތެރިން ދައްކާ ކުޅުމާމެދު ހިތް ހަމަ ޖެހޭ ކަމަށް ފައްލޯ ބުންޏެވެ. އެސޯސިއޭޝަން ކަޕްގައި ވެސް ޕޮލިސް ޓީމުގެ ޒުވާން ކުޅުންތެރިންގެ ފަރާތުން ވަނީ މޮޅު ކުޅުމެއް ފެނިފައެވެ. އެ ޓީމުގައި ހިމެނޭ މާއިޝް އަހުމަދާއި ހައިލަމް ހަސަން އަންނަނީ ތަފާތު މޮޅު ކުޅުމެއް ދައްކަމުންނެވެ.

ސިޓީ އަތުން ބަލިވި މެޗުގައި ވެސް މި ދެ ކުޅުންތެރިން ވަނީ ރަނގަޅު ކުޅުމެއް ދައްކާފައެވެ. މީގެ އިތުރުން އެ ޓީމުގައި ހިމެނޭ ޒުވާން ކުޅުންތެރިޔާ އަހުމަދު ނާފިޔު ވެސް މުބާާރާތުގައި ކުޅެއެވެ.