ރާއްޖެއަށް މަސްތުވާތަކެތި އެތެރެކުރަން އުޅުނު ނެދަރލޭންޑްސް މާބަނޑު އަންހެނަކު ހައްޔަރުކޮށް ބަންދުގެ މުއްދަތު ޖަހައިފި
23 އޯގަސްޓު 2025 | ހޮނިހިރު 06:48އެއީ 21 އަހަރުގެ އަންހެނެއް
ކްރިމިނަލް ކޯޓު
ދިވެހިރާއްޖެއަށް މަސްތުވާތަކެތި އެތެރެކުރަން އުޅުނު ނެދަރލޭންޑްސް މާބަނޑު އަންހެނަކު ހައްޔަރުކޮށް ބަންދުގެ މުއްދަތު ޖަހާފައިވާ ކަމަށް ކްރިމިނަލް ކޯޓުން ބުނެފި އެވެ.
އެއީ 21 އަހަރުގެ އަންހެނެކެވެ.
ކްރިމިނަލް ކޯޓުގެ ބަންދުގެ އަމުރުގައި އޭނާގެ މައްޗަށް ކުރަނީ ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރިކުރުމުގެ ތުހުމަތެވެ.
ހުކުރު ދުވަހު އޭނާގެ ބަންދަށް 30 ދުވަސް ޖަހައި، ކަސްޓޯޑިއަލް ޖަލެއްގައި ބަންދުކުރުމަށް އަމުރުކޮށްފައިވެ އެވެ.
ކޯޓުގެ އަމުރުގައި ބުނެފައިވަނީ އޭނާ ކުށްކުރި ކަމަށް ތުހުމަތުކުރެވޭ މިންވަރުގެ ހެކި ހުށަހަޅާފައިވާ ކަމަށެވެ. އަދި އޭނާގެ ލަގެޖުން 5 ކިލޯގެ މަސްތުވާތެކެތި ފެނިފައިވާ ކަމަށް އައިއޯ ފާހަގަކޮށްފައިވެ އެވެ.
މީގެ އިތުރުން އޭނާއަކީ މާބަނޑު މީހަކަށްވާތީ އޭނާގެ ބަލި ހާލަތަށް ބަލައި ތަހުގީގު އަވަސްކޮށްދިނުމަށް ވަކީލު އެދިފައިވެ އެވެ. އަދި އޭނާއަކީ މާބަނޑު މީހަކަށްވާތީ އޭނާގެ ކަންކަން ގާތުން ބެލުމަށް އެދިފައިވާކަން ފާހަގަކޮށްފައިވެ އެވެ.
ދޭތެރެދޭތެރެއިން ރާއްޖެއިން ބޭރުން އަންނަ މީހުންގެ އަތުން މަސްތުވާތަކެތި އަތުލައިގަނެ އެވެ. އެހެން އަތުލައިގަނެވޭ ގިނަ މީހުންނަކީ ރާއްޖޭގެ ބަޔަކާ ގުޅިގެން މަސްތުވާތަކެތި އެތެރެކުރުމަށް މަސައްކަތް ކުރާ މީހުންކަން މިހާތަނަށް ފާހަގަކުރެވިފައިވާ ކަމަށް ފުލުހުން ބުނެފައިވެ އެވެ. މިމަހުގެ 17 ވަނަ ދުވަހު ވެސް ރާއްޖެއަށް މަސްތުވާތަކެތި އެތެރެކުރަން އުޅުނު ސްޕެއިން މީހަކު ހައްޔަރުކޮށް 10 ދުވަހަށް ބަންދުކޮށްފައިވެ އެވެ.
