މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ 32 ވަނަ އަހަރީ އާއްމު ޖަލްސާ ބާއްވައިފިއެވެ.

ބުރާސްފަތި ދުވަހު މި ޖަލްސާ ބާއްވާފައިވަނީ ކުރުނބާ މޯލްޑިވްސްގައެވެ. މި ޖަލްސާގައި މަޓީގެ މެމްބަރުންގެ އިތުރުން ޓޫރިޒަމް މިނިސްޓަރ ޑރ. އަބްދުﷲ މައުސޫމާއި މިނިސްޓަރ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާއާއި އިކޮނޮމިކް މިނިސްޓަރ ފައްޔާޒު އިސްމާއީލާއި އެމްއެމްޕީއާރުސީގެ މެނޭޖިން ޑިރެކްޓަރ ތޮއްޔިބު މުހައްމަދު ބައިވެރިވެވަޑައިގެންނެވިއެވެ.

މިއަހަރުގެ އަހަރީީ އާއްމު ޖަލްސާގައި މިހާތަނަށް މަޓީން ފަތުރުވެރިކަމުގެ ދާއިރާއަށް ދީފައިވާ އެއްބާރުލުމާއި ރާއްޖޭގެ ފަތުރުވެރިކަމުގެ 50 އަހަރު ފުރުން ފާހަގަކުރުމަށް ކުރަމުން އަންނަ މަސައްކަތްތައް ދައްކުވައިދޭ ވީޑިއޯ ޕްރެޒެންޓޭޝަނެއް ވެސް ވަނީ ދައްކާލާފައެވެ. އެގޮތުން ފަތުރުވެރިކަމުގެ ރަން އަހަރާ ގުޅުވައިގެން، މަޓީގެ ސްކޮލަޝިޕް ޕާޓްނަރޝިޕްތަކާއި ކޮފީ ޓެބްލަ ފޮތްތަކާއި ޕަރލޭ މޯލްޑިވްސްއާއެކު ކުރަމުން އަންނަ މަސައްކަތްތަކުގެ މައުލޫމާތު ވަނީ ހިއްސާ ކޮށްފައެވެ.

މިއަހަރުގެ އަހަރީ އާއްމު ޖަލްސާގައި މަޓީގެ ބޯޑުގައި މިހާރު ތިބި 14 މެމްބަރުންގެ އިތުރަށް 3 މެމްބަރުން ވަނީ ބޯޑަށް އައްޔަން ކޮށްފައެވެ. އިތުރަށް ނެގި މެމްބަރުންގެ ތެރޭގައި މޯލްޑިވްސް އެއަރޕޯޓްސް އޮތޯރިޓީގެ މެނޭޖިން ޑިރެކްޓަރ މަހުޖޫބް ޝުޖާއުއާއި ބޭރުގެ ދެ ފަރާތެއް ހިމެނެއެވެ.

މަޓީގެ ބޯޑު މެމްބަރުން

މަޓީން ބުނީ ރާއްޖޭގެ ޓޫރިޒަމް މިހާރު ކުރިއަށްދަނީ ރަނގަޅަށް ކަމަށާއި، ހާލަތު ވެސް ރަނގަޅުވަމުން ދާކަމަށެވެ. އަދި ފަތުރުވެރިކަމުގެ މައްޗަށް މުޅި ގައުމު ބަރޯސާވެފައިވާއިރު، އޭގެ ސަބަބުން ދިވެހިންނަށް ފައިދާވާނެ ކަމަށް އުއްމީދުކުރާ ކަމަށްވެސް އެ ޖަމްއިއްޔާއިން ބުނެއެވެ.