ދިވެހި ހައްޖާޖީންނަށް ފެންވަރު ރަނގަޅު ފަސޭހަ ޚިދުމަތްތަކެއް ފޯރުކޮށްދިނުމާ ގުޅޭގޮތުން މަޝްވަރާކުރައްވައިފި

މިއަހަރު ދިވެހިރާއްޖެއިން ޙައްޖުގެ އަޅުކަން އަދާކުރުމަށް، މައްކާއަށްދާ ޙާޖީންނަށް ފެންވަރު ރަނގަޅު ފަސޭހަ ޚިދުމަތްތަކެއް ފޯރުކޮށްދިނުމަށާއި، މައްކާއާއި މަދީނާގައި ޙާޖީންނަށް ލިބިދެވޭ ޚިދުމަތުގެ ފެންވަރު ކަށަވަރުކުރުމަށްޓަކައި، މިނިސްޓަރ އޮފް ސްޓޭޓް ފޮރ އިސްލާމިކް އެފެއާޒް އަލްއުސްތާޛް މުޙައްމަދު އަނީލް ސަޢޫދީ ޢަރަބިއްޔާއަށް، ކުރައްވަމުން ގެންދަވާ ޒިޔާރަތުގައި، އަދިއްލާ ކުންފުނީގެ އިސް ފަރާތްތަކާއި ބައްދަލުކުރައްވައިފިއެވެ.

މި ބައްދަލުވުމުގައި، ބައިވެރިވެވަޑައިގެންނެވީ، އެކުންފުނީގެ މެނޭޖިންގ ޑިރެކްޓަރ، ޢަޒްމީ ޙަބްޝުއާއި 1443 ވަނަ އަހަރުގެ ޙައްޖުގެ ކަންކަމާއި ގުޅޭ އެކުންފުނީގެ އެގްޒެކެޓިވް ކޮމެޓީގެ މެމްބަރުން އަދި ކުންފުނީގެ ބައެއް އިސްވެރިންނެވެ.

މި ބައްދަލުވުމުގައި، ދެފަރާތުންވެސް މި އަހަރުގެ ޙައްޖު މޫސުމުގައި ޙާޖީންނަށް ލިބިދެވޭ ޚިދުމަތްތަކުގެ ފެންވަރު ރަނގަޅުކުރުމަށްޓަކައި، ކުރެވެމުންދާ މަސައްކަތްތަކާއި، ފާއިތުވެދިޔަ އަހަރުތަކާއި ޚިލާފަށް އެފަދަ ޚިދުމަތްތަކަށް ގެނެވިފައިވާ ކުރިއެރުމާއި، ހެޔޮބަދަލުތަކުގެ މަޢުލޫމާތު ހިއްސާކުރިއެވެ. މިގޮތުން، ޢަޒްމީ ޙަބްޝާގެ ވާހަކަފުޅުގައި، ޙާޖީންނަށް ޚިދުމަތް ފޯރުކޮށްދޭ ދިވެހި ކުންފުނިތަކަކީ، އަބަދުވެސް ވަރަށް ފުރިހަމަ އިންތިޒާމެއްގެ ތެރެއިން ޚިދުމަތް ދެމުންދާ އުޞޫލުތަކަށް ފުރިހަމައަށް ތަބާވާ ކުންފުނިތަކެއް ކަމަށާއި، ދިވެހި ޙާޖީންނަކީވެސް ކިޔަމަންތެރި، މަޑުމައިތިރި ބައެއްކަން ފާހަގަކުރެއްވިއެވެ. ހަމަ އެފަދައިން، ދެފަރާތުން ގުޅިގެން ޙައްޖުވެރިންނަށް ފޯރުކޮށްދޭ ޚިދުމަތްތައް އެންމެ ފުރިހަމަ ގޮތުގައި ފޯރުކޮށްދިނުމަށްޓަކައި، ދެފަރާތުގެ އެއްބާރުލުން ލިބިދިނުމާއި ބެހޭގޮތުންވެސް އަލިއަޅުވާލެއްވިއެވެ.

މި ބައްދަލުކުރެއްވުމުގައި، އަލްއުސްތާޛް މުޙައްމަދު އަނީލް ދެއްކެވި ވާހަކަފުޅުގައި، ދިވެހި ޙައްޖު މިޝަނާއި އަދިއްލާ ކުންފުންޏާއި ދެމެދު އޮންނަ ގާތްކަން ފާހަގަކުރެއްވިއެވެ. މީގެ އިތުރުން އެހެން އަހަރުތަކެކޭވެސް އެއްފަދައިން، މި އަހަރުވެސް ފުރިހަމަ ޚިދުމަތްތަކެއް ދިވެހި ޙާޖީންނަށް ލިބިގެންދާނެކަމަށް އުންމީދުކުރައްވާ ކަމަށާއި، އެކަމަށްޓަކައި އަދިއްލާގެ ފަރާތުން ފުރިހަމަ އެއްބާރުލުމަށްވެސް އެމަނިކުފާނުވަނީ އެދިވަޑައިގަންނަވާފައެވެ.

މިނިސްޓްރީގެ ވަފްދާއި އަދިއްލާ ކުންފުންޏާއެކު ބޭއްވުނު މި ބައްދަލުވުން ނިންމާލައްވަމުން، އެކުންފުނީގެ ފަރާތުން ޙައްޖުވެރިންނަށް ދެމުންދާ ޚިދުމަތްތަކާއި، ކުންފުނީގެ ފަރާތުން އަދާކޮށްފައިވާ ފުރިހަމަ މެހެމާންދާރީއަށްޓަކައި، ސްޓޭޓް މިނިސްޓަރ އަނީލް ވަނީ، އެކުންފުނީގެ ވެރިންނަށް ޝުކުރު އަދާކުރައްވާފައެވެ. މީގެ އިތުރުން، ސަޢޫދީ ޢަރަބިއްޔާގެ ސަރުކާރުން، ޙާޖީންނަށް ފޯރުކޮށްދެމުންދާ ޚިދުމަތްތަކަށް އައިސްފައިވާ ކުރިއެރުންތައް ފާހަގަކުރައްވައި، ސްޓޭޓް މިނިސްޓަރ އަނީލް ވަނީ، ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލް ޢަޒީޒު އާއި ވަލިއްޔުލް ޢަހްދު މުޙައްމަދު ބިން ސަލްމާނަށް، ދިވެހި ސަރުކާރުގެ ނަމުގައި ޝުކުރު އަދާކުރައްވާފައެވެ.

މި އަހަރުގެ ޙައްޖުގެ އަޅުކަން އަދާކުރުމަށްޓަކައި، އިސްލާމީ ދުނިޔޭގެ ޤައުމުތަކުން އެއް މިލިޔަން ޙާޖީން މައްކާއަށް ޒިޔާރަތްކުރުމުގެ އެންމެހައި އިންތިޒާމުތައް ސަޢޫދީ ޢަރަބިއްޔާގެ ސަރުކާރާއި، ކަމާބެހޭ ކުންފުނިތަކުން ދަނީ ފުރިހަމަކުރަމުންނެވެ.