ރެއާލް މެޑްރިޑްގެ ސްޓްރައިކަރ މަރިއާނޯ ޑިއާޒް، ކްލަބު ދޫކޮށްލަން ބޭނުންވާކަން ރެއާލްއަށް އަންގައިފިއެވެ.
ޑިއާޒް ކްލަބު ދޫކޮށްލަން ބޭނުންވާކަން އަންގާފައިވާއިރު، މިފަހުން އޭނާއަށް މެޗުތަކުގައި ކުޅުމުގެ ފުރުސަތެއް ނުލިބެއެވެ. ފާއިތުވި ހަތަރު ސީޒަންގައި އޭނާ ވަނީ ރެއާލްއަށް 59 މެޗު ކުޅެދީ ހަތް ލަނޑު ޖަހާފައެވެ. ނަމަވެސް 21 މިލިއަން ޔޫރޯ ޚަރަދުކޮށްފައި ރެއާލްއަށް ގެންދިޔަ ޑިއާޒްގެ ފަރާތުން އެދެވޭ ކުޅުމެއް މިހާތަނަށް ފެނިފައެއް ނުވެއެވެ.
އަނިޔާގެ ސަބަބުން އޭނާ ވަނީ ގިނަ ދުވަހު ކުޅުމާ ދުރުގައި މަޑުކުރަންޖެހިފައެވެ. އެހެންކަމުން މީގެ ކުރިން ރެއާލްއިން ވަނީ މިހާރު އޭނާއަށް ލިބޭވަރަށްވުރެ ބޮޑު މުސާރައަކަށް ރަޔޯ ވައެކާނޯއަށް ޑިއާޒް ވިއްކާލަން މަސައްކަތް ކޮށްފައެވެ. ނަމަވެސް ޑިއާޒް އޭރު ބޭނުންވީ ރެއާލްގައި މަޑުކުރާށެވެ.
ރެއާލް ދޫކޮށްލުމަށް ޑިއާޒް މަސައްކަތް ކުރަމުން އަންނައިރު، އެޓީމާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުއެވެ. ނަމަވެސް ޑިއާޒް މަސައްކަތް ކުރަމުން އަންނަނީ އޭނާ ކުރިން ކުޅުނު ލިޔޯންއަށް ބަދަލުވާންކަމަށް ރިޕޯޓުތައް ބުނެއެވެ.
