ކުލަބް އީގަލްސްގެ ކޯޗުކަމާ އާތީ ހަވާލުވެއްޖެ

ކުލަބް އީގަލްސްގެ ކޯޗުކަމަށް ތަޖުރިބާކާރު ކޯޗު މުހައްމަދު އާތިފް (އާތީ) ހަމަޖައްސައިފިއެވެ.

އާތީ ހަމަޖެއްސުމުގެ ކުރިން އީގަލްސްގެ ކޯޗު ކަމުގެ މަގާމު އޮތީ ހުސްކޮށެވެ. އެއީ އެ ޓީމުގެ ކޯޗު ކަމުގެ މަގާމުގައި ހުރި މުހައްމަދު ޝާޒްލީ (ޝާޒް) ޓީމު ދޫކޮށްލުމުންނެވެ. ޝާޒް ޓީމު ދޫކޮށްލީ ޕްރެޒިޑެންޓްސް ކަޕްއަށް ފަހުއެވެ. އޭގެ ފަހުން އީގަލްސްއަށް އިރުޝާދު ދެމުން އައީ އެސިސްޓަންޓް ކޯޗު އަހުމަދު ނިމާދު (ނިމާ)އެވެ.

އެންމެ ފަހުން އާތީ ހުރީ ކްލަބް އޭދަފުށީގެ ކޯޗުކަމުގައެވެ. އޭނާ ވަނީ އެ ޓީމާއެކު ދިވެހި ޕްރިމިއާ ލީގު ކޮލިފިކޭޝަންގެ އޯޕަން ރައުންޑްގައި ވާދަކޮށް، އެ ޓީމަށް ޒޯން ލީގުން ފުރުސަތު ހޯދައިދީފައެވެ. ފުރަތަމަ ޑިވިޝަންގައި އެންމެ ފަހުން އާތީ ހުރީ ކުލަބް ވެލެންސިއާގެ ކޯޗަކަށެވެ. އޭނާ ވަނީ ވެލެންސިއާއާއެކު މިދިޔަ ސީޒަނުގައި ލީގުގެ ދެ ވަނަ ހޯދާފައެވެ. އޭގެ ފަހުން އެ ޓީމު ދޫކޮށް އޭނާ ހަވާލުވީ ކްލަބް އޭދަފުށްޓާއެވެ.

އުރީދޫ ދިވެހި ޕްރިމިއަރ ލީގުގައި އީގަލްސް މި ވަގުތު އޮތީ ތާވަލްގެ ދެ ވަނަ މަގާމުގައެވެ. އެއީ އެ ޓީމު ކުޅުނު 12 މެޗުން ލިބުނު 28 ޕޮއިންޓް އާއިއެކުއެވެ. ހަމަ އެ އަދަދަށް މެޗު ކުޅެގެން އެއް ވަނަ މަގާމުގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ލިބެނީ 33 ޕޮއިންޓެވެ. މިފަހަރުގެ ލީގުގައި މާޒިޔާ ބަލިވެފައިވަނީ އެންމެ މެޗަކުންނެވެ. އެއީ އީގަލްސް އަތުންނެވެ. އޭޝިއަން ކަޕް ކޮލިފައިންގ ގްރޫޕް ސްޓޭޖުގެ މެޗުތަކަށްފަހު، އަލުން ލީގު ފަށާނީ މި މަހު 21ގައެވެ. އާތީގެ އިރުޝާދުގެ ދަށުން އެރޭ އީގަލްސް ނިކުންނާނީ ވެލެންސިއާއާ ދެކޮޅަށެވެ.