މާލީ ހާލަތު ދަށްވެ ލަންކާގެ އެންމެ ބޮޑު ޔުނިވަރސިޓީ ބަންދުކޮށްފި
18 ޖޫން 2022 | ހޮނިހިރު 08:17ޔުނިވަރސިޓީ ބަންދުކުރީ ލަންކާގެ މިހާރުގެ ހާލަތާގުޅިގެން
ޕެރެޑެނިޔާ ޔުނިވަރސިޓީ | ގޫގުލް
ސްރީލަންކާގެ އެންމެ ބޮޑު ޔުނިވަރސިޓީ ކަމަށްވާ ޕެރެޑެނިޔާ ޔުނިވަރސިޓީ ވަގުތީގޮތުން ބަންދުކޮށްފިއެވެ.
ކެންޑީގައި ހިންގަމުން އަންނަ މި ޔުނިވަރސިޓީން ހޮނިހިރު ދުވަހު ނެރުނު ނޯޓިހެއްގައި ވަނީ، މިހާރު ލަންކާގެ ހާލަތަށް ބަލައި އެ ޔުނިވަރސިޓީން ދޭ ހުރިހާ ޚިދުމަތެއް މެދުކަނޑާލަން ނިންމާފައިވާ ކަމަށެވެ. މީގެ ތެރޭގައި އެކެޑެމިކް ޕްރޮގްރާމްތަކާއި އިމްތިހާނުތައްވެސް ހިމެނެއެވެ.
މި ނިންމުމާއެކު ޔުނިވަރސިޓީގައި ތިބި ހުރިހާދަރިވަރުން އެތަން ހުސްކޮށް ދިއުމަށްވެސް ވަނީ އަންގާފައެވެ. އަދި ކިޔެވުން އަލުން ފެށުމުން އެކަން އަންގާނެކަމަށްވެސް ވަނީ ބުނެފައެވެ.
ލަންކާގެ ޕެރެޑެނިޔާ ޔުނިވަރސިޓީ ބަންދުކުރީ އެ ގައުމުގެ އިގުތިސާދީ ހާލަތުގެ ސަބަބުންނެވެ. އެ ގައުމުގެ މާލީ ހާލަތު ދަށްވެ، ގިނަ ޚިދުމަތްތަކެއް ވެސް ވަނީ މެދުކެނޑިފައެވެ.
ޕެރެޑެނިޔާ ޔުނިވަރސިޓީ ބަންދު ކޮށްފައިވާއިރު، އެ ގައުމުގެ އެޑިއުކޭޝަން މިނިސްޓްރީން ވަނީ ސަރުކާރު ސްކޫލްތައް ބަންދުކުރަންވެސް ނިންމާފައެވެ. މިއާއެކު އޮންލައިންކޮށް ކުދިންނަށް ކިޔަވައިދެވޭނެ އިންތިޒާމް ހަމަޖެއްސުމަށް އެ މިނިސްޓްރީން ދަނީ މަސައްކަތްކުރަމުންނެވެ.
އެ ގައުމުން ސްކޫލްތައް ބަންދުކުރަން ނިންމީ ކުރިއަށް އޮތް ހަފުތާއަށެވެ.
