"މިސާލަކަށް" ދިދަތައް ދިނުމަކީ މައްސަލައެއް ނޫން - ޕީޕީއެމް
21 ޖޫން 2022 | އަންގާރަ 15:35ދިދަ ދިނުމަކީ ވިޔާނުދާ ކަންތައްތައް ކުރަން އެހީތެރިވުމެއް ނޫން
އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުއްރަހީމް އަބްދުﷲ ވާހަކަ ދައްކަވަނީ
ގަލޮޅު ދަނޑުކައިރިއަށް ދިޔަ ބަޔަކު ގެންދިޔަ ދިދަ އެއީ "މިސާލަކަށް" ޕީޕީއެމްގެ އެއްޗަކަށް ވިޔަސް އެއީކީ މައްސަލައެއް ނޫން ކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އަދުރޭ ވިދާޅުވީ ދިދަ ދިނުމަކީ ވިޔާނުދާ ކަންތައްތައް ކުރަން އެހީތެރިވުން ނޫން ކަމަށާއި ދިދަ އަކީ ހަތިޔާރެއް ނޫން ކަމަށް އަދުރޭ ވިދާޅުވިއެވެ. މިއަދާ ހަމައަށް ވެސް މިކަން ކޮށްފައިވާނެ ކަމަށާއި ކުރިއަތް އޮތްތާނގައި ވެސް މިކަން ކުރާނެ ކަމަށް ވެސް ވިދާޅުވިއެވެ.
ޕީޕީއެމް ބަދުނަމާވާ ގޮތަށް ފުލުހުން ބަޔާން ނެރެފައިވާ ކަމަށާއި އެ ހަމަނެޖުހުމާއި ޕީޕީއެމް އާއި ގުޅުވަން ފުލުހުން މަސައްކަތް ކޮށްފައިވާ ކަމަށް ވެސް އަދުރޭ ވިދާޅުވިއެވެ. އަދުރޭ ވިދާޅުވީ އިދިކޮޅުން އަދިވެސް އިންޑިއާ އައުޓް ހަރަކާތް ހިންގާނެ ކަމަށެވެ. އަދި މިކަން މިގޮތަށް ހިނގައި ދިޔުމަކީ އިންޑިއާ އައުޓް ހަރަކާތް ނުހިންގަންވީ ސަބަބެއް ނޫން ކަމަށް ވިދާޅުވިއެވެ.
ބައިނަލްއަގުވާމީ ޔޯގާ ޑޭ ފާހަގަކުރުމަށް ގަލޮޅު ރަސްމީ ދަނޑުގައި ޔޯގާ ހަދަން ތިބި މީހުންނަށް ހަމަލާދިން މީހުން ބޭނުންކުރި ހުދު ކުލައިގެ ދިދަ ނެރުނީ ޕީޕީއެމް އޮފީހުންކަން ވަނީ ހާމަވެފައެވެ. ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި ބޭއްވި ހަރަކާތް ހުއްޓުވުމަށް ހަމަނުޖެހުން ހިންގި މީހުން ބޭނުންކުރި ބައެއް އާލާތްތައް ނެރެފައިވަނީ ޕީޕީއެމް އޮފީހުންކަމަށް ފުލުހުންވެސް ވަނީ ބުނެފައެވެ.
ސޯޝަލް މީޑިއާގައި އާންމުވެފައި ފޮޓޯތަކުން ފެންނަ ގޮތުން، ހުދުކުލައިގެ ދިދަތަކެއް ޕީޕިއެމްގެ އޮފީހުގައި ތައްޔާރުކޮށްފައި ހުއްޓެވެ. އަދި ގަލޮޅުދަނޑާ ދިމާލަށް ޕިކަޕްގައި ދިޔަ މީހުން ބޭނުންކުރާނެ ސައުންޑް ސިސްޓަމް ވެސް އެ އޮފީހުން ފޯރުކޮށްދީފައިވާކަމަށް މައުލޫމާތު ލިބެއެވެ.
ފޮޓޯތަކުން ފެންނަ ގޮތުގައި ޕީޕީމްގެ ރަސްމީ އޮފީސް ހުންނަ ހ. ހުރަފާއިން ދިދައާއި ސައުންޑް ނެރެން 3 މީހަކު ހަރަކާތްތެރިވާ އިރު، އެތަނުގައި ޕީޕީއެމްގެ އިސްސަފުގައި ހަރަކާތްތެރިވާ ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއިލް ހުންނެވިތަން ފެނެއެވެ. އަދި އެ ދިދަތައް އަތަށް ނަންގަވައިގެން އޮފީހުން ބޭރަށް ގެންދެވީ ވެސް އޭނާއެވެ.
ފޮޓޯއިން އިން ފެންނަ ގޮތުން ދިދަތައް އަދި ސައުންޑް ޕީޕީއެމް އޮފީހުން ނެރުނީ ފަތިހު 5:05 ގައެވެ. އަދި ހެނދުނު ޔޯގާ އިވެންޓަށް ވަދެގަނެ އެތަނުގައި ތިބި މީހުންނަށް ދިދަ ދަނޑިންނާއި، އެކި ގޮތްގޮތުން ހަމަލާދީފައިވާ އިރު، އެތަނަށް ވަތް މީހުންގެ އަތުގައި ހުރި ދިދަތަކަކީ ނަބިއްޔާގެ ދިފާއުގައި މި ނަމުގައި ޕީޕީއެމުން ބޭއްވި ޖަލްސާގައި ބޭނުންކުރި ދިދަތަކެވެ.
