މޮޑްރިޗްގެ ކޮންޓްރެކްޓް ރަސްމީކޮށް އައުކޮށްފި

ރެއާލް މެޑްރިޑަށް ކުޅެމުން އަންނަ ލުކަ މޮޑްރިޗްގެ ކޮންޓްރެކްޓް ރަސްމީކޮށް އައުކޮށްފިއެވެ.

މޮޑްރިޗް ރެއާލާއެކު މީގެ ކުރިން ހަދާފައިވާ އެއްބަސްވުމުގެ މުއްދަތު ޖޫން މަހުގެ ނިޔަލަށް ހަމަވާނެއެވެ. މޮޑްރިޗްއާއެކު ރެއާލްއިން މިއަދު ހަދާފައިވަނީ އެއް އަހަރު ދުވަހުގެ އެއްބަސްވުމެކެވެ. މި އެއްބަސްވުމުގެ މުއްދަތު ހަމަވާނީ މިއަންނަ އަޖަރުގެ ޖޫން މަހުގެ ނިޔަލަށެވެ.

މޮޑްރިޗްގެ ކޮންޓްރެކްޓް ހަމަވާން ގާތްވުމާއެކު އޭނާއަށް އެކި ކްލަބުތަކުން ހުށަހެޅުންތައް ލިބުނެވެ. ނަމަވެސް އޭނާ ބޭނުންވީ އިތުރަށް ރެއާލްގައި މަޑުކުރާށެވެ. މީގެ ދެމަސްކުރިން އަނގަބަހުންވީ އެއްބަސްވުން މިހާރު ވަނީ ލިޔުމުން ނިންމައި ސޮއިކޮށްފައެވެ. ނިމުނު ސީޒަންގެ ޗެމްޕިއަންސް ލީގު ފައިނަލް ކާމިޔާބުކުރުމަށްފަހު އެރޭގެ އުފާ ފާޅުކުރުމުގައި، މޮޑްރިޗް އެޓީމުގައި ކޮންޓްރެކްޓް އައުކުރަން ނިންމާފައިވާކަން އިއުލާނު ކުރިއެވެ.

މި ސީޒަންގައި ރެއާލްއަށް ޗެމްޕިއަންސް ލީގު އަދި ސްޕެނިޝް ލީގު ހޯދައިދިނުމުގައި މޮޑްރިޗް މުހިންމު ދައުރެއް އަދާކުރިއެވެ.