މޯލްޑިވްސް ބްރޯޑްކާސްޓް އެވޯޑް 2022ށް ކުރިމަތިލުމުގެ މުއްދަތު އިތުރުކޮށްފި
2 ޖޫން 2022 | ބުރާސްފަތި 16:14ޓީވީ ސްޓޭޝަންތަކާއި އެ ތަންތަނުގައި މަސައްކަތްކުރާ ފަންނީ މުވައްޒަފުންގެ އިތުރުން، ބްރޯޑްކާސްޓިންގ ދާއިރާއަށް ޚިދުމަތްކޮށްދީފައިވާ ފަރާތްތަކަށް އެވޯޑް ދޭނެ
މޯލްޑިވްސް ބްރޯޑްކާސްޓިންގ ކޮމިޝަން
މޯލްޑިވްސް ބްރޯޑްކާސްޓް އެވޯޑް 2022ށް ކުރިމަތިލުމުގެ މުއްދަތު ޖޫން 12 ވަނަ ދުވަހާ ހަމައަށް މޯލްޑިވްސް ބްރޯޑްކާސްޓިންގ ކޮމިޝަނުން އިތުރުކޮށްފިއެވެ.
އެކޮމިޝަނުން ބުނީ އެވޯޑްގައި ހިމެނޭ ކެޓަގަރީތަކަށް ކުރިމަތިލުމަށް އިތުރު ވަގުތު ދިނުމުގެ ގޮތުން ޖޫން 12ވާ އާދިއްތަ ދުވަހުގެ 2 ޖަހާއިރަށް މުއްދަތު އިތުރުކޮށްފައިވާކަމަށެވެ. ކުރިން އޮތްގޮތުން އެވޯޑަށް ކުރިމަތިލުމަށް ހުޅުވާލާފައިވަނީ ޖޫން 2 ވަނަ ދުވަހާ ހަމައަށެވެ.
މިއީ ބްރޯޑްކާސްޓިން ދާއިރާއަށް ޚާއްސަކޮށްގެން ބްރޯޑްކޮމްއިން އަލަށް ދޭން ނިންމާފައިވާ އެވޯޑެކެވެ. ބްރޯޑްކޮމްއިން ބުނީ މި އެވޯޑް ދޭން ނިންމާފައިވަނީ، ދިވެހިރާއްޖޭގައި ޚިޔާލުފާޅުކުރުމުގެ މިނިވަންކަމާއި ޑިމޮކްރަސީ އާލާކޮށް ދަމަހައްޓައި، އަދި ގައުމު ބިނާކުރުމާއި، އެކި ދާއިރާތަކުން ރައްޔިތުންގެ ހޭލުންތެރިކަން އިތުރުކޮށް މައުލޫމާތު މުއްސަނދިކުރުމުގައި، ބްރޯޑްކާސްޓިންގ ސިނާއަތުގައި ހަރަކާތްތެރިވާ ފަރާތްތަކުން އަދާކުރާ މުހިއްމު ދައުރުގެ އަގުވަޒަންކޮށް، މި ސިނާއަތުގެ ތަރައްގީއަށް މަގުފަހިކޮށްދީ ހިތްވަރު ދިނުމުގެ ގޮތުންކަމަށެވެ.
އެގޮތުން ޓީވީ ސްޓޭޝަންތަކާއި އެ ތަންތަނުގައި މަސައްކަތްކުރާ ފަންނީ މުވައްޒަފުންގެ އިތުރުން، ބްރޯޑްކާސްޓިން ދާއިރާއަށް ޚިދުމަތްކޮށްދީފައިވާ ފަރާތްތަކަށް އެވޯޑް ދޭނެއެވެ. މީގެ އިތުރުން ފްރީލާންސްކޮށް މަސައްކަތްކުރާ ފަރާތްތަކަށްވެސް އެވޯޑް ދޭނެއެވެ.
މޯލްޑިވްސް ބްރޯޑްކާސްޓް އެވޯޑް ދިނުމަށް ހަމަޖެހިފައިވާ ދާއިރާތައް:
އެންމެ މޮޅު ޑޮކިއުމެންޓަރީ ޕްރޮގްރާމް (ޗެނަލް އަދި އަމިއްލަ)
އެންމެ މޮޅު ކަރަންޓް އެފެއަރޒް ޕްރޮގްރާމް
އެންމެ މޮޅު މުނިފޫހިފިލުވުމުގެ ޕްރޮގްރާމް
އެެންމެ މޮޅު ކުޑަކުދިންގެ ޕްރޮގްރާމް
އެންމެ މޮޅު ޑޭޓައިމް ޕްރޮގްރާމް
އެންމެ މޮޅު ދީނީ ހޭލުންތެރިކުރުމުގެ ޕްރޮގްރާމް
އެންމެ މޮޅު ކުޅިވަރު ޕްރޮގްރާމް
އެންމެ މޮޅު ތިމާވެށި ޕްރޮގްރާމް
އެންމެ މޮޅު އުފެއްދުންތެރި ޕްރޮގްރާމް (ޗެނަލް އަދި އަމިއްލަ)
އަހަރުގެ އިޖްތިމާއީ ޕްރޮގްރާމް (ޗެނަލް އަދި އަމިއްލަ)
އަހަރުގެ އެންމެ މޮޅު ކެމްޕެއިން (އިޖްތިމާއީ ކެމްޕޭން އަދި މާރކެޓިންގ ކެމްޕޭން)
އެންމެ މޮޅު ނިއުސް އެންކަރ
އެންމެ މޮޅު ނޫސްވެރިޔާ
އެންމެ މޮޅު ޕްރޮގްރާމް ޕްރެޒެންޓަރ
އެންމެ މޮޅު ކެމެރާ ޕަރސަން
އެންމެ އުއްމީދީ ނޫސްވެރިޔާ
ބެސްޓް ބްރޯޑްކާސްޓިންގ ޗެނަލް
ބެސްޓް އިންކްލޫސިވް ބްރޯޑްކާސްޓަރ
އެންމެ އުފެއްދުންތެރި ޗެނަލް
ބްރޯޑްކާސްޓިންގ ދާއިރާއަށް ގިނަ ޚިދުމަތްތަކެއް ކޮށްދީފައިވާފައިވާ ފަރާތަށް ދޭ އިނާމް
ރީބްރޯޑްކާސްޓިންގ ޚިދުމަތުގެ އެވޯޑް
ބްރޯޑްކާސްޓިންގ ކޮމިޝަނުން ބުނީ އިނާމު ދިނުމަށް ހަމަޖެހިފައިވާ ދާއިރާތަކުގެ ޝަރުތުތައް އެކުލެވޭ ތަފްސީލާއި އެޕްލިކޭޝަން ފޯމް "މޯލްޑިވްސް ބްރޯޑްކާސްޓް އެވޯޑު ދިނުމުގެ އުސޫލު"ގައި ބަޔާންކޮށްފައި ވާނެކަމަށެވެ.
