ކ. މާލެ
|
18 ޖޫން 2022 | ހޮނިހިރު 18:01
ސަލްމާން މިސްކިތުގައި ހުކުރު ނަމާދު ކުރަނީ
ސަލްމާން މިސްކިތުގައި ހުކުރު ނަމާދު ކުރަނީ
ދީނީ ގޮތުން ބައިބައިކުރުން
ދީން ސިޔާސީ ހަތިޔާރެއްގެ ގޮތުގައި ބޭނުން ނުކުރާށެވެ.
 
އެއް މިސާލަކީ ރާއްޖޭގައި މަރުގެ ޙުކުމް ތަންފީޒު ކުރުމުގެ ވާހަކަ
 
ބައެއް ފަހަރު ވަކި ޤައުމަކާ ގުޅުން ބަދަހި ކުރުމަކީ ދީނަށް ކުރެވޭ ކުޑައިމީސް ކަމެއްކަމުގައި ބުނޭ
 
ދީނުގެ ނަމުގައި ބައިބައިވުން އުފެއްދުމާއި، ނަފްރަތު އުފެއްދުން ހުއްޓާލަން ޖެހޭ

ސިޔާސީ މީހުން ބޭނުންކުރާ ތަފާތު އެކި އުކުޅުތައް ހުރެއެވެ. ބައެއް ފަހަރު ރައްޔިތުން ކައްކާލުމަށްޓަކައި މިނިވަންކަމުގެ ވާހަކަ ދައްކައެވެ. އަނެއްބައި ފަހަރު ދީނުގެ ވާހަކަ ދައްކައެވެ. އަނެއްބައި ފަހަރު ސަޤާފަތުގެ ވާހަކަ ދައްކައެވެ. ސިޔާސީ ހަތިޔާރެއްގެ ގޮތުގައި މި ދެންނެވި ކަންކަން ބޭނުންކުރާ މީހުން މަދެއް ނޫނެވެ.

ވެރިކަމުގައި ތިބޭ މީހުންނަކީ ލާދީނީ ބައެއްކަމުގައި ދެއްކުމާއި، އޭރަކު އޮންނަ އިދިކޮޅު ސިޔާސީ ޕާޓީއަކީ ދީނުގެ ދިފާއުގައި ނުކުންނަ ބައެއްކަން ދެއްކުންވެސް މިއީ ރާްއްޖޭގެ ސިޔާސީ މަސްރަހު ކިޔާދީފައިވާ ހަގީގަތްތަކެވެ.

ކޮންމެ ބަޔަކުވެސް ބަލަނީ ދީނީ ކާޑު ކުޅެގެންވެސް އެ ބަޔަކު ބޭނުންވާ ސިޔާސީ މަންފާއެއް ހާސިލު ކުރެވޭތޯއެވެ.

ބައެއް ފަހަރު ވަކި ޤައުމަކާ ގުޅުން ބަދަހި ކުރުމަކީ ދީނަށް ކުރެވޭ ކުޑައިމީސް ކަމެއްކަމުގައި އިދިކޮޅުގައި އޮންނައިރު ބުނެއެވެ. ޖެހިގެން އަންނަ ދުވަހު ހަމަ އެ ޕާޓީ ވެރިކަމަށް އައުމުން ފެންނަނީ މި ދެންނެވި ޤައުމުގެ ވެރިންނާ އަތާ އަތް ގުޅާލައްވާ ތަނެވެ.

ބައެއް ފަހަރު ޤައުމުތަކުން ދީނާއި ގުޅިގެން ކުރާ ކަންކަން ކުށްވެރި ނުކޮށްގެން އެކަން މައްސަލައަކަށް ހަދައެވެ. ނަމަވެސް އެ ޕާޓީއެއް ވެރިކަމަށް އައުމުން އެކަންކަން ނިންމާލަނީ އެއީ ޤައުމުތަކުގެ ދާޚިލީ ކަންކަން ކަމަށް ބުނެލަމުންނެވެ. އަބަދުވެސް ރާއްޖޭގެ ސިޔާސީ މަސްރަހުން ފެންނަ މަންޒަރަކީ އެއީއެވެ.

އޭގެ އެއް މިސާލަކީ ރާއްޖޭގައި މަރުގެ ޙުކުމް ތަންފީޒު ކުރުމުގެ ވާހަކައެވެ. ރާއްޖޭގެ ބައެއް ސިޔާސީ ފަރާތްތަކުން ޙަޔާތެއް ވޭތު ކުރައްވަމުން ގެންދަވަނީ ރާއްޖޭގައި މަރުގެ އަދަބު ތަންފީޒު ކުރަންޖެހޭ ކަމާއި، މަރުގެ އަދަބު ތަންފީޒު ކުރައްވާނެކަމަށް ވިދާޅުވަމުންނެވެ.

ނަމަވެސް އެކަން ކުރެއްވުމުގެ ބާރު ލިބުމުން، އެކަން ވެގެން ދިޔަ ތަން ފެނުނީ އިބިލީހުގެ ކައިވެންޏަކަށެވެ.

ދީނާއި ގުޅުވައި ސިޔާސީ ފަރާތްތަކުން ދައްކާ ގިނަ ވާހަކަތައް ހުންނަނީ މިފަދަ ދެއުޅިއެއްނުވާ ގޮތަކަށެވެ.

ވީއިރު، ރައްޔިތުންގެ ލޭ ކައްކާލުމަށް ދީނުގެ ނަން ބޭނުންކޮށްގެން ސިޔާސީ ފަރާތްތަކުން ކުޅެމުންދާ "ސިޔާސީ ގޭމް" ހުއްޓާލަން ޖެހެއެވެ. ހަގީގަތަކީ މި ޤައުމުގައި އިސްލާމް ދީން ނޫން އެހެން ދީނެއް އޮތުމަކަށް ދިވެހިން ފުރުސަތެެއް ނުދޭނެ ކަމެވެ.

އެހެން އެކަން ވާން ދޫކޮށްލައިގެންވެސް ނުތިބޭނެ ކަމެވެ.

ދީނުގެ ނަމުގައި ބައިބައިވުން އުފެއްދުމާއި، ނަފްރަތު އުފެއްދުމަކީ ކޮށްގެންވާނެ ކަމެއް ނޫނެވެ. އެކަން ހުއްޓާލަންޖެހެއެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: ފާޠިމަތު ޒުހައިރާ
0%
0%
0%
0%
0%
100%
ކޮމެންޓް