އެމްޕީއެލްއިން ހިންގާ ރީޖަނަލް ޕޯޓުތަކުގެ މުވައްޒަފުންގެ މުސާރަ ބޮޑުކޮށްފި
މުވައްޒަފުންގެ މުސާރައިގެ އޮނިގަނޑަށް ވަނީ ބަދަލުގެނެސްފައި
ހިތަދޫ ރީޖަނަލް ޕޯޓު
މޯލްޑިވްސް ޕޯޓްސް ލިމިޑެޓުން ހިންގާ ރީޖަނަލް ޕޯޓުތަކުގެ މުވައްޒަފުންގެ މުސާރަބޮޑުކޮށް، އޮނިގަނޑަށް ބަދަލުގެނެސް މުވައްޒަފުންނަށް ކުރިއެރުން ދީފިއެވެ.
އެމްޕީއެލްއިން ބުނީ އެ ކުންފުނީގެ ބޯޑު މެމްބަރުން ބުރާސްފަތި ދުވަހު ހިތަދޫ ރީޖަނަލް ޕޯޓުގެ މުވައްޒަފުންނާއި ބައްދަލުކޮށް އަލަށް ފާސްކުރެވުނު ޕޮލިސީތަކާއި، މުވައްޒިފުންގެ ކުރިއެރުމަށް ގެނެވުނު ބަދަލުތަކާއި ބެހޭ ގޮތުން މައުލޫމާތު ދެއްވާފައިވާ ކަމަށެވެ.
ހިތަދޫ ޕޯޓުގައި ބޭއްވި ބޯޑު މީޓިންގ ތަކުގައި ވަނީ ގިނަ ޕޮލިސީތަކެއް ފާސްކޮށް ރީޖަނަލް ޕޯޓުތަކުގެ އޯރގަނައިޒޭޝަނަލް ސްޓްރަކްޗަރަށް ގެންނަ ބަދަލުތަކާއި ބެހޭގޮތުން މުވައްޒަފުންނަށް މައުލޫމާތު ދީ، މުވައްޒަފުންގެ ހުރި ސުވާލުތަކާއި ބެހޭ ގޮތުން ވާހަކަ ދައްކާފައެވެ.
ރީޖަނަލް ޕޯޓުތަކުގެ ހުރިހާ މުވައްޒަފުންގެ މުސާރަ ބޮޑުކުރުމަށް ބޯޑުން ފާސްކޮށްފައިވާއިރު، އަންނަ މަހުގެ މުސާރައާއި އެކު މުވައްޒަފުންގެ މުސާރައިގެ އޮނިގަނޑަށް މި ބަދަލުތައް އަންނާނެ ކަމަށް އެމްޕީއެލްއިން ބުނެފައިވެއެވެ.
މީގެ އިތުރުން މުވައްޒަފުންނަށް ކުރިއެރުންވެސް ލިބިގެންދާއިރު، ކުރިޔަށްވުރެން މާ ފުރިހަމަ ރިޓަޔަރމަންޓް ޕޮލިސީއެއް ވަނީ އެކުލަވާލާފައެވެ. އަދި މާލީ އެހީ ދޭ ޕޮލިސީ، ކޯޑް އޮފް ކޮންޑަކްޓް އާއި އިތުރު ޕޮލިސީތައް ވަނީ ފާސްކޮށްފައެވެ.
އެމްޕީއެލްގެ ބޯޑު ހުރިހާ މެމްބަރުންވެސް ވަނީ މުވައްޒަފުން ކުރަމުން ގެންދާ ބުރަ މަސައްކަތް ފާހަގަކޮށް، އެކަމަށް ހުރިހާ މުވައްޒަފުންނަށްވެސް ޝުކުރު އަދާކޮށްފައެވެ.
