ޖޮނީ ޑެޕް-އެމްބަރ ހާރޑް ޝަރީއަތް، ޖޮނީ ޑެޕާ އެއްކޮޅަށް ނިމިއްޖެ

ހޮލީވުޑްގެ މަޝްހޫރު ފިލްމް ސްޓާރ ޖޮނީ ޑެޕާއި އޭނާގެ ކުރީގެ އަންހެނުން އެމްބަރ ހާރޑާ ދެމީހުން އެކަކު އަނެކަކުގެ އަބުރު ކަތިލިކަމަށް ބުނެ ކޯޓަށް ވެއްދި މައްސަލައިގައި ޖޮނީ ޑެޕާ އެއްކޮޅަށް ޝަރީއަތް ނިމިއްޖެއެވެ. އަދި ކޯޓުން ވަނީ އޭނާގެ ނަން ހުތުރުވެ ލިބުނު ގެއްލުމުގެ ބަދަލެއްގެ ގޮތުން 15 މިލިއަން ޑޮލަރު ދިނުމަށް އެމްބަރ ހާރޑްގެ މައްޗަށް އަމުރުކޮށްފައެވެ.

އަނެއްކޮޅުން އެމްބަރގެ ނަން ހުތުރުވިކަމަށް ބުނެ ކުރި ދައުވާއާ ގުޅިގެން އޭނާއަށްވެސް 2 މިލިއަން ޑޮލަރު ޖޮނީޑެޕް ދޭންޖެހޭކަމަށް ކޯޓުން ބުދަދުވަހު ނިންމާފައިވެއެވެ.

މި ދެ ތަރިންގެ މައްސަލަ ފެށުނީ 2018 ވަނަ އަހަރު އެމްބަރ ހާރޑް މަޝްހޫރު ނޫސް ވޮޝިންގޓަން ޕޯސްޓަށް ދިން ބަޔާނެއްގައި، އޭނާއަކީ ގެވެށިއަނިޔާ ލިބުނު އަންހެނެއްކަމަށް ބުނުމާގުޅިގެންނެވެ. އެބަޔާނާ ގުޅިގެން ޑެޕްގެ އަބުރަށް ހުތުރު އަރާފައިވާކަމަށް ބުނެ، އެކަމުގެ ބަދަލު ހޯދުމަށް ޖޮނީ ޑެޕް މައްސަލަ ކޯޓަށް ވެއްދިއެވެ.

މުޅި ދުނިޔެއަށް ހުޅުވާލައިގެން ހަތް ހަފްތާއެއްހާ ދުވަހު ކުރިޔަށް ދިޔަ ޝަރީއަތުގެ އަޑުއެހުންތައް ވަނީ 3 މިލިއަނެއްހާ މީހުން އޮންލައިންކޮން ބަލާފައެވެ. ޝަރީއަތުގެ އަޑުއެހުންތަކުގައި އެމްބަރ ހާރޑް އަންހެން ކޮއްކޮއެއް ވަނީ، އެމްބަރގެ ގައިގަ ޖަހަނިކޮށް ދުށްކަމަށާއި، ޖަހާފައި ހުންނަ ގޮތަށް ނޫފައިގެންފައި ހުރި ތަންތަން އެމްބަރގެ ގައިން ފެނިފައިވާކަމަށް ހެކިބަސް ދީފައެވެ. ނަމަވެސް ވަކި ހިސާބަކުން އެމްބަރ ހާރޑް ވަނީ، އޭނާގައިގަ ދުވަހަކުވެސް ޖޮނީ ޑެޕް ޖަހައި، އަތް އިސްކޮށްފައި ނުވާކަމަށް ބުނެފައެވެ. ނަމަވެސް ޑެޕްގެ ވަކީލުން ބުނީ އޭރު ޑެޕްގެ އަބުރަށް ލިބޭނެ ހުތުރެއް ލިބިފައިވާކަމަށެވެ.

ބުދަ ދުވަހު ޝަރީއަތް ނިމުމަށްފަހު ޖޮނީ ޑެޕް ނެރުނު ބަޔާނުގައި ބުނެފައިވަނީ، ފަނޑިޔާރުންގެ ޕެނަލްގެ ނިންމުމުގެ ސަބަބުން، އޭނާގެ ކުރީގެ ދިރިއުޅުން އަނބުރާ ލިބިފައިވާ ކަމަށެވެ. އަދި އޭނާ މަސްއަލަ ކުރިޔަށް ގެންދަން ބޭނުންވީ އޭނާގެ ދެކުދިންނަށާއި އޭނާގެ ސަޕޯޓަރުންނަށް، އޭނާއަކީ އަންހެނުންނަށް އަނިޔާކުރާ ވިޔާނުދާ މީހެއް ނޫންކަން ހާމަކޮށްދިނުމަށް ކަމަށް ޖޮނީ ޑެޕް ބުނެފައިވެއެވެ.

ޖޮނީޑެޕާއި އެމްބަރ ހާރޑް ފުރަތަމަ ބައްދަލުވެފައިވަނީ ފިލްމް "ދަ ރަމް ޑައެރީ" ކުޅުމުގެތެރެއިން، 2009 ވަނަ އަހަރުއެވެ. 2012 ވަނަ އަހަރުން ފެށިގެން ލޯބީގެގޮތުން ގުޅިގެން އުޅުމަށްފަހު، 2015ގައި އެ ދެމީހުން ކައިވެނިކޮށްފައިވެއެވެ. ނަމަވެސް އޭގެ އެއް އަހަރު ފަހުން 2016 ވަނަ އަހަރު ޑެޕް އެދިގެން ކައިވެނި ވަނީ ރޫޅާލާފައެވެ.

ކޯޓުގެ ޝަރީއަތުގެ އަޑުއެހުމުގައި އެމްބަރ ހާރޑް ބުނެފައިވާ ގޮތުން، 2012 ހިސާބުން ފެށިގެންވެސް ޖޮނީ ޑެޕް އައީ ރަލާއި މަސްތުވާތަކެތި ބޭނުންކުރަމުންނެވެ. ނަތީޖާއެއްގެ ގޮތުން ހަމައިގަނެތި އޭނާގެ ރައްޓެހިންނަށް ޒާތްޒާތުގެ ޓެކްސް މެސެޖް ފޮނުވައި، އެމްބަރ ހާރޑަށް އަނިޔާކުރާނެކަމަށް ބުނެފައިވެއެވެ. އަދި މެސެޖްތައް ހެކީގެގޮތުގައި ހުށައަޅާފައިވެއެވެ.

އަނެއްކޮޅުން ޖޮނީ ޑެޕް ބުނަނީ އެމްބަރ ހާރޑް އޭނާރުޅިއަރުވައި އޭނާއަށް ދުއްތުރާކުރާކަމަށެވެ. މިގޮތުން ޑެޕަށް ޖެއްސުމަށް ނިދާ އެނދަށް އެމްބަރ ބޮޑުކަމުވެސް ދިޔަކަމަށް ޖޮނީ ޑެޕް ބުނެފައިވެއެވެ. މިކަމަށް އެމްބަރ ހާރޑްވެސް ވަނީ ކޯޓުގައި އެއްބަސް ވެފައެވެ.

ޖޮނީ ޑެޕް ބުނަނީ އެއީ އެމްބަރ ހާރޑް ވަރިކުރަން ނިންމުމުން އޭނާ ރުޅިއައިސްގެން ކުރި ކަންތައްކަމަށެވެ.

ޖޮނީ ޑެޕަށް ވަނީ، އޭނާ 14 އަހަރުވަންދެން ލޯބިވެގެން އުޅުނު ފަރަންސޭސި އެކްޓްރެސް އަދި ލަވަކިއުންތެރިޔާ ވަނެސާ ޕެރަޑިސްއަށް ދެކުދިން ލިބިފައެވެ. އެއީ 1999ވަނަ އަހަރު ލިލީ ރޯސް ޑެޕް އަދި 2002 ވަނަ އަހަރު ޖެކް ކިޔާ ފިރިހެން ކުއްޖެކެވެ. ވަނެސާ ޕެރަޑިސް އަދި ޖޮނީ ޑެޕް ކައިވެނި ކޮށްފައެއް ނުވެއެވެ. އޭނާ އޭރު ބުނިގޮތުގައި ލޯބިވާ ދެމީހުން އެކުގައި އުޅުމަށް ކަރުދާސް ހުއްދައެއް ބޭނުމެއް ނުވެއެވެ. ނަމަވެސް 2012 ވަނަ އަހަރު އެދެމީހުން ވަނީ ދުރުވެފައެވެ.

ޖޮނީ ޑެޕާއި އެމްބަރ ހާރޑް ލޯބީގެ ގޮތުން ގުޅި، އަދި ކައިވެނިކުރީ ވަނެސާއާއެކު އޮތް ގުޅުން ރޫޅުމަށްފަހުއެވެ.