"ސްޓެލްކޯ މަޤްބޫލު ކުންފުންޏަކަށް ހެދުމަށް، ކުންފުނީގެ މިސްރާބު ބަދަލުކޮށްލަން ޖެހޭ"
ކުންފުންޏާއި ގުޅޭގޮތުން މުޚާތަބް ކުރާއިރު "އަޅުގަނޑުމެންގެ ކުންފުނި" ކިއުމަށް އެދޭ
ސްޓެލްކޯގެ 25 ވަނަ އަހަރީ ދުވަސް ފާހަގަ ކުރުމުގެ ރަސްމިއްޔާތުގެ ތެރެއިން
ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އަކީ މަޤްބޫލު ކުންފުންޏަކަށް ހެދުމަށް، ކުންފުނީގެ މިސްރާބު ބަދަލުކޮށްލަން ޖެހޭކަމަށް އެ ކުންފުނީގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.
ސްޓެލްކޯގެ 25 ވަނަ އަހަރީ ދުވަސް ކުލަގަދަކޮށް ފާހަގަ ކުރުމަށް އާދިއްތަ ދުވަހުގެ ހެނދުނު ސްޓެލްކޯ ހެޑް އޮފީހުގައި ވަނީ ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ވާހަކަ ދައްކަވަމުން ޝަރީފް ވިދާޅުވީ، މިއީ ސްޓެލްކޯގެ ޙަޔާތުގައި މުހިއްމު ދުވަހެއް ކަމަށެވެ.
ޝަރީފް ވަނީ ދުވަހުގެ މުނާސަބަތުގައި ސްޓެލްކޯގެ އިސް ވެރިންނާއި މުވައްޒަފުންނަށް މަރުޙަބާ ވިދާޅުވެފައެވެ. ކުންފުނީގެ 25 އަހަރުގެ ތާރީޚުގައި ކުންފުންޏަށް އެކި ފަރާތްތަކުން ކޮށްދީފައިވާ ޚިދުމަތްވެސް ޝަރީފް ފާހަގަ ކުރެއްވިއެވެ. އެގޮތުން ކުންފުންޏަށް ލިބިފައިވާ ކުރިއެރުންތަކަކީ އެ އެންމެންގެ މަސައްކަތުގެ ނަތީޖާކަމަށް ޝަރީފް ވިދާޅުވިއެވެ.
އެކަމަށްޓަކައި ޝަރީފް ވަނީ އެ ހުރިހާ ފަރާތްތަކަށްވެސް ޝުކުރު އަދާ ކުރައްވާފައެވެ.
ޝަރީފް ވަނީ ސްޓެލްކޯގެ ބަދަލުގައި ކުންފުންޏާއި ގުޅޭގޮތުން މުޚާތަބް ކުރާއިރު "އަޅުގަނޑުމެންގެ ކުންފުނި" ކިއުމަށް އެދިލައްވާފައެވެ.
ކުންްފުނީގެ މިސްރާބު ބަދަލުކޮށްލަން ޖެހިފައިވާކަން ފާހަގަ ކުރައްވައި ޝަރީފް އިތުރަށް ވިދާޅުވީ، ސްޓެލްކޯއަކީ "ކަސްޓަމަރ އޮރިއެންޓެޑް" ކުންފުންޏަކަށް ހަދަން ޖެހޭ ކަމަށެވެ. އެގޮތުން ކުންފުނީގެ ހުރިހާ ނިންމުންތަކެއްގެ ފުރަތަމަ މަސްލަޙަތު ގުޅިފައި އޮންނަން ޖެހޭނީ ކަސްޓަމަރުންނާ ކަމަށް ޝަރީފް ވިދާޅުވިއެވެ.
ކުންފުނި މަޤްބޫލު ކުންފުންޏަކަށް ހެދުމަށްޓަކައި މިއީ ކުރަންޖެހޭ ކަންކަން ކަމަށް ޝަރީފް ވިދާޅުވިއެވެ.
އަހަރީ ދުވަސް ކުލަގަދަކޮށް ފާހަގަ ކުރުމުގެ ގޮތުން އާދިއްތަ ދުވަހު ވަނީ އަހަރީ ދުވަހަށް ހާއްސަ ކޭކެއް ފަޅާފައެވެ. އެ ކޭކް ފަޅުއްވައިދެއްވީ ކުންފުނީގެ ބޯޑުގެ ޗެއާރމަން ބްރިގޭޑިއަރ ޖެނެރަލް (ރިޓަޔަރޑް) އިބްރާހިމް މުހައްމަދު ދީދީ އާއި މެނޭޖިންގ ޑިރެކްޓަރ އަހުމަދު ޝަރީފްގެ އިތުރުން ކުންފުނީގެ ދެ ޑިޕިއުޓީ މެނޭޖިންގ ޑިރެކްޓަރު ކަމުގައިވާ، މުހައްމަދު ލަތީފާއި، ޑރ. އަލީ އަޒުވަރުއެވެ.
މި ރަސްމިއްޔާތުގައި ދެއްކެވި ވާހަކަފުޅުގައި ސްޓެލްކޯގެ ޗެއަރމަން ވަނީ އެ ކުންފުންޏަކީ ވަރުގަދަ އަދި ރާއްޖޭގެ އެންމެ ފުންނާބުއުސް ކުންފުންޏަކަށް ހެދުމަށް ކުރެވިފައިވާ މަސައްކަތްތަކަށް އަލިއަޅުވާލައްވައި، ރައްޔިތުންނަށް ރަނގަޅު ޚިދުމަތެއް ފޯރުކޮށްދިނުމުގައި ދެމިިބުމަށް މުވައްޒަފުންނަށްވެސް ނަސޭޙަތްތެރިވެލައްވާފައެވެ.
ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ ނަމުގައި ސަރުކާރުގެ ކުންފުންޏެއް އުފެއްދީ 19 ޖޫން 1997ގައެވެ.
