ޖޫން މަހުގެ 8 ވަނަ ދުވަހުގެ ނިޔަލަށް އެވަރޭޖްކޮށް ދުވާލެއްގެ މައްޗަށް ރާއްޖެ އައިސްފައިވަނީ 3،820 ފަތުރުވެރިންކަން ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީ އާންމުކޮށްފައިވާ "މޯލްޑިވްސް ޓޫރިޒަމް އަޕްޑޭޓްސް"ގައި ވާގޮތުން މިމަހުގެ ފުރަތަމަ 8 ދުވަހު 30،562 ފަތުރުވެރިން ވަނީ ރާއްޖެ އައިސްފައެވެ. 2019 ވަނަ އަހަރުގެ މި މުއްދަތުގައި 31،817 ފަތުރުވެރިން ރާއްޖެ އައިސްފައިވާއިރު، މިއަހަރުގެ މި މުއްދަތުގައި އައި ފަތުރުވެރިންގެ އަދަދު ވަނީ 3.9 އިންސައްތަ ދަށްވެފައެވެ.

މިމަހުގެ ފުރަތަމަ 8 ދުވަހު އެވަރޭޖްކޮށް ދުވާލަކު އައިސްފައިވަނީ 3،820 ފަތުރުވެރިން ކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ. ފާއިތުވި 5 މަހުވެސް ދުވާލަކު 4،000 އިން މަތިން ފަތުރުވެރިން އައިސްފައިވެއެވެ.

އަހަރުގެ މިހާތަނަށް 732،884 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ. މިއީ 2019 ވަނަ އަހަރުގެ މި މުއްދަތާ އަޅާ ބަލާއިރު 6.2 އިންސައްތަ ދަށް އަދަދެކެވެ. 2019 ވަނަ އަހަރުގެ މި މުއްދަތުގައި 780،931 ފަތުރުވެރިން ރާއްޖެ އައިސްފައިވެއެވެ.

މިވަގުތު އެންމެ ގިނަ ފަތުރުވެރިން ރާއްޖެ އަންނަމުންދަނީ އިންޑިއާއިންނެވެ. އިންޑިއާއިން 104،800 ފަތުރުވެރިން މިހާތަނަށް އައިސްފައިވެއެވެ. އިނގިރޭސިވިލާތުން 90،394 ފަތުރުވެރިން އައިސްފައިވާއިރު، ރަޝިއާއިން އައިސްފައިވަނީ 70،212 ފަތުރުވެރިންނެވެ.

މިއަހަރު ފެށުނުއިރު އެންމެ ގިނަ ފަތުރުވެރިން ރާއްޖެ އަންނަ މާކެޓުގެ ގޮތުގައި އޮތީ ރަޝިއާއެވެ، ރަޝިއާއާއި ޔޫކްރެއިނާ ދެމެދު ހަނގުރާމަ ފެށުނު ހިސާބުން ރަޝިއާއިން ފަތުރުވެރިން އައުން ހުއްޓުނީއެވެ. އެއަށްފަހު އެއްވަނަ މާކެޓަކަށް އެރީ އިނގިރޭސިވިލާތެވެ. އަދި އެއަށްފަހު އިންޑިއާ ވަނީ ޓޮޕް މާކެޓަށް އަރާފައެވެ.

މިއަހަރަކީ ރާއްޖޭގެ ފަތުރުވެރިކަމަށް 50 އަހަރުފުރޭ އަހަރަށްވުމާއެކު މިއަހަރަކީ ފަތުރުވެރިކަމަށް ކާމިޔާބު އަހަރަކަށް ހެދުމަށް ސަރުކާރުން ގެންދަނީ މަސައްކަތްތަކެއް ކުރަމުންނެވެ. މިގޮތުން މިއަހަރު ނިމުމުގެ ކުރިން 1.6 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒުހިފާފައެވެ. އަދި މި އަމާޒާ އެއްގޮތަށް މަސައްކަތްކުރަމުންދާއިރު އެހެން މާކެޓުތަކުގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ގެންދަނީ ގިނަ މަސައްކަތްތަކެއް ކުރަމުންނެވެ.