ރާއްޖެއަށް 520 ޓަނުގެ ހަކުރު އިންޑިއާއިން ދޫކޮށްފިއެވެ.
އިންޑިއާ ސަރުކާރުން ބުނެފައިވަނީ ރާއްޖެއަށް 520 ޓަނުގެ ހަކުރު ދޫކުރުމަށް ނިންމާފައިވަނީ ބައިލެޓްރަލް ޓްރޭޑް އެގްރީމަންްޓްގެދަށުން ކަމަށެވެ. އަދި މިގޮތަށް ނިންމާތާ 90 ދުވަހުގެ ތެރޭގައި ރާއްޖެއަށް ހަކުރު ފޯރުކޮށްދޭންޖެހޭނެ ކަމަށްވެސް އިންޑިއާއިން ވަނީ ބުނެފައެވެ.
6 އަހަރު ދުވަހުގެ ތެރޭގައި ފުރަތަމަ ފަހަރަށް ކުންފުނިތަކުން އެކްސްޕޯޓްކުރާ ހަކުރުގެ މިންވަރު 10 މިލިއަން ޓަނަށް އިންޑިއާއިން ވަނީ ދަށްކޮށްފައެވެ. އިންޑިއާއަކީ ދުނިޔޭގައި އެންމެ ގިނައިން ހަކުރު އުފައްދާ އެއްގައުމެވެ. އަދި އިންޑިއާއަކީ ބްރެޒިލަށްފަހު ދެވަނައަށް އެންމެ ގިނަ އަދަދަކަށް ހަކުރު އެކްސްޕޯޓްކުރާ ގައުމެވެ.
މީގެ ކުރިން މާޗު މަހުވެސް އިންޑިއާއިން ހަކުރު އެކްސްޕޯޓްކުރާ މިންވަރު ކޮންޓްރޯލްކުރަން އުޅޭކަމަށް ރޮއިޓަރސްއިން ވަނީ ރިޕޯޓުކޮށްފައެވެ. އޭރު ރިޕޯޓުކޮށްފައިވަނީ މިސީޒަންގައި އެކްސްޕޯޓްކުރާ ހަކުރުގެ އެންމެ ގިނަ މިންވަރަކީ 8 މިލިއަން ޓަނު ކަމަށް ހެދުމަށް ނިންމާފައިވާކަމަށެވެ.
ބްރެޒިލުން އުފައްދާ ހަކުރުގެ އަދަދު މަދުވުމާއި ތެލުގެ އަގުތައް އުފުލުމުގެ ސަބަބުން ދުނިޔޭގެ ބާޒާރުގައި ހަކުރުގެ އަގު އުފުލެމުންދާކަމަށް ރިޕޯޓުތައް ބުނެއެވެ. އިންޑިއާއިން އެންމެ ފުރަތަމަ 8 މިލިއަން ޓަނަށްވުރެ އިތުރަށް އެކްސްޕޯޓްނުކުރެވޭނެ ގޮތް ހެދުމަށް ނިންމުމަށްފަހު، މިއަދަދު 10 މިލިއަށް އިތުރުކޮށްފައިވަނީ، މިހާރު އިންޑިއާގެ ހަކުރު އުފައްދާ ކުންފުނިތަކަށް ކުރިން އަންދާޒާކުރިވަރަށްވުރެ އިތުރަށް ހަކުރު އުފެއްދޭނެކަމަށް ލަފާކުރެވުމުންނެވެ.
އިންޑިއާގެ ޝުގަރ މިލްސް އެސޯސިއޭޝަނުން އަންދާޒާކުރާގޮތުގައި މިއަހަރު 35.5 މިލިއަން ޓަނުގެ ހަކުރު އުފެއްދޭނެއެވެ. ނަމަވެސް މީގެކުރިން މި އެސޯސިއޭޝަނުން އަންދާޒާކޮށްފައިވަނީ 31 މިލިއަން ޓަނުގެ ހަކުރު އުފެއްދޭނެކަމަށެވެ. އިންޑިއާގެ އެކި ކުންފުނިތަކުން މިހާތަނަށް 8.5 މިލިއަން ޓަނުގެ ހަކުރު މިއަހަރުގެ ތެރޭގައި އެކްސްޕޯޓްކުރަން ވަނީ ބޭރުގެ ކުންފުނިތަކާއެކު އެއްބަސްވެފައެވެ. މި 8.5 މިލިއަން ޓަނުގެ ހަކުރުގެ ތެރެއިން މިހާތަނަށް 7.1 މިލިއަން ޓަނުގެ ހަކުރު އެކްސްޕޯޓްކޮށްފައިވާކަމަށް ރިޕޯޓުތައް ބުނެއެވެ.
އިންޑިއާއިން މިގޮތަށް ނިންމާފައިވާއިރު، ކާޑުގެ ބާވަތްތަކާއި، ތެލާއި، ބޭސް، ދަތިނުވެ، ގަންނަވަރަށް ފައިސާ ހުންނާނެކަމުގެ ޔަގީންކަން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ ދެއްވާފައެވެ. ރައީސް އިތުރަށް ވިދާޅުވީ، ދައުލަތަށް ބޭނުންވާ އަސާސީ ތަކެތި ފޯރުކޮށްދޭ އެސްޓީއޯއަށް ފައިނޭންޝަލް ކެޕޭސިޓީ ފޯރުކޮށްދީފައިވާ ކަމަށެވެ. އެސްޓީއޯއިން އެ ބާވަތްތައް ދަތިނުވެ އިމްޕޯޓްކުރެވޭނެ ކަމަށްވެސް ރައީސް ވިދާޅުވިއެވެ.
