ކޮވިޑް-19 ގެ ޙާލަތާ ގުޅިގެން ބްރޯޑްކާސްޓަރުންނަށް މާލީގޮތުން ދަތިތަކެއް ކުރިމަތިވެފައިވާތީ އާއި މިއީ ދިވެހިރާއްޖޭގައި މިފަދައިން ބޭއްވޭ އެންމެ ފުރަތަމަ އެވޯޑަށް ވާތީ، ވީހާވެސް ގިނަ ފަރާތްތަކަށް ބައިވެރިވުމުގެ ފުރުސަތު ތަނަވަސްކޮށްދިނުމުގެ ގޮތުން، އެވޯޑަށް ކުރިމަތިލުމުގެ ބައެއް ޝަރުތުތަކަށް މިއަހަރު ޢަމަލު ނުކުރުމަށް މޯލްޑިވްސް ބްރޯޑްކާސްޓިންގ ކޮމިޝަނުން ނިންމާ އެވޯޑަށް ކުރިމަތިލުމުގެ މުއްދަތު އިތުރުކޮށްފިއެވެ.
އެކަމާއި ގުޅިގެން ބްރޯޑްކޮމް އިން ބުނީ “މޯލްޑިވްސް ބްރޯޑްކާސްޓް އެވޯޑްސް 2022” ގައި ހިމެނޭ ބައެއް ކެޓަގަރީތަކަށް ކަނޑައަޅާފައިވާ ޝަރުތުތަކުގެ ސަބަބުން ބައެއް ބްރޯޑްކާސްޓަރުންނަށް މި އެވޯޑްތަކަށް ކުރިމަތިލުމަށް ހުރަސްތަކެއް ހުރި ކަމަށް ކޮމިޝަނަށް ވަނީ ފާހަގަކުރެވިފައިކަމަށެވެ. މިގޮތުން، ޢަމަލުނުކުރުމަށް ނިންމާފައިވަނީ، “މޯލްޑިވްސް ބްރޯޑްކާސްޓިންގ އެވޯޑު ދިނުމުގެ އުޞޫލު” ގެ 7 ވަނަ މާއްދާގެ ހ އަށެވެ. އެމާއްދާ އަކީ އެވޯޑް ނުދެވޭނެ ހާލަތްތަކެވެ. އެހާލަތްތަކުގެ ގޮތުގައި ބަޔާންކޮށްފައިވަނީ އަހަރީ ރިޕޯޓް ހުށަހަޅާފައިނުވުމާއި އަހަރީ ފީ އަދި ޖޫރިމަނާ ދައްކާފައި ނުވުމެވެ. މިއާއެކު މިއަހަރު ދިނުމަށް ހަމަޖެހިފައިވާ އެވޯޑަށް ކުރިމަތިލުމަށް ހުޅުވާލާފައިވާ މުއްދަތު 16 ޖޫން ވާ ބުރާސްފަތި ދުވަހުގެ 14:00 އަށް ވަނީ އިތުރުކޮށްފައެވެ.
މިއީ މުއްދަތު އިތުރުކުރި ދެ ވަނަ ފަހަރެވެ. ކުރިން އޮތްގޮތުން މުއްދަތު ހަމަވަނީ ޖޫން 12 ވަނަ ދުވަހަށެވެ.
މިއީ ބްރޯޑްކާސްޓިން ދާއިރާއަށް ޚާއްސަކޮށްގެން ބްރޯޑްކޮމްއިން އަލަށް ދޭން ނިންމާފައިވާ އެވޯޑެކެވެ. ބްރޯޑްކޮމްއިން ބުނީ މި އެވޯޑް ދޭން ނިންމާފައިވަނީ، ދިވެހިރާއްޖޭގައި ޚިޔާލުފާޅުކުރުމުގެ މިނިވަންކަމާއި ޑިމޮކްރަސީ އާލާކޮށް ދަމަހައްޓައި، އަދި ގައުމު ބިނާކުރުމާއި، އެކި ދާއިރާތަކުން ރައްޔިތުންގެ ހޭލުންތެރިކަން އިތުރުކޮށް މައުލޫމާތު މުއްސަނދިކުރުމުގައި، ބްރޯޑްކާސްޓިންގ ސިނާއަތުގައި ހަރަކާތްތެރިވާ ފަރާތްތަކުން އަދާކުރާ މުހިއްމު ދައުރުގެ އަގުވަޒަންކޮށް، މި ސިނާއަތުގެ ތަރައްގީއަށް މަގުފަހިކޮށްދީ ހިތްވަރު ދިނުމުގެ ގޮތުންކަމަށެވެ.
އެގޮތުން ޓީވީ ސްޓޭޝަންތަކާއި އެ ތަންތަނުގައި މަސައްކަތްކުރާ ފަންނީ މުވައްޒަފުންގެ އިތުރުން، ބްރޯޑްކާސްޓިން ދާއިރާއަށް ޚިދުމަތްކޮށްދީފައިވާ ފަރާތްތަކަށް އެވޯޑް ދޭނެއެވެ. މީގެ އިތުރުން ފްރީލާންސްކޮށް މަސައްކަތްކުރާ ފަރާތްތަކަށްވެސް އެވޯޑް ދޭނެއެވެ.
މޯލްޑިވްސް ބްރޯޑްކާސްޓް އެވޯޑް ދިނުމަށް ހަމަޖެހިފައިވާ ދާއިރާތައް:
އެންމެ މޮޅު ޑޮކިއުމެންޓަރީ ޕްރޮގްރާމް (ޗެނަލް އަދި އަމިއްލަ)
އެންމެ މޮޅު ކަރަންޓް އެފެއަރޒް ޕްރޮގްރާމް
އެންމެ މޮޅު މުނިފޫހިފިލުވުމުގެ ޕްރޮގްރާމް
އެެންމެ މޮޅު ކުޑަކުދިންގެ ޕްރޮގްރާމް
އެންމެ މޮޅު ޑޭޓައިމް ޕްރޮގްރާމް
އެންމެ މޮޅު ދީނީ ހޭލުންތެރިކުރުމުގެ ޕްރޮގްރާމް
އެންމެ މޮޅު ކުޅިވަރު ޕްރޮގްރާމް
އެންމެ މޮޅު ތިމާވެށި ޕްރޮގްރާމް
އެންމެ މޮޅު އުފެއްދުންތެރި ޕްރޮގްރާމް (ޗެނަލް އަދި އަމިއްލަ)
އަހަރުގެ އިޖްތިމާއީ ޕްރޮގްރާމް (ޗެނަލް އަދި އަމިއްލަ)
އަހަރުގެ އެންމެ މޮޅު ކެމްޕެއިން (އިޖްތިމާއީ ކެމްޕޭން އަދި މާރކެޓިންގ ކެމްޕޭން)
އެންމެ މޮޅު ނިއުސް އެންކަރ
އެންމެ މޮޅު ނޫސްވެރިޔާ
އެންމެ މޮޅު ޕްރޮގްރާމް ޕްރެޒެންޓަރ
އެންމެ މޮޅު ކެމެރާ ޕަރސަން
އެންމެ އުއްމީދީ ނޫސްވެރިޔާ
ބެސްޓް ބްރޯޑްކާސްޓިންގ ޗެނަލް
ބެސްޓް އިންކްލޫސިވް ބްރޯޑްކާސްޓަރ
އެންމެ އުފެއްދުންތެރި ޗެނަލް
ބްރޯޑްކާސްޓިންގ ދާއިރާއަށް ގިނަ ޚިދުމަތްތަކެއް ކޮށްދީފައިވާފައިވާ ފަރާތަށް ދޭ އިނާމް
ރީބްރޯޑްކާސްޓިންގ ޚިދުމަތުގެ އެވޯޑް
ބްރޯޑްކާސްޓިންގ ކޮމިޝަނުން ބުނީ އިނާމު ދިނުމަށް ހަމަޖެހިފައިވާ ދާއިރާތަކުގެ ޝަރުތުތައް އެކުލެވޭ ތަފްސީލާއި އެޕްލިކޭޝަން ފޯމް "މޯލްޑިވްސް ބްރޯޑްކާސްޓް އެވޯޑު ދިނުމުގެ އުސޫލު"ގައި ބަޔާންކޮށްފައި ވާނެކަމަށެވެ.
