ކުޅުންތެރިން ހޯދުމަށް އެންމެ ބޮޑު ޚަރަދެއްކުރީ ޕްރިމިއަރ ލީގު ކްލަބުތަކުން

ކުރިއަށް އޮތް ސީޒަނަށް ތައްޔާރުވުމުގެ ގޮތުން ކުޅުންތެރިން ހޯދުމަށް އެންމެ ބޮޑު ޚަރަދެއް މިހާތަނަށް ކޮށްފައިވަނީ ޕްރިމިއަރ ލީގުންކަމަށް ތަފާސްހިސާބުތަކުން ދައްކައިފިއެވެ.

މިދިޔަ ސީޒަން ނިމި މަހެއް ނުވަނީސް ޔޫރަޕުގެ ކްލަބުތަކުން އަންނަނީ ކުޅުންތެރިން ހޯދުމަށް ބޮޑު ޚަރަދެއް ކުރަމުންނެވެ. މި ކްލަބުތަކުން ވަނީ މިހާތަނަށް ކުޅުންތެރިން ހޯދުމަށް 1,208.5 ބިލިއަން ޔޫރޯ ޚަރަދުކޮށްފައިކަމަށް ރިޕޯޓުތައް ބުނެއެވެ. މި ހިސާބުތައް ދައްކާ ގޮތުން ޔޫރަޕުގެ ގަދަ ފަސް ލީގުގެ ގެތެރެއިން އެންމެ ބޮޑު ޚަރަދެއް ކޮށްފައިވަނީ، މާލީ ގޮތުން ތަނަވަސް، އިނގިރޭސި ޕްރިމިއަރ ލީގުގެ ކްލަބުތަކުންނެވެ. ޕްރިމިއަރ ލީގުގެ ކްލަބުތަކުން ވަނީ 448.99 މިލިއަން ޔޫރޯ މިހާތަނަށް ޚަރަދުކޮށްފައެވެ.

މި ޓްރާންސްފަރ މާރކެޓުގައި ދެވަނައަށް އެންމެ ބޮޑު ޚަރަދެއް ކޮށްފައިވަނީ އިޓާލިއަން ލީގުގެ ކްލަބުތަކުންނެވެ. މި ކްލަބުތަކުން ވަނީ 284.4 މިލިއަން ޔޫރޯ ޚަރަދުކޮށްފައެވެ. މީގެ އިތުރުން ބުންޑެސްލީގާގެ ކްލަބުތަކުން 218.7 މިލިއަން ޔޫރޯ ޚަރަދުކޮށްފައިވާއިރު، ލަލީގާގެ ކްލަބުތަކުން 141.80 މިލިއަން ޔޫރޯ އަދި ފްރާންސް ލީގުގެ ކްލަބުތަކުން 115.2 މިލިއަން ޔޫރޯ ޚަރަދުކޮށްފައިވެއެވެ.

ޓްރާންސްފަރ މާރކެޓުގެ މިހާތަނަށް އެކި ކްލަބުތަކުން ވަނީ އެކުޖުމްލަ 122 ކުޅުންތެރިންގެ ސޮއި ހޯދާފައެވެ.

މިދިޔަ ސަމަރ ޓްރާންސްފަރގައި އިނގިރޭސި ކްލަބުތަކުން ކުޅުންތެރިން ހޯދުމަށް 1.3 ބިލިއަން ޔޫރޯ ޚަރަދުކުރިއެވެ. ރިޕޯޓުތައް ބުނާގޮތުން މިފަހަރުގެ ޓްރާންސްފަރ މާރކެޓުގައިވެސް މިއަދަދަށް އިނގިރޭސި ޓީމުތަކުން ޚަރަދުކުރުން އެކަށީގެންވެއެވެ.

ޖުމްލަކޮށް ބަލާނަމަ އިނގިރޭސި ކްލަބުތަކުން ބޮޑު ޚަރަދެއް ކުރިނަމަވެސް އެއް ކުޅުންތެރިއަކު ހޯދުމަށް މިހާތަނަށް އެންމެ ބޮޑު ޚަރަދެއް ކޮށްފައިވަނީ ސްޕެއިންގެ ރެއާލް މެޑްރިޑުންނެވެ. ރެއާލްއިން ވަނީ އޮޣޭލިއަން ޗުއަމެނީ ހޯދުމަށް 80 މިލިއަން ޔޫރޯ މޮނާކޯއަށް ޚަރަދުކޮށްފައެވެ.