ބްރޯޑްކާސްޓިންގެ ހަމަތަކާއި ގައިޑްލައިންތަކަށް ސަމާލުވުމަށް އިލްތިމާސްކޮށް ބްރޯޑްކޮމްގެ ސިޓީ އެއް ރާއްޖެޓީވީ އަށް

ބްރޯކާސްޓިންގެ ހަމަތަކާއި ގައިޑްލައިންތަކަށް ސަމާލުވުމަށް އިލްތިމާސްކޮށް ބްރޯޑްކޮމްގެ ސިޓީ އެއް ރާއްޖެޓީވީ އަށް ފޮނުވައިފިއެވެ.

އާދިއްތަ ދުވަހު ފޮނުވި އެ ސިޓީއަކީ ބްރޯޑްކޮމްގެ ސެކްރެޓަރީ ޖެނެރަލް މަރިޔަމް ޒީނިއާ ސޮއިކުރައްވާ ފޮނުއްވާފައިވާ ސީޓީއެކެވެ.

އެ ސިޓީގައި ރާއްޖެޓީވީން އުސޫލާއި ޚިލާފުވިކަމެއް ނުވަތަ ނޫންކަމެއް ސާފުކޮށްދީފައެއް ނުވެއެވެ.

އެ ސިޓީގައި ބުނެފައި ވަނީ ބްރޯޑްކާސްޓަރުން ޚަބަރާއި މައުލޫމާތު ގެނެސްދިނުމުގައި ބްރޯޑްކާސްޓްކުރުމުގެ ކޯޑް އޮފް ޕްރެކްޓިސް އާއި ނޫސްވެރިކަމުގެ ހަމަތަކާއި، އާއްމު އިޖްތިމާއީ މިންގަނޑަަށް ފެތޭކަން ކަށަވަރުކުރުމަށް ހުރިހާ ބްރޯޑްކާސްޓަރުންނަށް އިލްތިމާސްކުރާ ކަމަށެވެ.

ހަމައެހެންމެ ބްރޯޑްކާސްޓްކުރުމުގެ ޤާނޫނުގެ 37 ވަނަ މާއްދާގެ ދަށުން ބްރޯޑްކާސްޓަރުން އަމަލުކުރަންޖެހޭ ކޯޑް އޮފް ޕްރެކްޓިސް ގައި ކަނޑައަޅާފައިވާ ހަމަތަކާއި ގައިޑްލައިންތަކާއި އެއްގޮތަށް މަންޒަރާއި އަޑު ބްރޯޑްކާސްޓްކުރުމުގައި އިތުރަށް ސަމާލުވުމަށް ވެސް އެ ސިޓީގައި ވަނީ އިލްތިމާސްކޮށްފައެވެ.

އެ ސިޓީގައި އިތުރަށް ބުނެފައި ވަނީ ހަމަހަމަ، ޒިންމާދާރު ނޫސްވެރިކަމެއް ކުރުމުގެ އިތުރުން ޚަބަރާއި މައުލޫމާތު ގެނެސްދިނުމުގައި ހުރިހާ ފަރާތެއްގެ ބަސް ހިމަނައިގެން ކޮންޓެންޓް ފޮނުވުމަށް ސަމާލުވުމަށް އެ ކޮމިޝަނުން ބްރޯޑްކާސްޓަރުންނަށް ހަނދާންކޮށްދޭ ކަމަށެވެ.

ބްރޯޑްކޮމް އިން މިފަދަ ސިޓީ އެއް ފޮނުވާފައި މި ވަނީ ބްރޯޑްކޮމް އަށް އަލަށް ބައެއް ބޭފުޅުން އައްޔަންކުރައްވާފައިވާ ދަނޑިވަޅެއްގައެވެ. އަލަށް އައްޔަން ކުރެއްވި ބޭފުޅުން އައްޔަންކުރުމާއި އެކު މީޑިއާތައް ސަރުކާރުން ބޭނުންވާ ވަކި ގޮތަކަށް ބައްޓަންކުރުމަށް ބާރު އަޅާނެ ކަމަށް މީގެ ކުރިން ވެސް ފާޑުކިޔާ މީހުން އައީ ތުހުމަތުކުރަމުންނެވެ.

މި ސިޓީ ރާއްޖެޓީވީ އަށް އައި ދަނޑިވަޅަކީ މީޑިއާ ކޮންޓްރޯލް ކުރުމަށް ސަރުކާރުން އައު ބިލެއް މަޖިލީހަށް ހުށަހެޅުމަށް ތައްޔާރުވަމުންދާ ކަމަށް މަޖިލީހުގެ ނައިބު ރައީސް ދިއްގަރު ދާއިރާގެ މެމްބަރު އަހްމަދު ނާޒިމް ހާމަ ކުރައްވާފައިވަނިކޮށްނެވެ.