1443 ވަނަ އަހަރު ރާއްޖެއިން ހައްޖަށްދާ ހައްޖުވެރިން ފުރަން ފަށައިފި
ފުރަތަމަ ގްރޫޕުގައި 157 ހައްޖާޖީން ހިމެނޭ
ހައްޖަށްދާ މީހުން
1443 ވަނަ އަހަރު ރާއްޖެއިން ހައްޖަށްދާ ހައްޖުވެރިންގެ ފުރަތަމަ ގްރޫޕް ފުރައިފިއެވެ.
ފުރަތަމަ ގްރޫޕުގައި 157 ހައްޖުވެރިން ފުރާފައިވާކަމަށް އިސްލާމިކް މިނިސްޓްރީން މައުލޫމާތުދެއެވެ. ރާއްޖެއިން ހައްޖަށްދާ ހައްޖުވެރިންނަށް ޖިއްދާގެ އެއަރޕޯޓުން މަރުހަބާ ދަންނަވާ، އެހެނިހެން އެހީތެރިކަން ފޯރުކޮށްދެއްވުމަށް ރާއްޖޭގެ ހައްޖު މިޝަންއާއި ސައޫދީގެ ކޮންސުލޭޓުން ވަޑައިގަންނަވާނެއެވެ.
ހައްޖުވެރިންނަށް ފަސޭހަކަމާއެކު އެއަރޕޯޓަށް ދިއުމުގެ އިންތިޒާމު ކަމާގުޅޭ މުއައްސަސާތަކާއެކު، ސަރުކާރުން ވަނީ ހަމަޖައްސާފައެވެ. މިގޮތުން އެމްޓީސީސީން ވަނީ ހައްޖުވެރިންނަށް ޚާއްސަ ބަސް ދަތުރުތަކެއް ބާއްވާފައެވެ.
ހައްޖުވެރިން ފަސޭހަކޮށްދިނުމުގެ ގޮތުން އެ ފަރާތްތައް ދިރިއުޅޭ ސަރަހައްދުތަކާ ކައިރިން ވަނީ ޚާއްސަ ޕޮއިންޓްތަކެއް ކަނޑައަޅާ އެއަރޕޯޓަށް ދިޔުމަށް ބަހުގެ ޚިދުމަތްދީފައެވެ. މިގޮތުން މާލޭގައި 21 ބަސް ސްޓޮޕް، ހުޅުމާލެ ފޭސް 1 ގައި 4 ބަސް ސްޓޮޕް، ހުޅުމާލެ ފޭސް 2 ގައި 1 ބަސް ސްޓޮޕް ހުންނާނެއެވެ.
ރާއްޖެއިން ހައްޖަށް ދާ ފުރަތަމަ ގްރޫޕް ފުރާފައިވާއިރު، ދެވަނަ ގްރޫޕް ފުރާނީ މިމަހުގެ 29 ވަނަ ދުވަހުއެވެ. އަދި ތިންވަނަ ގްރޫޕް އަންނަ ޖުލައި މަހުގެ 2 ވަނަ ދުވަހު ފުރާނެއެވެ.
