ވޮލީއާ ދުރުގައި ހުރުމަށްފަހު އެނބުރި އައީ ކޮމްޕެޓިޝަނެއް ދޭން: މުނާ
މުނާ ވަނީ އީގަލްސްއާއެކު ލޯ މެޑަލް ހޯދާފައި
މުނާ މުނީރު
ގިނަ ދުވަސްތަކެއް ވަންދެން ވޮލީއާ ދުރުގައި ހުރުމަށްފަހު، އެނބުރައި ވޮލީގެ ތެރެއަށް އައީ ކޮމްޕެޓިޝަނެއް ދޭން ކަމުގައި މުނާ މުނީރު ބުނެފިއެވެ.
މިހާރު ކުރިއަށްދާ އެސޯސިއޭޝަން ކަޕްގައި ވާދަކުރި ކުލަބް އީގަލްސްގެ ކޯޗަކަށް ހުރި މުނާ މިހެން ބުނީ "ރާއްޖެ އެމްވީ"އަށް ދިން އިންޓަވިޔުއެއްގައެވެ. މުނާ ބުނީ ކޯޗެއްގެ ގޮތުގައި އަނެއްކާ ވެސް ނިކުތީ ވަރަށް ގިނަ ދުވަސް ވަންދެން ވޮލީއާ ދުރުގައި ހުރުމަށްފަހުކަމަށެވެ. ބޭނުމަކީ ވޮލީއަށް ކޮމްޕެޓިޝަނެއް ދިނުން ކަމަށެވެ. މުނާ ބުނި ގޮތުގައި އީގަލްސްގައި ތިބި ކުޅުންތެރިން އެހެން ޓީމަކަށް ކުޅުން ނަމަ، ގިނަ ކުޅުންތެރިން ތިބޭނީ ބެންޗުގައެވެ.
މުނާގެ އިތުުރުން އީގަލްސް ޓީމުގެ ހުރިހާ އޮފިޝަލުންނަކީ ވެސް އަންހެން އޮފިޝަލުންނެވެ. މިއީ މި މުބާރާތުގައި ޓީމެއްގެ ހުރިހާ އޮފިޝަލުންގެ ގޮތުގައި އަންހެނުން ތިބި ފުރަތަމަ ޓީމެވެ. މުނާ ފާހަގަކުރި ގޮތުގައި އަންހެން ޓީމް ގޭމެއްގައި އެއް ވަނަ ކުޅިވަރެވެ. އަދި އަންހެން އޮފިޝަލުން ހިމެނުމުގެ ބޭނުމަކީ އަންހެނުންނަށް ވާނެ ކަން ސާބިތުކޮށްދިނުން ކަމަށް މުނާ ބުންޏެވެ.
މުނާ ވަނީ އީގަލްސްއާއެކު ނިކުމެ މުބާރާތުގެ ލޯ މެޑަލް ހޯދާފައެވެ. މިއީ އެސޯސިއޭޝަން ކަޕެއްގައި އީގަލްސް ބައިވެރިވި ފުރަތަމަ މުބާރާތެވެ. އީގަލްސް ވަނީ ގްރޫޕް ސެޓޭޖުގެ ދެ ވަނަ ހޯދާ މުބާރާތުގެ ސެމީ ކުޅެފައެވެ. ދެ ވަނަ ސެމީގައި ސީދާ ތިން ސެޓުން ކުލަބް ވޮލީބޯލް ބަލިކޮށް ތިން ވަނަ ސެމީއިން ޖާގަ ހޯދިއެވެ. އަދި ތިން ވަނަ ސެމީގައި ވަނީ ޕޮލިސް ކުލަބް އަތުން ބަލިވެފައެވެ.
