އެސްޓީއޯއިން "ތުއްތު ދަރިފުޅު" ފޮތް ލޯންޗުކޮށްފި
އަލަށް އުފަންވާ ކުދިންނަށް ދެވޭ ހަދިޔާގެ ތެރޭގައި މި ފޮތް ހިމެނުމަށް ނިންމާފައިވޭ
ފޮތް ލޯންޗުކުރުން
އެސްޓީއޯއިން "ތުއްތު ދަރިފުޅު" ފޮތް ލޯންޗުކޮށްފިއެވެ.
"ތުއްތު ދަރިފުޅު"ގެ ނަމުގައި އެސްޓީއޯއިން ލޯންޗްކުރެވިފައިވާ ފޮތުގެ އެހީގައި ދަރިފުޅުގެ ހަޔާތުގެ ފުރަތަމަ ދުވަސްކޮޅުގައި ލިބެންޖެހޭ އެންމެ ފުރިހަމަ އަޅާލުން ދިނުމަށް ބޭނުންވާ މައުލޫމާތު އާއިލާތަކަށް ލިބޭނެއެވެ. ކުރިއަށް އޮތް ތަނުގައި އެސްޓީއޯއިން، އަލަށް އުފަންވާ ކުދިންނަށް ދޭ ހަދިޔާގެ ތެރޭގައި މި ފޮތް ހިމެނޭނެއެވެ.
އެސްޓީއޯއިން ލޯންޗްކޮށްފައިވާ "ތުއްތު ދަރިފުޅު" ފޮތަކީ ކުޑަދަރިފުޅުގެ ހަޔާތުގެ ފުރަތަމަ ދުވަސްވަރު ދިމާވެދާނެ ކަންތައްތަކާއި، އަދި އެކަންތައްތަކާ ގުޅިގެން އަމަލުކުރަންވީ ގޮތުގެ މުއަލޫމާތު އެކުލެވޭނެހެން، އާއިލާތަކުގެ ހޭލުންތެރިކަން އިތުރުކުރުމުގެ މަގުސަދުގައި ތައްޔާރުކޮށްފައިވާ ފޮތެކެވެ. ތުއްތު ދަރިފުޅު އުފަންވާ ވަގުތު ހޮސްޕިޓަލުގައި ދެވޭ ފަރުވާއިން ފެށިގެން، ހޮސްޕިޓަލުން ދޫކޮށްލުމަށްފަހު ދަރިފުޅު ގެންގުޅުމުގައި ސަމާލުކަންދޭންޖެހޭ ކަންކަން މި ފޮތުގައި ވަރަށް ތަފްސީލުކޮށް ބަޔާންކޮށްފައިވާނެއެވެ.
ތުއްތު ދަރިފުޅުގެ ހަޔާތުގެ ފުރަތަމަ 100 ދުވަހަށް ޚާއްސަކޮށް ތައްޔާރުކޮށްފައިވާ މި ފޮތުގައި، ދަރިފުޅަށް ގާތުން ކިރުދިނުމާ ބެހޭގޮތުން އެނގެންޖެހޭ މުހިއްމު މައުލޫމާތުތަކާއި ފުރަތަމަ ދުވަސްކޮޅުގައި ދަރިފުޅުގެ ހެދިބޮޑުވުމަށް އަންނާނެ ތަބީއީ ބަދަލުތަކުގެ ތަފްސީލު ހިމެނިފައިވާނެއެވެ. މީގެ އިތުރުން، ފުރަތަމަ ދުވަސްކޮޅުގައި ދަރިފުޅުގެ ހަށިގަނޑު ތަޖުރިބާކުރާނެ ކަންތައްތަކާއި، އަދި މި ކަންކަމުގައި އާއިލާއިން ކަންކުރަންވީ ގޮތް ހިމެނެއެވެ. ތުއްތު ދަރިފުޅުގެ ސިއްހަތާއި ދުޅަހެޔޮކަން މަންމަގެ ދުޅަހެޔޮކަމާ ވަނީ ވަރަށް ގާތްކޮށް ގުޅި ލާމެހިފައެވެ. މިހެންކަމުން މަންމަ ދުޅަހެޔޮ ސިއްހަތެއްގައި ހުރުމަށް ސަމާލުކަން ދޭންވީ ކަންކަންވެސް މި ފޮތުގައި ހިމެނިފައިވާނެއެވެ.
ޑރ. އަބްދުﷲ ނިޔާފްގެ އެހީތެރިކަމާއެކު ތައްޔާރުކޮށްފައިވާ މި ފޮތުގައި، އަލަށް އުފަންވާ ދަރިފުޅުގެ އާއިލާއިން އާއްމުކޮށް ކުރާ ސުވާލުތަކާއި، އާއިލާތަކުން ސުވާލު އުފެދިދާނެކަމަށް ލަފާކުރެވޭ ވަރަށް ގިނަ ސުވާލާއި މި ސުވާލުތަކުގެ ޖަވާބު ހިމެނޭނެއެވެ.
