ބަނގުރަލުގެ ވިޔަފާރިކުރުމުގެ ދައުވާއިން ސަލާމަތްވީ އެކަށީގެންވާ ހެކި ނެތުމުން
އިތުރު ހެތްކެއް އޭނާއާ ދެކޮޅަށް ދައުލަތަށް ދެއްކިފައެއްނުވޭ
ކްރިމިނަލް ކޯޓް
އެކަށީގެންވާ ހެކި ނެތުމުގެ ސަބަބުން، ބަނގުރަލުގެ ވިޔަފާރިކުރުމުގެ ދައުވާއިން މީހަކު ސަލާމަތްވެއްޖެއެވެ.
މި މައްސަލައިގައި ބަނގުރާ ގެންގުޅެ، އެތަކެތީގެ ވިޔަފާރިކުރާކަމަށް ތުހުމަތުކުރެވޭ މައްސަލައިގައި އުފުލާފައިވަނީ، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާއެވެ. މި މައްސަލައިގެ ދައުވާލިބޭ ފަރާތާއި މި މައްސަލައިގައި ފެނިފައިވާ ބަނގުރަލާ ގުޅުވާލެވޭ ހަމައެކަނި ހެތްކަކީ އޭނާގެ އަތުން ފެނިފައިވާ ތަޅުދަނޑިއެއްކަން، މައްސަލަ ބެއްލެވި ގާޒީ ސޮފްވަތު ހަބީބު ހުކުމްކުރައްވަމުން ވިދާޅުވިއެވެ.
އެނޫން އިތުރު ހެތްކެއް އޭނާއާ ދެކޮޅަށް ދައުލަތަށް ދެއްކިފައި ނުވާކަމަށްވެސް ހުކުމުގައި ބުނެފައިވެއެވެ.
އަދި އެތަކެތި ފެނުނު ކޮޓަރީގައި ނުވަތަ ފާޚާނާ ތެރޭގައި ބަނގުރާ ހުރިކަން އޭނާއަށް އެނގޭނެ އެއްވެސް ހެތްކެއް ނުވަތަ ގަރީނާއެއްވެސް ދައުލަތުން ހުށައަޅާފައިނުވާކަމަށް ގާޒީ ވިދާޅުވިއެވެ.
މި މައްސަލައިގައި ދައުވާލިބޭ މީހާ އިބްތިދާއީ މަރުހަލާގައި ދައުވާއަށް އިންކާރުކޮށްފައިވެއެވެ. އޭނާގެ ފަރާތުން ވަނީ (ޖިނާއީ އިޖުރާއަތުގެ ގާނޫނުގެ 115 ވަނަ މާއްދާއަށް ރިއާޔަތްކުރާއިރު) މިއީ ކުރިއަށް ގެންދެވޭނެ ދައުވާއެއް ނޫންކަން ފާހަގަކޮށްފައެވެ. އެ މައުޟޫއަށް ދެފަރާތުންވެސް ބަހުސްކުރުމަށް އެކަށީގެންވާ ފުރުސަތު ގާޒީ ވަނީ ދެއްވާފައެވެ.
ގާޒީ ވިދާޅުވާގޮތުގައި، މަދަނީ މިންގަނޑުން ބަލާއިރު މި މައްސަލައިގައި ހުށައަޅާފައިވާ ހެތްކާއި ގަރީނާތަކަށް ބަލައި މި ދައުވާ ކުރިއަށް ގެންދެވޭނެ ތަނެއް އޮތްކަމަށް ފެނިވަޑައެއްނުގަންނަވައެވެ. ވުމާއެކު ގާޒީ ވަނީ މި ދައުވާއަކީ މަދަނީ މިންގަނޑުން ބަލާއިރު ކުރިއަށް ގެންދާނެ ތަނެއް ނެތް ދައުވާއެއްކަމަށް ކަނޑައަޅުއްވާފައެވެ.
