ހައްޖާޖީން ޖަހަން ސައޫދީ ސަރުކާރުން ހުއްދަކުރާ ވެކްސިންތަކުގެ ނަންތައް ހާމަކޮށްފި
ހައްޖާޖީން ވާންވާނީ މިއިން ވެކްސިނެއް ޖަހާފައިވާ މީހަކަށް
ވެކްސިން
މިއަހަރުގެ ހައްޖުގެ އަޅުކަމަށް ސައޫއަރަބިއްޔާއަށް ދަތުރުކުރާ ފަރާތްތަކުން ޖެހުމަށް ސައޫދީ ކަމާބެހޭ އިދާރާތަކުން ހުއްދަ ކުރާ ކޮވިޑް 19 ވެކްސިން ތަކުގެ ލިސްޓް އެގައުމުގެ މިނިސްޓްރީ އޮފް ހެލްތުން ހާމަކޮށްފިއެވެ. މިގޮތުން އިއުލާން ކޮށްފައިވާ ވެކްސިންގެ ނަންތަކާއި ޑޯޒްގެ އަދަދަކީ،
ފައިޒަރ- ބަޔޯއެންޓެކް ވެކްސިންގެ 2 ޑޯޒް
މޮޑާނާ ވެކްސިންގެ 2 ޑޯޒް
އޮކްސްފޯޑް އަސްޓްރާ ޒެނެކާގެ 2 ޑޯޒް
ޖަންސެންގެ 1 ޑޯޒް
ކޮވޯވެކްސްގެ 2 ޑޯޒް
ނުވާޒޮވިޑްގެ 2 ޑޯޒް
ސީނޯފާމްގެ 2 ޑޯޒް
ސީނޯވެކްގެ 2 ޑޯޒް
ކޮވެކްސިންގެ 2 ޑޯޒް
ސްޕަޓްނިކްވީގެ 2 ޑޯޒް
އެހެންކަމުން ހައްޖާޖީން ވާންވާނީ މިއިން ވެކްސިނެއް ޖަހާފައިވާ މީހަކަށެވެ.
ސައޫދީ ހެލްތު މިނިސްޓްރީން ވަނީ ހައްޖާޖީން ސިއްހީގޮތުން ފުރިހަމަކުރަންޖެހޭ ކަންތަކާއި އެހެންވެސް މައުލޫމާތު، ފޮޓޯއާއި ވީޑިއޯ އަދި ޗާޓުތަކުގެ އެހީގައި އެމިނިސްޓްރީގެ ވެބްސައިޓްގައި ޝާއިއުކޮށްފައެވެ.
ސިއްހީ ކަންކަމުގެ އިތުރުން ހައްޖާޖީންގެ އެކޮމޮޑޭޝަން ނުވަތަ ސައޫދީގައި ތިބުމުގެ ކަންތަކާއި ދަތުރުފަތުރުގެ ކަންތައް ބަހައްޓަންޖެހޭނެ ގޮތްވެސް ވަނީ ވެބްސައިޓްގައި އަންގާފައެވެ. ވެބްސައިޓުން އެނގެންހުރި އެހެން މައުލޫމާތުގެ ތެރޭގައި، ހައްޖާޖީންނަށް ލިބެންހުރި ސިއްހީ ފަރުވާއާއި ހޮސްޕިޓަލްތަކާއި ހެލްތު ސެންޓަރުތައް ހުންނަ ތަންތަނުގެ މައުލޫމާތު ހިމެނެއެވެ.
ހައްޖާޖީންނާއި އެކި ބޭނުންތަކަށް ސައޫދީ އަރަބިއްޔާއަށް އެތެރެވާ އެންމެންވެސް، އަމިއްލަ ގައުމުން ފުރި ތާރީޚަށް 72 ގަޑިއިރު ހަމަނުވާ ޕީސީއާރު ނެގެޓިވް ޓެސްޓެއް އޮންނަން ޖެހެއެވެ. މީގެ އިތުރުން މިފަހަރު ހައްޖަށް ދެވޭނީ އުމުރުން 65 އަހަރު ނުވާ މީހުންނަށް އެކަންޏެވެ.
