ރާއްޖެއަށް އޭޝިއަން ކަޕްގެ ފުރުސަތު ގެއްލިއްޖެ

މިއަންނަ އަހަރު އޮންނަ އޭއެފްސީ އޭޝިއަން ކަޕްގެ ކޮލިފައިންގގައި އުޒްބެކިސްތާން އަތުން ބަލިވުމުން، ރާއްޖެއަށް އޭޝިއަން ކަޕްގެ ފުރުސަތު ގެއްލިއްޖެއެވެ.

ކޮލިފައިންގގައި ހޮނިހިރު ދުވަހުގެރޭ ވާދަކުރީ ރާއްޖެއާއި އުޒްބެކިސްތާނެވެ. މި މެޗު 4-0ން ކާމިޔާބުކުރީ އުޒްބެކިސްތާނެވެ. މި މެޗުގައި އުޒްބެކިސްތާނުގެ ޝޮމުޑޯރޯފް ތިން ލަނޑު ޖަހައި ހެޓްރިކް ހެދިއެވެ. އުޒްބެކިސްތާނުގެ ފަހު ލަނޑު، މެޗުގެ 86 ވަނަ މިނެޓުގައި ކާމިޔާބުކޮށްދިނީ ޔުރޯނޯވްއެވެ.

ކޮލިފައިންގގައި ރާއްޖެ ހިމެނެނީ ތައިލެންޑް، އުޒްބެކިސްތާން އަދި ސްރީލަންކާއާ އެއް ގްރޫޕެއްގައެވެ. ގްރޫޕުގެ މެޗުތައް ސެންޓްރަލައިޒްކޮށް ކުޅެނީ އުޒްބެކިސްތާނުގައެވެ. އޭޝިއަން ކަޕްގެ ޖާގަ ލިބޭނީ ހަ ގްރޫޕުގެ ތެރެއިން ކޮންމެ ގްރޫޕެއްގެ އެއްވަނަ ޓީމާއި، ހަ ގްރޫޕުން ދެވަނައަށްދާ ޓީމުތަކުގެ ތެރެއިން ފަސް ޓީމަކަށެވެ.

މިރޭގެ މެޗުގައި އުޒްބެކިސްތާން ކައިރިން ރާއްޖެ ބަލިވިއިރު، ކޮލިފައިންގގެ ފުރަތަމަ މެޗުގައި ތައިލެންޑު އަތުން ރާއްޖެ ބަލިވީ 3-0ންނެވެ. މި ނަތީޖާއާއެކު ރާއްޖެ އޮތީ ޕޮއިންޓެއް ނުލިބި ގްރޫޕުގެ ފުލުގައެވެ. ކުޅުނު ދެމެޗުން މޮޅުވެ ހަ ޕޮއިންޓާއެކު ތާވަލުގެ އެއްވަނާގައި އޮތީ އުޒްބެކިސްތާނެވެ. ހަ ޕޮއިންޓާއެކު ތައިލެންޑަށް ގްރޫޕުގެ ދެވަނަ ލިބެނީ ފައިދާ ގޯލުން އުޒްބެކިސްތާނު ކުރީގައި އޮތުމުންނެވެ. ކުޅުނު ދެ މެޗުންވެސް ބަލިވި ލަންކާ ތިންވަނާގައި އޮތީ ރާއްޖެއަށްވުރެ ބައިކޮޅަށް ވަތް ލަނޑު މަދުވީމައެވެ.

ލަންކާއާއި ތައިލެންޑު މިރޭ ބައްދަލުކުރި މެޗުން ލަންކާ ބަލިވީ 2-0ންނެވެ. ރާއްޖެއަށް ދެން އޮތީ ކޮލިފައިންގައި ލަންކާއާ ބައްދަލުކުރާ މެޗެވެ. މި މެޗު އޮންނާނީ މި މަހުގެ 14 ވަނަ ދުވަހުއެވެ. މި މެޗުން ކޮންމެ ނަތީޖާއެއް ނުކުތްނަމަވެސް ރާއްޖެއާއި ލަންކާއަށް މިއަންނަ އަހަރު އޮންނަ އޭޝިއަން ކަޕްގައި ކުޅުމުގެ ފުރުސަތެއް ނެތެވެ.