އެސޯސިއޭޝަން ކަޕަށް ނުކުތީ މުބާރާތުގެ ފައިނަލަށް ޓާގެޓުކޮށްގެން ކަމަށާއި، ނަމަވެސް ލިބުނު ނަތީޖާއާމެދު ހިތްހަމަ ޖެހޭ ކަމަށް ކުލަބް އީގަލްސްގެ ކޯޗު މުނާ މުނީރު ބުނެފިއެވެ.

މުބާރާތުގައި އީގަލްސް ވަނީ ގްރޫޕް ސްޓޭޖުގައި ކުޅުނު ފަސް މެޗުގެ ތެރެއިން ހަތަރު މެޗުން މޮޅުވެ ސެމީ ފައިނަލަށް ދަތުރުކޮށްފައެވެ. އެ ޓީމު ސެމީއަށް ދިޔައީ ގްރޫޕްގެ ދެ ވަނަ ޓީމުގެ ގޮތުގައެވެ. އެ ޓީމު ވާދަކުރަން ޖެހުނީ ދެ ވަނަ ސެމީގައި ކުލަބް ވޮލީބޯލްއާއެވެ. ދެ ވަނަ ސެމީ ސީދާ ތިން ސެޓުން ކާމިޔާބުކޮށް، ތިން ވަނަ ސެމީގައި ނުކުތީ ޕޮލިސް ކުލަބާ ދެކޮޅަށެވެ. ތިން ވަނަ ސެމީގައި ވަނީ ތިން ސެޓު އެއް ސެޓުން ބަލިވެފައެވެ. މި ދެ ޓީމު ގްރޫޕް ސެޓޭޖުގައި ބައްދަލުކުރި މެޗު ވެސް ކާމިޔާބުކުރީ ޕޮލިހެވެ.

މެޗަށްފަހު "ރާއްޖެ އެމްވީ" އާ ވާހަކަދައްކަމުން މުނާ ބުނީ މުބާރާތުގެ ތިން ވަނަ ސެމީއާ ހަމައަށް ޓީމު އައީ ވަރަށް ރަނގަޅަށް ކުޅެގެން ކަމަށެވެ. ބަދަލު ކުޅުންތެރިއެއްގެ ގޮތުގައި އަރުވާނެ ކުޅުންތެރިޔަކު ނެތި، މަދު ކުޅުންތެރިންނާއެކު ގިނަ މެޗުތަކެއް އެޓީމު ކުޅުނީ ރަނގަޅަށް ކަމަށެވެ. މީގެ އިތުރުން މުނާ ބުނީ އެހެން މެޗުތަކާ އަޅާ ބަލާއިރު، ރޭގެ މެޗުގައި ދިވެހި ކުޅުންތެރިންގެ ކުޅުން ދަށްވިކަމަށެވެ.

މީގެ އިތުރުން މުނާ ބުނީ ޓީމުގައި ގިނަ ސީނިއަރ ކުޅުންތެރިން ހިމެނުނު ނަމަވެސް، އެ ކުޅުންތެރިން ނުކުޅެ ތިބޭތާ ވަރަށް ގިނަ ދުވަސްވެއްޖެ ކަމަށެެވެ. އޭގެ ތެރޭގައި މެޓާނިޓީ ލީވްގެ ސަބަބުން ނުކުޅެ ތިބި ކުޅުންތެރިންނާއި، ކުޅުމާއި ދުރުގައި ތިބި ކުޅުންތެރިން ތިބިކަން މުނާ ފާހަގަކުރިއެވެ. މުނާ ބުނީ އެ ކުޅުންތެރިންގެ ތަޖުރިބާ ބޮޑުވާނެ ކަމަށެވެ. ނަމަވެސް، ޓީމެއްގެ ގޮތުގައި އީގަލްސް އެކުލަވާލެވުނީ މުބާރާތް ފެށެން ދެ ހަފްތާއަށް ވެފައި ވަނިކޮށްކަމަށެވެ. މުނާ ބުނީ ޓީމަށް ހުރި ބައިވަރު އުނދަގޫތަކާއި ގޮންޖެހުންތައް އެނގޭކަމަށެވެ.

ތިން ވަނަ ސެމީގައި ބަލިވެ އީގަލްސްއަށް ލިބުނީ މުބާރާތުގެ ތިން ވަނަ މަގާމެވެ. މިއީ އީގަލްސް އިން އެސޯސިއޭޝަން ކަޕެއްގައި ބައިވެރިވި ފުރަތަމަ ފަހަރެވެ.