ޒަމްޒަމް ފެން ގެނެވޭ ގޮތަށް ހުޅުވާލައިފި

ހައްޖުގެ އަޅުކަން އަދާކުރުމަށްފަހު ހައްޖާޖީން އެނބުރި ގައުމަށް ދަތުރުކުރާއިރު ޒަމްޒަމް ފެން ގެންދެވޭ ގޮތަށް ހުޅުވާލައިފިއެވެ.

ކޮންމެ ހައްޖާޖީއެއްވެސް އެނބުރި ގައުމަށް ދަތުރުކުރާއިރު ފަސް ލީޓަރުގެ ޒަމްޒަމް ފެން ގެންދެވޭ ގޮތަށް ހުޅުވާލާ ކިންގް އަބްދުލްއަޒީޒް އިންޓަރނޭޝަނަލް އެއަރޕޯޓު (ކޭއޭއައިއޭ) އިން ވަނީ މިހާރު އެކަން އާންމުކޮށް އަންގާފައެވެ. އެގޮތުން އެއަރޕޯޓުން ޒަމްޒަމް ފެން ގަންނަން ލިބޭނެ އިންތިޒާމު ވެސް މިހާރު ވަނީ ހަމަޖައްސާފައެވެ.

ކޭއޭއައިއޭއިން މިހާރު ވަނީ މިކަމާއި ގުޅޭ މައުލޫމާތުތައް މައްކާގައި ހަރަކާތްތެރިވާ ހައްޖާޖީންނަށް ފޯރުކޮށްދިނުމުގެ މަސައްކަތް ފަށާފައެވެ. އެގޮތުން ސޯޝަލް މީޑިއާގެ އެކި ޕްލެޓްފޯމްތަކުގައިވެސް މި މައުލޫމާތު ހިއްސާކޮށްފައި ވާނެއެވެ. ހައްޖުގެ އަޅުކަން އަދާކުރުމަށް ގިނަ ގައުމުތަކަކުން މުސްލިމުން ސައުދީއަށް ދަތުރުކޮށްފައި ވާއިރު، ވީހާވެސް ގިނަ ބަސްބަހުން މި މައުލޫމާތު ހިއްސާ ކުރުމުގެ މަސައްކަތް ކޭއޭއައިއޭއިން ވަނީ ފަށާފައެވެ.

މިއަހަރުގެ ހައްޖުގެ އަޅުކަމުގައި 1 މިލިއަން ހައްޖާޖީން ބައިވެރިވާއިރު، މީގެ ތެރެއިން 850،000 ހައްޖާޖީންނަކީ ދުނިޔޭގެ އެކި ކަންކޮޅުތަކުން ހައްޖުގެ އަޅުކަމުގައި ބައިވެރިވާ މީހުންނެވެ.