ކަނޑިތީމާއި އިންވެގެން އޮންނަ ކުޑަރަށާއި ބޮޑުފަޅު ފަތުރުވެރިކަމަށް ތަރައްގީކުރުމުގެ މަޝްވަރާތައް ކޮށްފި

ށ. އަތޮޅުގައި ފަތުރުވެރިކަން ތަރައްގީކުރުމުގެ ގޮތުން އެއަތޮޅު ކަނޑިތީމާއި އިންވެގެން އޮންނަ ކުޑަރަށާއި، ބޮޑުފަޅުގައި ފަތުރުވެރިކަން ތަރައްގީކުރުމަށް މަޝްވަރާތަކެއް ކުރެވިފައިވާ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ޓުއަރިޒަމް މިނިސްޓަރ. ޑރ. އަބްދުﷲ މައޫސޫމް މިހެން ވިދާޅުވީ އަންގާރަދުވަހުއޮތް މަޖިލީހުގެ ޖަލްސާގައި ކަނޑިތީމު ދާއިރާގެ މެންބަރު ޢަބްދުﷲ ޝަހީމް ޢަބްދުލްޙަކީމް ކުރެއްވި ސުވާލުގެ ޖަވާބުގައެވެ.

މިނިސްޓަރ މައުސޫމް ވިދާޅުވީ ށ. އަތޮޅަކީ ތ. އަތޮޅު ގޮތަށް ޖޯގްރަފީގެ ގޮތުން ބަލާއިރު، އެއަރޕޯޓްތަކާއި ދުރުގައި އޮތް އަތޮޅެއް ކަމަށާއި، ށ. އަތޮޅުގައި އެއަރޕޯޓެއް ހެދުން އެއީ ވަރަށް މުހިންމު ކަމެއް ކަމަށެވެ. އަދި ހަބަރު ލިބިފައިވާ ގޮތުގައި އެ އެއަރޕޯޓު ބިލެއްފަހީގައި އަޅާނެ ކަމަށާއި، އެ އެއަރޕޯޓް އެޅުމުގެ މަސައްކަތް ކުރިއަށްދާ ކަމަށެވެ.

މިނިސްޓަރ ވިދާޅުވީ ށ. އަތޮޅަށް ފަތުރުވެރިކަން ގެންދިއުމުގެ އެންމެ މުހިންމު ކަމަކަށް އޮތީ ހަނިމާދޫ އެއަރޕޯޓް އިތުރަށް ތަރައްގީ ކުރުން ކަމަށެވެ. 21 މެއިގައި ހަނިމާދޫ އެއަރޕޯޓާއި ބެހޭ އަޕްޑޭޓެއް ނެންގެވި ކަމަމަށާއި، އެއިރު ބިޑިންގ އިވެލުއޭޝަންގެ ޓެންޑަރ ޕްރޮސެސް ނިމިފައިވާ ކަމަށެވެ. އެހެންނަމަވެސް މައުލޫމާތު ލިބިފައިވާ ގޮތުގައި ޕްރައިޒް ނެގޯޝިއޭޝަނަކަށް ދާންޖެހިފައި އޮތް ކަމަށެވެ.

މިނިސްޓަރ ވިދާޅުވީ ހަމައެކަނި ހަނިމާދޫ އެއަރޕޯޓަކުން ނުވާނެ ކަމަށާއި، ހަނިމާދޫން ކަނޑިތީމާ ހިސާބަށްދާން ވެސް 45 ވަރަކަށް މިނެޓް ނަގާ ކަމަށެވެ. އަދި ކުޅުދުއްފުށި އެއަރޕޯޓުން 30 މިނެޓް ނަގާ ކަމަށާއި، އެހެންވީމަ ޓުއަރިޒަމް ކުރިއަށް ގެންދެވޭނީ ށ އަތޮޅުގައި އިތުރު އެއަރޕޯޓެއް އެޅިގެން ކަމަށެވެ.

މިނިސްޓރ ވިދާޅުވީ ސަރުކާރުން އަލަށް ފެށި ސްޕީޑް ފެރީއާއެކު ވަރަށް ބޮޑަށް ލުއިކަމެއް ގެނެސްދީފައިވާ ކަމަށާއި، ސްޕީޑް ފެރީގައި ޓުއަރިސްޓުންނަށް ވެސް ދިވެހިންނާ އެއް އަގެއްގައި ދަތުރުކުރެވޭނެ ކަމަށެވެ.

ކުދި ހޮޓާ އަދި ހޯމް ސްޓޭ ތައާރަފްކުރުމަށް ފީއެއްގެ ގޮތުގައި 5000 ރުފިޔާ ދައްކަންޖެހޭ ޖެހުން ބަދަލުކޮށް އެފީ އުވާލުމަށް މަޖިލީހަށް ވަނީ ބިލެއް ހުށަހަޅާފައެވެ.