އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ހަރަކާތުގެ ތެރެއިން ހިންގި ހަމަނުޖެހުމުގައި ސިޔާސީ ޕާޓީއެއްގެ ބައިވެރިވުން އޮތް ކަމަށް ފުލުހުންގެ ތަހުޤީޤުން ސާބިތުވެއްޖެނަމަ ބޮޑު އަދަދަކުން އެ ޕާޓީއެއް ޖޫރިމަނާ ކުރާނެ ކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަނުން ނެރުނު ނޫސްބަޔާނެއްގައި ބުނެފައިވަނީ އެ ޕާޓީއަކާ މެދު ސިޔާސީ ޕާޓީގެ ޤާނޫނުގެ 45 ވަނަ މާއްދާއަށް ރިޔާއަތްކޮށް އެ ޤާނޫނުގެ 49 ވަނަ މާއްދާގެ ދަށުން ފިޔަވަޅު އަޅާނެ ކަމަށެވެ. މި މާއްދާގައިވާ ގޮތުން އެ ޕާޓީއެއް 35000 ރުފިޔާ އާއި 75000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމުގެ ބާރު އެ ކޮމިޝަނަށް ލިބިގެންވެއެވެ.

އިލެކްޝަންސް ކޮމިޝަނުން ބުނީ މި ޔޯގާ ހަރަކާތަށް ހުރަސް އަަޅައި، އެ ހަރަކާތުގައި ބައިވެރިވި ބޭރުގެ ޤައުމުތަކުގެ ސަފީރުންނާއި ޑިޕްލޮމެޓުން އަދި އާންމުންނާއި ދެކޮޅަށް ބިރުވެރިކަން އުފެދޭ ގޮތަށް އެތަނަށް ބަޔަކު ވަދެގަނެ ހަމަނުޖެހުން ހިންގައި ބައެއް މީހުންނަށް ހަމަލާދީ އަދި ތަކެއްޗަށް ގެއްލުންދީފައިވާތީ މި ނާތަހުޒީބު އަމަލު ކުށްވެރި ކުރާ ކަމަށެވެ.

އިލެކްޝަންސް ކޮމިޝަނުން މިހެން ބުނެފައިވާއިރު ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި ބޭއްވި ހަރަކާތް ހުއްޓުވުމަށް ހަމަނުޖެހުން ހިންގި މީހުން ބޭނުންކުރި ބައެއް އާލާތްތައް ނެރެފައިވަނީ ޕީޕީއެމް އޮފީހުންކަމަށް ފުލުހުން ވަނީ ބުނެފައެވެ.

ގަލޮޅު ދަނޑުގައި ކުރިއަށްގެންދިޔަ މި ހަރަކާތަށް ހުރަސްއަޅައި، އެ ހަރަކާތުގައި ބައިވެރިވި ބޭރު ގައުމުތަކުގެ ސަފީރުންނާއި ޑިޕްލޮމެޓުންނާއި އާންމުންނާ ދެކޮޅަށް، ބިރުވެރިކަން އުފެދޭ ގޮތަށް އެތަނަށް ބަޔަކު ވަދެގަނެ، ބައެއް މީހުންނަށް ހަމަލާދީ، ތަކެއްޗަށް ގެއްލުންދީފައިވާ މައްސަލަ ސީރިއަސް މައްސަލައެއްގެ ގޮތުގައި ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން ތަހުގީގުކުރަމުންދާކަމަށެވެ.

މި ހާދިސާ ހިންގުމަށް މެދުވެރިވި ސަބަބުތައް ބަލައި ފުލުހުން ރެސްޕޮންޑުކުރިގޮތުގެ އިންޓަރނަލް ރިވިއުއެއް ކުރާނެކަމުގެ ޔަގީންކަންދޭކަމަށް ވެސް ފުލުހުން ބުނެއެވެ.

މީގެ އިތުރުން ފުލުހުން ވަނީ، އެ ހާދިސާއާގުޅޭ މައުލޫމާތާއި ފޮޓޯއާއި ވީޑިއޯ ފޮނުވުމަށް އޮންލައިން ޕޯޓަލްއެއް ގާއިމް ކޮށްފައެވެ. އެ ޕޯޓަލްއަށް މައުލޫމާތާއި ފޮޓޯއާއި ވީޑިއޯ ފޮނުވާ މީހުންގެ ސިއްރުކަން ހިފަހައްޓާނެކަމަށް ފުލުހުން ވަނީ ބުނެފައިވެއެވެ.