މާލީ ދަތިކަމާ ދިމާވީ ޚަރަދު ކުޑަ ނުކުރުމުގެ ސަބަބުން: ބައްސާމް

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އަށް މާލީ ދަތިތަކަކާ ކުރިމަތިލާން ޖެހުނީ ޚަރަދުތައް ކުޑަ ނުކުރުމުން ކަމަށް އެ އެސޯސިއޭޝަންގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

އިއްޔެ ހަވީރު އޮތް އެފްއޭއެމްގެ ކޮންގްރެސްއަށްފަހު ނޫސްވެރިންނާ ވާހަކަދައްކަވަމުން ބައްސާމް ވިދާޅުވީ ފާއިތުވި އަހަރަކީ ހުރިހާ ގޮތަކުން ވެސް އެފްއޭއެމަށް ދަތި އަހަރަކަށްވި ކަމަށެވެ. ބައްސާމް ވިދާޅުވީ މުބާރާތްތައް ކުރިއަށް ނުގެންދެވި ހުއްޓާލަން ޖެހުމަކީ ސްޕޮންސަރޝިޕް ލިބުމުގައި ދަތިތަކާ ދިމާވި ކަމެއް ކަމަށެވެ. ނަމަވެސް، އެފްއޭއެމުން ކުލަބްތަކަށް ދޭން ޖެހޭ ފައިސާގެ އެހީތެރިކަން 90 ނުވަތަ 95 އިންސައްތަ ކުލަބްތަކަށް ހަވާލުކޮށްދިންކަމަށް ބައްސާމް ވިދާޅުވިއެވެ.

މީގެ އިތުރުން ބައްސާމް ވިދާޅުވީ މުޅި ދުނިޔޭގައި ވެސް އޭރު ކުރަމުން ދިޔަކަމަކީ ޚަރަދު ކުޑަކުރުން ކަމަށެވެ. އަދި މިގޮތުން އެފްއޭއެމަށް ބަލާނަމަ، މުވައްޒަފުން މަދުކުރުމާއި، މުސާރަ ކުޑަކުރުމުގެ އިތުރުން ކުލަބްތަކަށް ދޭންޖެހޭ ފައިސާގެ އެހީތެރިކަން ކުޑަކުރުން އެއީ ކުރެވިދާނެ ކަމެއް ކަމަށެވެ. ނަމަވެސް އޭރު އެފްއޭއެމް އޮތީ މާލީ ގޮތުން ވަރުގަދަ ހާލަތެއްގައިކަމުން އޭރު އެ ފިޔަވަޅުތައް ނޭޅީ ކަމަށެވެ. އަދި އެ ވަގުތު އެކަން ކުރި ނަމަ، ގިނަ ކުޅުންތެރިކަންތަކެއް މަގުމަތި ވާނެ ކަމަށް ބައްސާމް ވިދާޅުވިއެވެ. އަދި އޭރު ކަންތައް ކުރީ ހާލަތަށް ބަލައި، އެންމެ ރަނގަޅަށް ކަމަށެވެ.

މީގެ އިތުރުން ބައްސާމް ވިދާޅުވީ އެފްއޭއެމުން ކުލަބްތަކަށް ދޭން ވައުދުވެފައިވާ މާލީ އެހީތެރިކަން ވެސް ފޯރުކޮށްދެމުންދާނެކަމުގައެވެ. އަދި މިއީ ކުލަބްތަކަށް ލިބޭނެ އުފާވެރި ހަބަރެއް ކަމަށް ބައްސާމް ވިދާޅުވިއެވެ. އެފްއޭއެމްގެ ކޮންގްރެސްގައި، މިއަހަރު ތެރޭގައި އެފްއޭއެމްއަށް ލިބޭނެކަމަށް ބަޖެޓުކޮށްފައިވަނީ 80.4 މިލިއަން ރުފިޔާގެ ދަރަނި ބަޖެޓެކެވެ. ބައްސާމް ވިދާޅުވީ އެފްއޭއެމްގެ ދަރަނީގެ ބޮޑު ބައެއްވެސް މިހާރު ދައްކައި ނިމިފައިވާކަމަށެވެ.

ދަރަނީގެ މައްސަލަތަކެއް ދިމާވެފައިވާ އެފްއޭއެމްއަށް ފީފާއިން ވަނީ، ގައުމީ ޓީމުގެ ކުރީގެ ކޯޗު މާޓިން ކޫޕްމަންއަށް ބަދަލުދޭން އަންގާފައެވެ. މީގެ އިތުރުން ގައުމީ ޓީމުގެ އެސިސްޓެންޓް ކޯޗަކަށް ހުރި ނެދަލެންޑްސްގެ ރެނޭ ހިޑިންކްއަށް 2.9 މިލިއަން ރުފިޔާ ބަދަލުގެ ގޮތުގައި ދިނުމަށްވެސް ނިންމާފައިވެއެވެ.