ޙައްޖާޖީންގެ އެންމެ ފަހުގެ ގްރޫޕު މިނާއިން ފުރުމާއެކު ޙައްޖުގެ އަޅުކަން ނިމުމަކަށް
12 ޖުލައި 2022 | އަންގާރަ 18:30ޙައްޖާޖީންގެ އެންމެ ފަހު ގްރޫޕް ވަނީ މިހާރު މިނާ ދޫކޮށް ފުރާފައި
ހައްޖުވެރިން އަރަފާތު ބިމުގައި
ޙައްޖާޖީންގެ އެންމެ ފަހު ގްރޫޕް މިނާއިން ފުރުމާއެކު މިއަހަރުގެ ޙައްޖުގެ އަޅުކަން ނިމުމަކަށް އަތުވެއްޖެއެވެ.
އެންމެ ފަހުގެ ގްރޫޕުގައި ހިމެނޭ 900،000 އެއްހާ މީހުން ވަނީ ހޯމަ އަދި ބުދަ ދުވަހު މިނާގައި 3 ޖަމްރާއަށް ހިލައުކާފައެވެ. އެއަށްފަހު ތަވާފުލް ވަދާ އަދާ ކުރުމަށް މައްކާއަށް އެ ގްރޫޕް ވަނީ ގޮސްފައެވެ. މިއީ ޙައްޖުގެ އެންމެ ފަހު އަޅުކަމެވެ.
މިއަހަރު ޙައްޖުގެ އަޅުކަން އަދާ ކުރުމަށް މައްކާއަށް ދިޔަ ޙައްޖާޖީން މިހާރު ވަނީ ޙައްޖު ނިންމާލުމަށްފަހު ފުރަން ފަށައިފައެވެ. އެގޮތުން، ސައުދީގެ އެއަރޕޯޓުތަކުގައި އެފަރާތްތަކަށް ފަސޭހައިން ފުރުމުގެ އިންތިޒާމުތައް މިހާރު ހަމަޖެހިފައިވާނެ ކަމަށް އެ ޤައުމުގެ ސަރުކާރުން ވަނީ ބުނެފައެވެ.
ސައުދީން މިއަހަރުގެ ޙައްޖުގެ ކަންކަން އިންތިޒާމްކޮށްފައި ހުރި ގޮތްތައް ފުރިހަމަކަމުން މުސްލިމް ޤައުމުތަކުގެ ތައުރީފް އެ ޤައުމަށް ވަނީ އަމާޒުވެފައެވެ. އެގޮތުން މިއީ ކާމިޔާބު ޙައްޖެއް ކަމަށާއި ޙައްޖުވެރިންނަށް ފަސޭހަކަމާއެކު އަޅުކަން ކުރެވުނު ކަމަށް ގިނަ ޤައުމުތަކުން ވަނީ ބުނެފައެވެ.
މިއަހަރުގެ ޙައްޖުގެ އަޅުކަން އަދާ ކުރުމަށް ސައުދީން ހުޅުވާލީ 1 މިލިއަން ފުރުސަތެވެ. މިއީ ކޮވިޑް-19އަށްފަހު ފުރަތަމަ ފަހަރަށް މިހާ ގިނަ އަދަދަކަށް ކޯޓާ ހުޅުވާލައިގެން ޙައްޖު ކުރި ފުރަތަމަ އަހަރެވެ.
