ހއ.ދިއްދޫ ބަނދަރު ތަރައްޤީ ކުރުމާއި ޖެޓީހެދުމުގެ މަޝްރޫޢޫގެ މަސައްކަތްތަށް ހަލުވިކަމާއިއެކު ކުރިއަށްދާކަމަށް މި މަޝްރޫޢޫއާއި ހަވަޅުވެފައިވާ ކުންފުނި، މޯލްޑިވްސް ޓްރާންސްޕޯރޓް އެންޑް ކޮންޓްރެކްޓީންގ ކޮމްޕެނީ(އެމްޓީސީސީ)އިން ހާމަކޮށްފިއެވެ.
އެމްޓީސީސީ އިން މައުލޫމާތުދޭގޮތުގައި މިމަޝްރޫޢުގެ ދަށުން، އެއްގަމުތޮށި ލުމަށް ބޭނުންވާ ކޮންކްރީޓް ގަލުގެ ދެވަނަ ޝިޕްމަންޓް ވަނީ 23 ޖޫން 2022 ވަނަ ދުވަހު ޕްރޮޖެކްޓް ސައިޓަށް ގެންދެވިފައިއެވެ. އަދި މިހާރު ކުރިއަށް ދަނީ ގައު އެތުރުމުގެ މަސައްކަތްކަމަވެސް އެ ކުންފުނިން މައުލޫމާތުދެއެވެ.
މި މަޝްރޫޢުގެ ދަށުން، 78،000 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 616 މީޓަރުގެ ސަރަޙައްދެއްގައި ބޭރުތޮށި ލުމާއި، 185 މީޓަރުގެ ސަރަޙައްދެއްގައި ރިވެޓްމެންޓް ޖެހުމުގެ މަސައްކަތް ހިމެނޭއެވެ. އަދި 326 މީޓަރުގެ ސަރަޙައްދެއްގައި އެއްގަމުތޮށި ލުމާއި، 4320 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމުގެ އިތުރުން ބަނދަރު ބައްތި ހަރުކުރުމުގެ މަސައްކަތް ހިމެނެއެވެ.
ދިއްދޫ ބަނދަރު ތަރައްޤީ ކުރުމާއި ޖެޓީހެދުމުގެ މި މަޝްރޫޢަކީ 69.8 މިލިއަން ރުފިޔާގެ މަޝްރޫއެއްކަމަށް އެމްޓީސީސީ އިން މައުލޫމާތުދެއެވެ.
