އެސްޓީއޯއިން ގްރީން ކޮންކްރީޓް ތަޢާރަފު ކޮށްފި
5 ޖޫން 2022 | އާދީއްތަ 17:13މިއީ 1998 ގައި ޑެންމާކުގައި އުފެއްދި ކޮންކްރީޓެއް
އެސްޓީއޯ ކޮންސްޓްރަކްޝަންގެ މުވައްޒަފުންތަކެއް ކޮންކްރީޓް އުފައްދަނީ
ދުނިޔޭގެ އެހެން ޤައުމުތަކުގައި މަގުބޫލުކަން ހޯދަމުން އަންނަ ތިމާވެއްޓާ ރައްޓެހި، ގްރީން ކޮންކްރީޓް ނުވަތަ ލޯ ކަރބަން ކޮންކްރީޓް އެސްޓީއޯއިން ރާއްޖެއަށް ތައާރަފު ކޮށްފިއެވެ.
އެ ކުންފުނިން ތައާރަފު ކުރި މި ކޮންކްރީޓުގެ ސަބަބުން ތިމާވެއްޓާ އެންމެ ރައްޓެހި ވަސީލަތްތައް އިމާރާތް ކުރުމުގައި ބޭނުން ކުރުމުގެ ފުރުސަތު ފަހިވެގެންދާނެ ކަމަށް އެސްޓީއޯއިން ބުނެއެވެ. އަދި މިއީ އާދައިގެ ކޮންކްރީޓްއާއި އަޅާ ބަލާއިރު ތިމާވެއްޓަށް ކުރާ ނޭދެވޭ އަސަރު ކުޑަކޮށްދީ، ހައިޑްރޭޝަންގެ ހޫނު ދަށް ކޮންކްރީޓެއް ކަމަށް ވެސް އެ ކުންފުނިން މައުލޫމާތު ދެއެވެ.
މީގެ އިތުރުން މިއީ ކަރބަން ނިއުރަލް ގައުމަކަށް ވުމަށް ރާއްޖެ ކުރަމުން ދާ ދަތުރުގައި އެސްޓީއޯއިން އެޅި މުހިންމު ފިޔަވަޅެއް ކަމަށް އެ ކުންފުނިން ސިފަ ކުރެއެވެ.
ގްރީން ކޮންކްރީޓް އަކީ ރިސައިކަލް ކޮށްފައިވާ ހުންނަ ތަކެތި ބޭނުންކޮށްގެން އުފައްދާ ކޮންކްރީޓެކެވެ. މި ކޮންކްރީޓް އުފެއްދުމުގައި ވެސް ކާބަންޑައި އޮކްސައިޑް ބޭރު ކުރާ ވަރު މަދުކޮށްދެއެވެ. މި ކޮންކްރީޓް އެންމެ ފުރަތަމަ ތަޢާރަފު ކޮށްފައިވަނީ 1998 ވަނަ އަހަރު ޑެންމާކުގައެވެ.
ގްރީން ކޮންކްރީޓުގައި ސިމެންތީގެ ބަދަލުގައި ބޭނުން ކުރާ ބާވަތަކީ ޖީޖީބީއެސް އެވެ.
ރާއްޖޭގެ ކޮންސްޓްރަކްޝަން ދާއިރާއަށް ޒަމާނީ ވަސީލަތްތައް ފޯރުކޮށްދިނުމުގައި އެންމެ މުހިންމު ރޯލެއް އަދާ ކުރާ އެއް ކުންފުންޏަކީ އެސްޓީއޯއެވެ. އެގޮތުން އެ ކުންފުނިން އަންނަނީ އެކި ދާއިރާތަކުގައި ތިމާވެއްޓާ ރައްޓެހި އުފެއްދުންތައް ރާއްޖެއަށް ތަޢާރަފު ކުރަމުންނެވެ.
