އާތީއާއެކު އީގަލްސް ވަރުގަދަކޮށްފި
13 ޖޫން 2022 | ހޯމަ 02:19އީގަލްސްއިން ވަނީ ބިދޭސީ ހަތަރު ކުޅުންތެރިން ހޯދާފަ
މުޙައްމަދު އާތިފް: ފޮޓޯ-އެފްއޭއެމް
ހެޑް ކޯޗެއް ނެތި ދިވެހި ޕްރިމިއަރ ލީގުގައި ރަނގަޅު ނަތީޖާތަކެއް ނެރެމުން އައި އީގަލްސްއިން ކޯޗަކަށް މުޙައްމަދު އާތިފް ހަމަަޖައްސާ ޓީމްވެސް ވަރުގަދަކޮށްފިއެވެ.
ލީގުގެ ފުރަތަމަ ބުރުގައި މާޒިޔާ ބަލިކުރި އީގަލްސްއިން އަލުން ލީގު ފަށާނީ އާތީގެ އިރުޝާދުގެ ދަށުންނެވެ. އާތީއާއެކު އީގަލްސްއިން ވަނީ ޕްރެކްޓިސް ފަށާފައެވެ. އާތީ އެންމެ ފަހުން ހުރީ ކްލަބް އޭދަފުށީގެ ކޯޗަކަށެވެ. އާތީއާއެކު ކްލަބް އޭދަފުށި ވަނީ ދިވެހި ލީގު ކޮލިފިކޭޝަންގެ އޯޕަން ރައުންޑަށް ކޮލިފައިވެފައެވެ. ފުރަތަމަ ޑިވިޝަންގައި އާތީ އެންމެ ފަހުން މަސައްކަތް ކުރީ ވެލެންސިޔާގައެވެ. އާތީ ވަނީ ވިކްޓްރީއާއި, ޓީސީއާއި, ޔުނައިޓެޑް ވިކްޓްރީގެ ކޯޗެއްގެ ގޮތުންވެސް މަސައްކަތްކޮށްފައެވެ.
ސީޒަންގެ ފުރަތަމަ މުބާރާތް, ޕްރެޒިޑެންޓް ކަޕަށްފަހު އީގަލްސްގެ ކޯޗުގެ މަޤާމް ހުސްވީ މުޙައްމަދު ޝާޒްލީ އިސްތިއުފާ ދިނުމުންނެވެ. ލީގުގައި އީގަލްސް ތާވަލްގެ ދެވަނާގައި ބާއްވައިދިނީ އެސިސްޓެންޓް ކޯޗު އަހުމަދު ނިމާދު (ނިމާ) އެވެ. ނިމާއާއެކު އީގަލްސް އޮތީ 28 ޕޮއިންޓާއެކު ދެވަނާގައެވެ. އެއްވަނާގައި އޮތް މާޒިޔާއާ ދެމެދު އޮތީ ފަސް ޕޮއިންޓްގެ ފަރަޤެކެވެ.
ލީގު އަލުން ފަށާއިރު އީގަލްސް ނިކުންނާނީ ބިދޭސީ އާ ހަތަރު ކުޅުންތެރިންނާވެސް އެކުއެވެ. އީގަލްސްއާ އަލަށް ގުޅުނީ ބްރެޒިލްގެ ޒުވާން ބުރޫނޯ ވިނީޝިއުސްއާއި, ތަޖަކިސްތާންގެ މިޑްފީލްޑަރ ޒަރްޑިއޭވްއެވެ. މީގެތެރެއިން ބުރޫނޯ ވިނީޝިއުސްއަކީ ރެއާލް މެޑްރިޑްގެ ސީ ޓީމަށް ކުޅުނު ކުޅުންތެރިއެކެވެ. މީގެއިތުރުން އީގަލްސްއިން ވަނީ މިޞްރު ޑިފެންޑަރު އަހުމަދު ސޯބީއާއި, ކުރިން ރާއްޖޭގެ ކްލަބްތަކަށް ކުޅުނު ސްޕެއިން ފޯވާޑް އެންހެލް މުނޯޒްގެ ސޮއިވެސް ހޯދާފައެވެ. މުނޯޒްއަކީ މިސީޒަން ގްރީންއާއެކު ފެށި ކުޅުންތެރިއެކެވެ. ސީޒަން ފެށިއިރު އީގަލްސްގައި ހުރި ބިދޭސީ ކުޅުންތެރިއަކީ ކީޕަރު ތޯހާއެވެ. އެކަމަކު ލީގުގައި މިހާރު އެޓީމްގެ ގޯލް ބަލަހައްޓަމުން އަންނަނީ ޒުވާން ކީޕަރު އަލީފްއެވެ. ތޯހާ ވަނީ އީގަލްސް ދޫކޮށް ދަ ގްރާންޑޭއަށް ބަދަލުވެފައެވެ.
