ޔޯގާ ހަދަން ތިބި މީހުންނަށް ހަމަލާދިން މައްސަލަ: 4 މީހަކަށް 2 މަސް، 2 މީހަކަށް 5 ދުވަސް ބަންދުގައި ބަހައްޓަން މުއްދަތު ދީފި

އަންގާރަ ދުވަހުގެ ހެނދުނު ގަލޮޅު ރަސްމީ ދަނޑުގައި، ބައިނަލްއަގުވާމީ ޔޯގާ ދުވަސް ފާހަގަކުރުމަށް ބޭއްވި ހަރަކާތުގައި ބައިވެރިވި މީހުންނަށް ހަމަލާދީ ހަމަނުޖެހުން އުފެއްދުމަށް މަސައްކަތް ކުރި މީހުންގެ ތެރެއިން ފުލުހުންގެ ބެލުމުގެ ދަށަށް ގެންދިޔަ 6 މީހެއްގެ ބަންދުގެ މުއްދަތު ޖަހައިފިއެވެ.

ފުލުހުންގެ ބެލުމުގެ ދަށަށް ގެންދިޔަ 6 މީހުންގެ ތެރެއިން 4 މީހެއްގެ ބަންދަށް 60 ދުވަސް ވަނީ ޖަހާފައެވެ. އަދި 2 މީހެއްގެ ބަންދަށް 5 ދުވަސް ކްރިމިނަލް ކޯޓުން ވަނީ ޖަހާފައެވެ. މި މައްސަލައާ ގުޅިގެން ހައްޔަރުކޮށްފައިވަނީ ކ. ތުލުސްދޫ، ވީނަސް، މުޙައްމަދު ނަދީމް (43އ) އާއި ކ. މާލެ، މއ. ކަނުހުރާ، މުޙައްމަދު ޛިލްޔަން (37އ) އާއި ކ. މާލެ، ދަފްތަރު ނަންބަރު ދރ 1105، ޝާމީ ރަޝާދު އިދްރީސް (30އ) އާއި ތ. މަޑިފުށި، ހެޕީސައިޑް، މުޙައްމަދު މަޢުޞޫމް (40އ) އާއި ހއ. ތުރާކުނު، ގްރީންހައުސް، މުޙައްމަދު ޙުސައިން (47އ) އަދި ގދ. ރަތަފަންދޫ، ލިލީޕާރކް، އަމީން އަޙްމަދު (35އ) އެވެ.

އެ މީހުންގެ ތެރެއިން 60 ދުވަހަށް ބަންދުކުރުމަށް އަމުރުކޮށްފައިވަނީ މުޙައްމަދު ނަދީމާއި މުޙައްމަދު މަޢުޞޫމާއި މުޙައްމަދު ޙުސައިންގެ އިތުރުން އަމީން އަޙްމަދެވެ. ފަސް ދުވަހަށް ބަންދުކުރުމަށް އަމުރުކޮށްފައިވަނީ މުޙައްމަދު ޛިލްޔަން އާއި ޝާމީ ރަޝާދު އިދްރީސްއެވެ.

މި މައްސަލަ ސީރިއަސް މައްސަލައެއްގެ ގޮތުގައި ދިވެހި ފުލުހުންގެ ހިދުމަތުގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ދަނީ ތަހުގީގު ކުރަމުންނެވެ. މި ހާދިސާއާ ގުޅޭ މައުލޫމާތާއި ފޮޓޯ އަދި ވީޑިއޯ އެއްކުރުމަށް އޮންލައިން ޕޯޓަލްއެއް ވަނީ ގާއިމް ކޮށްފައެވެ. މިފަދަ މައުލޫމާތުތައް https://www.police.gov.mv/helpus/casetipއަށް ޒިޔާރަތްކޮށް ހިއްސާކުރުމަށް ފުލުހުން ވަނީ އެދިފައެވެ. އަދި މި ޕޯޓަލްއަށް މައުލޫމާތާއި ފޮޓޯ އަދި ވީޑިއޯ ހިއްސާކުރާ ފަރާތްތަކުގެ ސިއްރުކަން ހިފަހައްޓާނެކަމުގެ ޔަގީންކަން ފުލުހުން ވަނީ ދީފައެވެ.

އެކި ގައުމުތަކުން ރާއްޖެއަށް ކަނޑައަޅުއްވާފައި ތިއްބެވި ސަފީރުންނާއި، ސަރުކާރުގެ އިސް ފަރާތްތަކާއި، އާންމުންނާއި، އުމުރުން ދޮށީ މީހުންނާއި ކުޑަކުދިން ތިއްބައި، ގިނަ އަދަދެއްގެ ބަޔަކު އެތަނަށް ވަދެ އެތާ ތިބި މީހުންނަށް ވަނީ ހަމަލާދީ އަނިޔާވެރިވުމަށް ގޮވާލާފައެވެ. މި ހާދިސާގައި އެތަނުގައި ތިބި މީހުންނަށް އެކިވަރުގެ އަނިޔާވެފައިވެއެވެ.

އިންޓަރނޭޝަނަލް ޔޯގާ ޑޭ ފާހަގަ ކުރުމުގެ ގޮތުން ގަލޮޅު ދަނޑުގައި ހިންގި ހަމަނުޖެހުމުގައި ބޭނުންކުރި އާލަތްތައް ނެރެފައިވަނީ ޕީޕީއެމް އޮފީހުން ކަމަށް ދިވެހި ފުލުހުންގެ ޚިދުމަތުން ވަނީ ބުނެފައެވެ. އެކަމާ ގުޅޭގޮތުން ފުލުހުން ނެރުނު ބަޔާނެއްގައި ބުނީ، ޔޯގާ ޑޭ ޙަރަކާތަށް ހުރަސް އަޅައި، އެ ޙަރަކާތުގައި ބައިވެރިވި ބޭރު ޤައުމުތަކުގެ ސަފީރުންނާއި ޑިޕްލޮމެޓުންގެ އިތުރުން އާންމުންގެ މީހުންނާ ދެކޮޅަށް ބިރުވެރިކަން އުފެދޭ ގޮތަށް އެތަނަށް ބަޔަކު ވަދެ ބައެއް މީހުންނަށްވެސް ޙަމަލާ ދީފައިވާ ކަމަށެވެ.

ހަމައެއާއެކު، ބައެއް ތަކެއްޗަށްވެސް ގެއްލުން ދީފައިވާއިރު، އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާކަމަށް ފުލުހުން ބުނެއެވެ. އަދި އެ އަމަލު ހިންގުމުގައި ބައިވެރިވި މީހުންގެ މައްސަލަ ތަހުގީގުކޮށް، ޤާނޫނީ ފިޔަވަޅު އެޅުމަށް ކުރަންޖެހޭ މަސައްކަތްތައް ދިވެހި ފުލުހުންގެ ޚިދުމަތުން ކުރަމުންދާކަންވެސް ވަނީ ފާހަގަކޮށްފައެވެ.

ފުލުހުން ބުނެފައިވާ ގޮތުގައި މި އަމަލު ހިންގި މީހުން ބޭނުން ކޮށްފައިވާ ބައެއް އާލަތްތައް ނެރެފައިވަނީ ޕީޕީއެމްގެ އޮފީހުންކަން މިހާތަނަށް ލިބިފައިވާ މައުލޫމާތުތަކުން އެނގޭ ކަމަށެވެ. އޭގެ އިތުރުން، މި ޙާދިސާ ހިނގަން މެދުވެރިވި ސަބަބުތައް ބަލައި، ދިވެހި ފުލުހުންގެ ޚިދުމަތުން ރެސްޕޮންޑް ކުރި ގޮތުގެ އިންޓަރނަލް ރިވިއުއެއް ކުރާނެ ކަމުގެ ޔަޤީންކަންވެސް ފުލުހުން ވަނީ ދީފައެވެ.

ހަމަލާދިން މީހުން ބޭނުންކުރި ދިދަތަކަކީ ޕީޕީއެމުން ކާނިވަލުގައި ބޭއްވި ސިޔާސީ ޖަލްސާއެއްގައި ބޭނުންކުރި ދިދތަކެއް ކަމަށް މިހާތަނަށް އެނގިފައިވެއެވެ. އަދި އެ ދިދަތަކާއި ޔޯގާ ހަރަކާތުގައި ބައިވެރި މީހުންނާ ދެކޮޅަށް އަޑު އުފުލުމަށް ސައުންޑު، ޕީޕީއެމް އޮފީހުން ނެރޭ ފޮޓޯތައް ވަނީ އާންމުވެފައެވެ. ޕީޕީއެމުން ވަނީ ދިދަތައް ދިނުން އެއީ މައްސަލައެއް ނޫން ކަމަށް ވެސް ބުނެފައެވެ.

މި މައްސަލަ ބައިނަލްއަގުވާމީ ނޫސްތަކަށް ވެސް ވަނީ އަރާފައެވެ. މި މައްސަލަ ސަރުކާރުން ވަނީ ކުށްވެރިކޮށްފައެވެ. އަދި މި މައްސަލަ ބެލުމަށް ރައީސުލްޖުމްހޫރިއްޔާ ވަނީ ވަޒީރުންގެ މަޖިލީހުގައި ސަބް ކޮމިޓީއެއް އުފައްދަވާފައެވެ.