ރައީސް އާއި ގާސިމްގެ ބައްދަލުވުމުގައި ރިޔާސީ އިންތިޚާބުގެ މަޝްވަރާއެއް ނުކުރައްވާ
ރިޔާސީ އިންތިޚާބާއި ގާސިމް ރަނިންގ މޭޓަކަށް ހެދުމާއި ގުޅޭގޮތުން މަޝްވަރާކުރެވުނު ކަމަށް ދެކެވޭ ވާހަކަތަކަކީ ކަނޑައެޅިގެން ދޮގެއް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ޖުމްހޫރީ ޕާޓީގެ ލީޑަރު ގާސިމް އިބްރާހީމް ބައްދަލުކުރެއްވުން
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހީމް އާއެކު ކުރިޔަށްދިޔަ ބައްދަލުވުމުގައި ކުރިޔަށް އޮތް ރިޔާސީ އިންތިޚާބާ ގުޅޭގޮތުން އެއްވެސް މަޝްވަރާއެއް ނުކުރައްވާކަމަށް "ރާއްޖެއެމްވީ" އަށް މައުލޫމާތު ލިބިއްޖެއެވެ.
ހުކުރު ދުވަހު ރައީސް ޞާލިހު ވަނީ ނުރަސްމީ ދަތުރުފުޅެއްގައި މާމިގިއްޔަށް ވަޑައިގެން ސަން އައިލެންޑުގައި ދެ ބޭފުޅުން ބައްދަލުކުރެއްވާފައެވެ. އެއާއެކު އެކި ގޮތްގޮތަށް ވާހަކަތައް ވަނީ ފެތުރިފައެވެ. އެގޮތުން މިބައްދަލުވުމަކީ ކުރިޔަށް އޮތް ރިޔާސީ އިންތިޚާބާއި ގުޅޭގޮތުންނާއި ރައީސް ޞާލިހުގެ ރަނިންގ މޭޓަކަށް ގާސިމް ހެއްދެވުމަށް ކުރިޔަށްގެންދިޔަ ބައްދަލުވުންތަކެއްގެ ގޮތުގައި ވަނީ ވާހަކަތައް ދެކެވިފައެވެ.
ހުކުރު ދުވަހުގެ ހެނދުނު ރައީސް ޞާލިހު މާމިގިއްޔަށް ވަޑައިގަތުމުން މަރުހަބާ ދެންނެވީ ޖުމްހޫރީ ޕާޓީގެ ލީޑަރު ގާސިމް އިބްރާހިމްއެވެ. އެ މަނިކުފާނަށް މަރުހަބާ ދެންނެވުމަށް މާމިގިލީގެ ގިނަ ބަޔަކު އެއާޕޯޓަށް ގޮސްފައިވާއިރު އެ މަނިކުފާނަށް މަރުހަބާ ދަންނަވާފައިވަނީ ރަތް ދޫލައިގައެވެ. ރައީސްގެ މި ދަތުރުފުޅުގައި އެމަނިކުފާނުގެ އަރިހުގައި އިކޮނޮމިކް މިނިސްޓަރު ފައްޔާޒު އިސްމާއިލް އާއި ފިނޭންސް މިނިސްޓަރު އިބްރާހިމް އަމީރު ވެސް ބައިވެރިވެވަޑައިގަންނަވާފައިވެއެވެ.
މިދަތުރުފުޅާއި ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން ޖުމްހޫރީ ޕާޓީގެ އިސް ތަރުޖަމާނު އަލީ ޞާލިހު ވިދާޅުވީ މިބައްދަލުވުމުގައި ރިޔާސީ އިންތިޚާބާއި ގާސިމް ރަނިންގ މޭޓަކަށް ހެދުމާއި ގުޅޭގޮތުން މަޝްވަރާކުރެވުނު ކަމަށް ދެކެވޭ ވާހަކަތަކަކީ ކަނޑައެޅިގެން ދޮގެއްކަމަށެވެ. އެފަދަ ވާހަކަތަކެއް މިބައްދަލުވުމުގައި ނުދައްކަވާ ކަމަށް އަލީ ޞާލިހު ވިދާޅުވިއެވެ. އަދި އެފަދަ މަޝްވަރާއެއް ކުރާނަމަ އެކަން ކުރާނީ އެމްޑީޕީގެ ގައުމީ މަޖިލީހުން ފާސްކޮށްގެން އެމްޑީޕީގެ ފަރާތުން ކަމަށް ގަބޫލުކުރައްވާކަމަށް އަލީ ޞާލިހު ވިދާޅުވިއެވެ.
މީގެއިތުރުން މީގެކުރިންވެސް އެމްޑީޕީގެ އިސް ބޭފުޅުންނަށް އެގޮތަށް ރަތްދޫލައިގެ މަރުޚަބާ ކިޔާފައިވާކަމަށާއި އެގޮތަށް ވަޑައިގަންނަވާ އެމްޑީޕީގެ އިސް ބޭފުޅުންނަށް ގާސިމް މަރުޚަބާ ކިޔުއްވާނެކަމަށް އަލީ ޞާލިހު ވިދާޅުވިއެވެ.
މިދަތުރުފުޅާއެކު އެނގިގެންދިޔަ ކަމަކީ ސަރުކާރު ކޯލިޝަންގެ ގުޅުން ރަނގަޅުކަން ކަމަށް އަލީ ޞާލިހު ވިދާޅުވިއެވެ. މިއީ ކޯލިޝަންގެ ގުޅުން ބަދަހިކަން ހާމަވާ ކަމެއްކަމަށް އަލީ ޞާލިހު ވިދާޅުވިއެވެ.
ރައީސް ޞާލިހު ގާސިމާއި ބައްދަލުކުރައްވާފައިމިވަނީ މިދިޔަ ހަފްތާގެ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އަންނަ އިންތިހާބު އެމްޑީޕީއަށް ކާމިޔާބު ކުރުމަށް "ޗޮއިސް" އަކީ އެމަނިކުފާނު ކަމަށް ވިދާޅުވެފައިވަނިކޮށެވެ. މިއީ އަންނަ ރިޔާސީ އިންތިޚާބުގައި ވާދަކުރައްވާނެކަމަށް މިހާ ފާޅުކަން ބޮޑުގޮތެއްގައި ހުދު ރައީސް ޞާލިހު ހާމަކުރެއްވި ފުރަތަމަ ފަހަރުވެސްމެއެވެ.
ރައީސް ވިދާޅުވީ އަންނަ ރިޔާސީ އިންތިހާބު ވެސް އެމްޑީޕީން ކާމިޔާބު ކުރުމަކީ މުޅި ގައުމަށް ވެސް ވަރަށް ބޭނުންތެރި އަދި އެންމެ ފައިދާ ބޮޑު ކަމެއް ކަމަށެވެ. ނަމަވެސް، އެ އިންތިހާބު ވެސް ކާމިޔާބު ކުރެވޭނީ ކޯލިޝަނެއްގެ އެހީތެރިކަމާއެކު ކަމަށް ޔަގީންކުރައްވާ ކަމުގައި ރައީސް ވިދާޅުވިއެވެ.
ރިޔާސީ އިންތިހާބަށް ކޯލިޝަނާއެކު ރައީސް ނުކުންނެވުމަށް ނިންމަވައިގެން ހުންނެވި ނަމަވެސް, ޖުމްހޫރީ ޕާޓީގެ ލީޑަރު ގާސިމް ވަނީ ރިޔާސީ ރޭހަށް އޭނާ ނުކުތުމާމެދު އަދި ގޮތެއް ނުނިންމަވާ ކަމަށް ވިދާޅުވެފައެވެ. ކޯލިޝަން ސަރުކާރުތައް ގެނައުމުގައި ގާސިމުގެ ދައުރަކީ މުހިންމު ދައުރަކަށް ވަނީ ވެފައެވެ.
އަނެއްކޮޅުން އެމްޑީޕީގެ ރައީސް، ރައީސް މުހައްމަދު ނަޝީދު ވަނީ އަންނަ ރިޔާސީ އިންތިޚާބުގައި ވާދަކުރައްވާނެކަން ހާމަކުރައްވާފައެވެ. އިންތިޚާބުގައި ވާދަކުރާ ކެންޑިޑޭޓަކު ކަނޑައެޅުމުގައި ވަކި ގޮތެއް ކުރިޔަށް އޮތް އެމްޑީޕީގެ ކޮންގްރެސްގައި ކަނޑައެޅިގެންދާނެއެވެ.
