ލިވަޕޫލްގެ އެދުމަށް ދެކޮޅު ހަދާ ސަލާހު ޤައުމީ ޓީމަށް ކުޅެ، ޓީމް މޮޅުކޮށްދީފި

މެޗުގެ ކުރިން އަނިޔާގެ ހާލަތު ދެނެގަތުމަށް ސްކޭން ހަދާ, ސްކޭން ރިޕޯރޓް ދައްކަން ލިވަޕޫލުން އެދުނު ނަމަވެސް އެކަމަށް ދެކޮޅު ހަދާ ފޯވާޑް މުޙައްމަދު ސަލާހު މިސްރު ޓީމަށް ކުޅެ ޓީމް މޮޅުކޮށްދީފިއެވެ.

ސަލާހު ކުޅުނު އެފްރިކަން ކަޕްގެ ކޮލިފިކޭޝަންގައި ގިނީއާ ދެކޮޅަށެވެ. މެޗު މިޞްރުން ކާމިޔާބުކުރީ 1-0 ނެވެ. މެޗުގައި ސަލާހު ވަނީ 90 މިނިޓް ކުޅެފައެވެ. ސަލާހު މެޗު ފުރިހަމަކުރީ މުޅިން ފިޓްކޮށް ހުރެއެއް ނޫނެވެ. މެޗަށްފަހު ސަލާހު ވަނީ އަނިޔާގެ ހާލަތު ދެނެގަތުމަށް އެކްސްރޭ ނަގާފައެވެ. މިޞްރަށް ދެން އޮތީ ކޮލިފައިންގައި އިތިއޯޕިޔާއާ ދެކޮޅަށް ކުޅޭ މެޗެވެ. އޭގެފަހުން ސައުތުކޮރެއާއާ ދެކޮޅަށް ކުޅޭ ރަހުމަތްތެރިކަމުގެ މެޗެއް އެބައޮތެވެ.

ސަލާހަށް އަނިޔާވީ އެފްއޭކަޕް ފައިނަލްގައި ޗެލްސީއާ ދެކޮޅަށް ކުޅުނު މެޗުގެ ފުރަތަމަ ހާފްގައެވެ. އަނިޔާގެ ސަބަބުން މެޗު ފުރިހަމަނުކޮށް ސަލާހު ވަނީ ބަދަލުކޮށްފައެވެ. އޭގެ ފަހުން ސައުތްހެމްޓަންއާ ދެކޮޅަށް ޕްރިމިއަރ ލީގުގައި ކުޅުނު މެޗުންވެސް ސަލާހުއަށް ފުރުޞަތެއް ނުދެއެވެ. ލިވަޕޫޕްގެ އެދުމާ ދެކޮޅަށް ސަލާހު މެޗު ފުރިހަމަކޮށްފައި މިވަނީ އޭނާގެ ކުރިމަގާމެދުވެސް ސުވާލުތަކެއް އުފެދިފައިވަނިކޮށެވެ. ލިވަޕޫލާއެކު އޮތް އެއްބަސްވުން ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. ކުރިއަށް އޮތް ސީޒަންގައި ލިވަޕޫލްގައި މަޑުކުރާނެކަމުގެ ޔަޤީންކަން ސަލަހު ދެއެވެ.