ރާއްޖޭގެ ނޫސްވެރިންނަށް ދިމާވެފައިވާ ގޮންޖެހުންތަކާއި ގުޅޭގޮތުން އެމްޖޭއޭއިން އައިއެފްޖޭގައި ވާހަކަދައްކައިފި

ދުނިޔޭގެ އެކި ކަންކޮޅުތަކުގައި އުފައްދާފައިވާ ނޫސްވެރިންގެ ޖަމިއްޔާތައް ތަމްސީލުކުރާ ބައިނަލްއަގްވާމީ އެންމެ ބޮޑު ޖަމިއްޔާ ކަމުގައިވާ އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ)ގެ ކޮންގްރެސްގައި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ން ބައިވެރިވެ ނޫސްވެރިންނަށް ދިމާވެފައިވާ މައްސަލަތަކާމެދު އަޑުއުފުލައިފިއެވެ.

އޮމާންގެ ވެރިރަށް މަސްކަޓުގައި މެއި 31ން ޖޫން 3ގެ ނިޔަލަށް ބޭއްވި އައިއެފްޖޭގެ ކޮންގްރެސްގައި އެމްޖޭއޭގެ ފަރާތުން ބައިވެރިވީ އެޖަމިއްޔާގެ ހިންގާ ކޮމެޓީގެ މެމްބަރު މުހައްމަދު ޖުނައިދުއެވެ.

މިކޮންގްރެސްގައި އެމްޖޭއޭގެ ފަރާތުން ވަނީ ރާއްޖޭގެ ނޫސްވެރިންނަށް މިހާރު ކުރިމަތިވެފައިވާ ގޮންޖެހުންތަކާއި ދަތިތަކުގެ މައުލޫމާތު ހިއްސާކޮށް އެކަންކަން ބައިނަލްއަގްވާމީ ފަރާތްތަކުގެ ސަމާލުކަމަށް ގެނެސްފައިކަމަށް އެޖަމިއްޔާއިން ބުނެއެވެ. މީގެއިތުރުން އެމްޖޭއޭއިން ކުރަމުން އަންނަ މަސައްކަތްތަކާއި ކުރަން ރާވާފައިވާ ކަންކަން އަދި އެމްޖޭއޭގެ ހަރަކާތްތަކާއި އިދާރީ އޮނިގަނޑު ޚަރުދަނާކުރުމާއި ގުޅޭގޮތުން ވަނީ އެކި ފަރާތްތަކާއި ބައްދަލުކޮށް މަޝްވަރާކޮށްފައެވެ.

މީގެއިތުރުން ކޮންގްރެސްގެ ތެރޭގައި އެމްޖޭއޭއިން ވަނީ އައިއެފްޖޭގެ ދާއިމީގެ މެމްބަރަކަށްވުމުގެ ޝައުގުވެރިކަން ފާޅުކޮށްފައިކަމަށް އެޖަމިއްޔާއިން ބުނެއެވެ. އަދި އެމްޖޭއޭ ހިމެނޭ ގޮތުން އޭޝިޔާ އާއި އޭޝިޔާ ޕެސިފިކް ގައުމުތަކުގެ ނޫސްވެރިން ތަމްސީލުކުރާ ޖަމިއްޔާތައް އެކުވެގެން ވަނީ " ފެޑެރޭޝަން އޮފް އޭޝިޔާ ޕެސިފިކް ޖާނަލިސްޓްސް" ޔޫނިއަން އުފައްދާފައެވެ. އެޔޫނިއަންގެ ރައީސަކަށް ހޮވާފައިވަނީ އިންޑިޔާގެ ނޫސްވެރިއެއްކަމުގައިވާ ސަބީނާ އިންދަޖީތް އެވެ.

ނޫސްވެރިންގެ ހައްގުތަކާއި ރައްކާތެރިކަމާ ގުޅޭގޮތުން އައިއެފްޖޭގެ ދާއިމީ މެމްބަރު ޖަމިއްޔާތަކުން އެ ކޮންގްރެސް އަށް ހުށަހެޅި ގަރާރުތަކަށް ރާއްޖެއިން ވަނީ ތާއީދުކޮށް ވާހަކަދައްކާފައެވެ. ޚާއްސަގޮތެއްގައި ފަލަސްތީނުގެ ނޫސްވެރިންނަށް އަމާޒުކޮށް އިސްރައީލުން ހިންގާ ލާއިންސާނީ އަމަލުތައް ތަހުގީގުކޮށް ދިނުމަށް އެދި ބައިނަލްއަގްވާމީ ކްރިމިނަލް ކޯޓަށް، ޕަލަސްތީނިއަން ޖާނަލިސްޓް ސިންޑިކޭޓް (ޕީއެސްއައި) އާއި އައިއެފްޖޭ އަދި އައިސީޖޭޕީން ހުށަހަޅާ މައްސަލައަށް އެމްޖޭއޭއިން ތާއީދުކޮށް ވަނީ ވާހަކަދައްކާފައެވެ.