އެފްއޭއެމްގެ މިއަހަރުގެ ބަޖެޓަށް 80 މިލިއަން ރުފިޔާ

ފުޓްބޯލް އެސޯސިއޭޝަން އޮފް މޯލްޑިވްސްގެ މިއަހަރުގެ ބަޖެޓެއްގެ ގޮތުގައި 80 މިލިއަން ރުފިޔާ ހަމަޖައްސައިފިއެެވެ.

މިއަދު ހަވީރު ބޭއްވި އެފްއޭއެމްގެ ކޮންގްރެސްގައި، މިއަހަރު ތެރޭގައި އެފްއޭއެމްއަށް ލިބޭނެކަމަށް ބަޖެޓުކޮށްފައިވަނީ 80.4 މިލިއަން ރުފިޔާއެވެ. އޭގެ ތެރޭގައި ހިމެނެނީ ފީފާއިން ދޭ 24.3 މިލިއަން، އޭއެފްސީން 6.2 މިލިއަން، ޔޫތު މިނިސްޓްރީން 3.7 މިލިއަން ރުފިޔާ، ސްޕޮންސަރޝިޕްގެ ގޮތުގައި 43.7 މިލިއަން ރުފިޔާ އަދި އޮޕަރޭޝަން އެކްޓިވިޓީސްގެ ގޮތުގައި 2.5 މިލިއަން ރުފިޔާއެވެ.

އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ، މިއަންނަ ހަފުތާއިން ފެށިގެން އެފްއޭއެމްގެ މާލީ ހާލަތު ރަނގަޅުވާނެކަމަށެވެ. އަދި މިއީ މިދިޔަ ހަ މަސްދުވަހު ކުރި ބުރަ މަސައްކަތުގެ ނަތީޖާ ކަމަށްވެސް ބައްސާމް ވިދާޅުވިއެވެ.

މިއަހަރު ތެރޭގައި އެފްއޭއެމްއިން 88.9 މިލިއަން ރުފިޔާ ޚަރަދުކުރުމަށް ވަނީ ބަޖެޓުކޮށްފައެވެ. މީގެތެރޭގައި ހިމެނެނީ، މުބާރާތްތައް ހިންގުމަށް 22.1 މިލިއަން، ޑެވެލޮޕްމެންޓް އަދި ތަމްރީނުތަކަށް 44.7 މިލިއަން އަދި އިދާރީ މަސައްކަތްތަކަށް 19.2 މިލިއަން ރުފިޔާއެވެ. މީގެ އިތުރުން ދަރަނި އަދާކުރުމަށް 3 މިލިއަން ރުފިޔާ ބަޖެޓުކޮށްފައިވެއެވެ.

ބައްސާމް ވިދާޅުވީ އެފްއޭއެމްގެ ދަރަނީގެ ބޮޑު ބައެއްވެސް މިހާރު ދައްކައި ނިމިފައިވާކަމަށެވެ. ދަރަނީގެ މައްސަލަތަކެއް ދިމާވެފައިވާ އެފްއޭއެމްއަށް ފީފާއިން ވަނީ، ގައުމީ ޓީމުގެ ކުރީގެ ކޯޗު މާޓިން ކޫޕްމަންއަށް ބަދަލުދޭން އަންގާފައެވެ. މީގެ އިތުރުން ގައުމީ ޓީމުގެ އެސިސްޓެންޓް ކޯޗަކަށް ހުރި ނެދަލެންޑްސްގެ ރެނޭ ހިޑިންކްއަށް 2.9 މިލިއަން ރުފިޔާ ބަދަލުގެ ގޮތުގައި ދިނުމަށްވެސް ނިންމާފައިވެއެވެ.