މޯލްޑިވްސް ކަސްޓަމްސް ސަރވިސަސްގެ އޮފިސަރުންގެ ގާބިލިއްޔަތުކަން އިތުރުކުރުމަށް އިންޑިއާގައި ތަމްރީންތަކެއް ދޭން ނިންމައިފިއެވެ.

މި ތަމްރީންތައް ދޭނީ އިންޑިއާގެ މުމްބާއީގައި ހުންނަ ނޭޝަނަލް އެކެޑެމީ އޮފް ކަސްޓަމްސް، އިންޑައިރެކްޓް ޓެކްސް އަދި ނާރކޮޓިކްސް (އެންއޭސީއައިއެން)ގައި މި މަހުގެ 6ން ޖުލައި 1އަށެވެ. މި ތަމްރީންތަކުގައި ކަސްޓަމްސްގެ 30 އޮފިސަރުން ބައިވެރިވާނެއެވެ.

މި ދަތުރުގައި ބައިވެރިވާ އޮފިސަރުން ފޮނުވާލުމަށް ބުރާސްފަތި ދުވަހު ޚާއްސަ ރަސްމިއްޔާތެއްވެސް ވަނީ ބާއްވާފައެވެ. މި ރަސްމިއްޔާތުގައި ކަސްޓަމްސްގެ ކޮމިޝަނަރ ޖެނެރަލް އަބްދުﷲ ޝަރީފާއި އިންޑިއާ ހައި ކޮމިޝަނުގެ ޑެޕިއުޓީ ކޮމިޝަނަރ ރޯހިތު ރިތޭޝް ވެސް ބައިވެރިވެވަޑައިގެންނެވިއެވެ.

މި ދަތުރުގައި ކަސްޓަމްސް އޮފިސަރުން، ވަޔާއި ކަނޑުގެ ކަސްޓަމްސް ބޯޑަރުތަކުގައި ގާނޫނު ތަންފީޒުކުރުމުގެ މައުލޫއަށް ބިނާކޮށް ހިންގޭ ތަމްރީނެއްގައި ބައިވެރިވާނެއެވެ. އެގޮތުން އިންޓްރެކްޓިވް ސެޝަންތަކާއެކު އިންޑިއާގެ ވުޒާރާތަކަށް ޒިޔާރަތްކުރުން ވެސް އޮންނާނެއެވެ.

މީގެ ކުރިންވެސް އެންއޭސީއައިއެންއިން ބޭއްވި ތަމްރީން ޕްރޮގްރާމްތަކުގައި ކަސްޓަމްސް އޮފިސަރުން ބައިވެރިވިއެވެ. މިއީ 2019ވަނަ އަހަރު އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ރަސްމީ ދަތުރުފުޅުގައި ސޮއިކުރައްވާފައިވާ ކަސްޓަމްސް ކޯޕަރޭޝަން އެމްއޯޔޫގެ ދަށުން ދޭ ތަމްރީންތަކެކެވެ.

ބުރާސްފަތި ދުވަހު ބޭއްވި ރަސްމިއްޔާތުގައި އިންޑިއާގެ ޑެޕިއުޓީ ހައި ކޮމިޝަނަރ ވިދާޅުވީ، އިންޑިއާއާ ރާއްޖެއާ ދެމެދު ކުރެވޭ ވިޔަފާރި 2021 ވަނަ އަހަރު 31 އިންސައްތައަށް ކުރިއަރާފައިވާކަމަށާއި، އޭގެ އަގު 323 މިލިއަން އެމެރިކާ ޑޮލަރަށް އަރާކަމަށެވެ.

ކަސްޓަމްސްއިން މައުލޫމާތުދޭގޮތުގައި މިހާތަނަށް އިންޑިއާއިން 100 ކަސްޓަމްސް އޮފިސަރަކު ވަނީ ތަމްރީން ހޯދާފައެވެ. އަދި އިތުރު 90 އޮފިސަރުން އޮންލައިންކޮށް ތަމްރީން ކޮށްފައިވާކަމަށް ވެސް އެ އިދާރާއިން ބުންޏެވެ.