ހުޅުމާލެ ދެވަނަ ފިޔަވަހީގައި ހަދާ އެސްޓީއޯގެ ފްލެޓުތައް 18 މަސް ދުވަހުގެ ތެރޭގައި ނިންމަން ބަޔަކާ ހަވާލުކޮށްފިއެވެ.

އެސްޓީއޯގެ ސީއީއޯ އަދި މެނޭޖިން ޑިރެކްޓަރ ހުސައިން އަމްރު މިކަން އިއުލާންކުރެއްވީ ހުކުރު ދުވަހުގެ ރޭ ބޭއްވި އެސްޓީއޯ ސްޓާފް ނައިޓްގައެވެ.

އެސްޓީއޯގެ އޮފިޝަލަކު "ރާއްޖެ އެމްވީ"އަށް ވިދާޅުވި ގޮތުގައި، އެ މަސައްކަތް ހަވާލު ކޮށްފައިވަނީ ރިނާޓަސް ޕްރޮޖެކްޓްސް ޕްރައިވެޓް ލިމިޓެޑާއެވެ. އެ ކުންފުންޏާ މި މަސައްކަތް ހަވާލުކޮށްފައިވަނީ ކޮންޓްރެކްޓަރ ފައިނޭންސް އުސޫލުން ކަމަށްވެސް މައުލޫމާތު ލިބެއެވެ.

18 މަސް ދުވަހުގެ ތެރޭގައި ފްލެޓުތަކުގެ މަސައްކަތް ނިންމަން ޖެހޭއިރު، ހަވާލު ކުރާތާ 45 ދުވަހުގެ ތެރޭގައި މަސައްކަތް ފަށަން އެއްބަސްވުމުގައި ބުނެފައިވާކަމަށް ވެސް އެސްޓީއޯއިން ބުންޏެވެ.

ހިޔާ މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި އެސްޓީއޯއިން ދެ ޓަވަރު އަޅާނެއެވެ. 15 ބުރީގެ މި ދެޓަވަރުގައި 356 އެޕާޓްމަންޓް ހުންނާނެއެވެ.

އެސްޓީއޯގެ މަސައްކަތް އެންމެ ފުރަތަމަ ފެށީ 2018ވަނަ އަހަރުގައެވެ. އެފަހަރު މަސައްކަތް ހަވާލުކުރީ ޗައިނާގެ ކުންފުންޏެއް ކަމަށްވާ އެމްސީޖީ ގްރޫޕާއެވެ. އެކުންފުންޏާ މި މަސައްކަތް 27 މިލިއަން ޑޮލަރަށް ހަވާލުކުރީ ދެ އަހަރު ދުވަހުގެ ތެރޭގައި ނިންމާގޮތަށެވެ. ނަމަވެސް އެކި ސަބަބުތަކާހުރެ 2019ވަނަ އަހަރު ފްލެޓުތަކުގެ މަސައްކަތް ވަނީ ހުއްޓިފައެވެ.

އެސްޓީއޯގެ ފްލެޓުތަކުގެ މަސައްކަތް ހުއްޓިފައިވާއިރު މިހާތަނަށް ނިމިފައިހުރީ އެންމެ 15 އިންސައްތަ މަސައްކަތެވެ. އެއީ ފައުންޑޭޝަނާއި ދެ ފްލޯރ ޝީޓު އެޅުމުގެ މަސައްކަތެވެ.