މޮނާކޯއަށް ކުޅެމުން އައި ފްރާންސްގެ ޒުވާން މިޑްފީލްޑަރ އައުރެލިން ޗުއަމެނީ ޔޫރަޕްގެ ޗެމްޕިއަން ރެއާލް މެޑްރިޑަށް ސޮއިކޮށްފިއެވެ.
ފްރާންސް ޤައުމީ ޓީމްގައިވެސް ހިމެނޭ އުއްމީދީ މިޑްފީލްޑަރ ސްޕެއިންގެ ޗެމްޕިއަން ރެއާލްއާއެކު ސޮއިކުރީ ހަ އަހަރުގެ އެއްބަސްވުމެއްގައެވެ. މޮނާކޯއާއި ރެއާލްއިންވެސް ވަނީ ޗުއަމެނީ ރެއާލްއަށް ބަދަލުވިކަން އިއުލާންކޮށްފައެވެ. އެކަމަކު ރަސްމީކޮށް ތަޢާރަފްކުރާނީ އަންގާރަ ދުވަހުއެވެ. 22 އަހަރުގެ މިޑްފީލްޑަރ މިދިޔަ ސީޒަންގައި ފްރެންޗް ލީގުގައި މޮނާކޯއަށް 35 މެޗު ކުޅެދިނެވެ. ތިން ގޯލް ޖަހާ ދެގޯލް ޖަހަން ފުރުޞަތު ތަނަވަސްކޮށްދިނެވެ. ސެޕްޓެމްބަރުމަހު ޤައުމީ ޓީމަށް ކުޅެންފެށި ޒުވާން މިޑްފީލްޑަރ ވަނީ މިހާތަނަށް ޤައުމީ ޖަރޒީގައި 11 މެޗު ކުޅެފައެވެ.
ޗުއަމެނީ ރެއާލްއަށް ސޮއިކުރީ މެންޗެސްޓަރ ޔުނައިޓެޑާއި, ލިވަޕޫލާއި ޕީއެސްޖީގެ ހުށަހެޅުންވެސް ލިބިފައިވަނިކޮށެވެ. މީގެތެރެއިން ލިވަޕޫލަށް ބަދަލުވުމަށް ބައެއް ކަންކަމާމެދު އެއްބަސްވިކަމަށްވެސް ރިޕޯޓްތައް ބުނެއެވެ. ރެއާލްއިން ޗުއަމެނީގެ ސޮއި ހޯދީ ޕީއެސްޖީގެ ފްރާންސް ފޯވާޑް އެމްބާއްޕޭގެ ސޮއި ހޯދުމަށް ކުރި މަސައްކަތް ނާކާމިޔާބުވުމުންނެވެ.
